រតនគិរី៖ បញ្ហាអាវុធគីមី អាវុធជីវសាស្ត្រ អាវុធនុយក្លេអ៊ែ និងអាវុធវិទ្យុសកម្ម បានគំរាមកហែងយ៉ាងធ្ងន់ធ្ងរលើសន្តិសុខ សន្តិភាព និងស្ថេរភាព ក្នុងតំបន់ និងពិភពលោក ជាពិសេសរកឃើញសារធាតុគីមីនៅខេត្តស្វាយរៀង។
ក្នុងផ្សព្វផ្សាយច្បាប់ ស្តីពីហាមឃាត់អាវុធគីមី អាវុធនុយក្លេអ៊ែ អាវុធជីវសាស្ត្រ និងអាវុធវិទ្យុសកម្ម ដល់មន្ដ្រីរាជការ កងកម្លាំងប្រដាប់អាវុធទាំង៣ប្រភេទ ក្នុងខេត្តរតនគិរី នៅព្រឹកថ្ងៃទី៦ ខែកុម្ភៈ ឆ្នាំ២០១៨នេះ។
លោកឧត្តមសនីយ៍ឯក ហេង វុទ្ធី អគ្គលេខាធិការរងអាជ្ញាធរជាតិអាវុធគីមី បានបញ្ជាក់ថា កម្ពុជាពិតជាមានគំរាមកំហែងពីអាវុធគីមី អាវុធនុយក្លេអែ អាវុធជីវសាស្ត្រ និងអាវុធវិទ្យុសកម្ម ដូច្នេះត្រូវមានការការពារ ការរាវរកឆ្លើយតបឲ្យមានប្រសិទ្ធភាព ដើម្បីទប់ស្កាត់ការរីករាលដាល់ និងផលប៉ះពាល់ដល់សុខភាពសាធារណៈ ពិសេសការរារាំងដល់ការអភិវឌ្ឍន៍ប្រទេសជាតិ។
លោកឧត្តមសនីយ៍ឯក ហេង វុទ្ធី បានថ្លែងថា អគ្គលេខាធិការដ្ឋានអាជ្ញាធរអាវុធគីមី បានដាក់ចាញនូវកម្មវិធីផ្សព្វផ្សាយច្បាប់ នាពេលនេះ ក្នុងន័យចែករំលែកចំណេះដឹង និងផ្លាស់ប្តូរបទពិសោធន៍ ពីមហន្តរាយ និងផលប៉ះពាល់ពីសារធាតុអាវុធគីមី អាវុធនុយក្លេអែ អាវុធជីវសាស្ត្រ និងអាវុធវិទ្យុសកម្ម ថ្នាក់ជាតិ ថ្នាក់តំបន់ និងពិភពលោក។
លោកបានបញ្ជាក់ទៀតថា ស្ថានភាពបច្ចុប្បន្នទាក់ទងទៅនឹងជនរងគ្រោះដោយសារ គ្រាប់បែកគីមីដែលទម្លាក់ដោយសហរដ្ឋអាមេរិច នៅឃុំគគីរ ស្រុករមាសហែក ខេត្តស្វាយរៀង រាជរដ្ឋាភិបាលបានយកចិត្តទុកដាក់ យ៉ាងខ្លាំងលើបញ្ហានេះ ព្យាបាលជនរងគ្រោះដោយសារគ្រាប់បែកគីមីដោយឥតគិតថ្លៃ មិនតែប៉ុណ្ណោះដើម្បីជាការងាយស្រួល ដល់ការស្វែងរកសេវាសុខភាព ដែលនៅជិតផ្ទះ និងកាត់បន្ថយការចំណាយ និងទាន់ពេលវេលា ក្រសួងសុខាភិបាល នឹងសាងសង់មណ្ឌលសុខភាពមួយជូនប្រជាពលរដ្ឋ នៅក្នុងឃុំគគីរនេះផ្ទាល់តែម្តង៕ ដោយ៖បញ្ញាស័ក្តិ
