បន្ទយមានជ័យ៖ លោកស៊ុំ ច័ន្ទគា មន្ត្រីសម្របសម្រួលសមាគមការពារសិទ្ធិមនុស្សអាដហុក ប្រចាំខេត្តបន្ទយមានជ័យ បានសរសេរសារនៅលើផេកហ្វេសប៊ុកផ្លូវការរបស់លោកនាព្រឹកថ្ងៃទី ៣ ខែកញ្ញាឆ្នាំ ២០២០ នេះថា “លោកអនុសេនីយ៍ទោ ឬទ្ធី ពិសិដ្ឋ ដែលបានត្រូវបាន តុលាការ គំរូ ខេត្តបន្ទាយមានជ័យ បានសម្រេចឃុំខ្លួនបណ្តោះអាសន្ន នៅល្ងាចថ្ងៃទី២ ខែកញ្ញា ឆ្នាំ២០២០ នេះ ។ ដោយសារលោក បានបាញ់ប្រហារជនរងគ្រោះពីខាងក្រោយ កាលពីថ្ងៃទី ២៧ ខែសីហា ឆ្នាំ២០២០ តាមបណ្តោយផ្លូវជាតិលេខ៥ ស្ថិតនៅភូមិនិមិត្ត1 សង្កាត់និមិត្ត ក្រុងប៉ោយប៉ែត “។
លោកស៊ុំ ច័ន្ទគា បានបញ្ជាក់បន្ថែមទៀតថា “លោកអនុសេនីយ៍ទោ មិនគួរណា ភ្លេចការណែនាំរបស់លោក ស្នងការ លោក ស្នងការរង ដែលអនុវត្តនៅពេលបំពេញបេសកម្ម មាន ១)ត្រូវពិគ្រោះរាល់បទល្មើស មិនឲ្យជនល្មើសឬជនសង្ស័យរងគ្រោះ ២)មិនឲ្យខ្លួនឯងរងគ្រោះ និងទី៣) មិនឲ្យខ្លួនឯងក្លាយជាជនល្មើស ប្រឆាំងនឹងច្បាប់ ។
ជនសង្ស័យឈ្មោះឬទ្ធី ពិសិដ្ឋ អនុសេនីទោ (ស័ក្តិ២) ជានាយករងប៉ុស្តិ៍នគរបាលនិមិត្ត ខេត្តបន្ទាយមានជ័យ ត្រូវបានសមត្ថកិច្ចចាប់ខ្លួនបញ្ជូនទៅកាន់អយ្យការអមសាលាដំបូងខេត្តបន្ទាយមានជ័យ នៅរសៀលថ្ងៃទី៣១ ខែសីហា ឆ្នាំ២០២០ ដើម្បីសាកសួរពីករណីសង្ស័យប្រើប្រាស់អាវុធខុសច្បាប់ ដោយបានបាញ់រះទៅលើយុវជនរងគ្រោះម្នាក់ របួសខ្នង និងទ្រូងចាត់ការទៅតាមច្បាប់។
យោងតាមសមត្ថកិច្ចខេត្តបន្ទាយមានជ័យ បានប្រាប់សារព័ត៌មានថា ជនរងគ្រោះមានឈ្មោះនាង មករា ភេទប្រុស អាយុ២១ឆ្នាំ មុខរបរ ជជាសិស្សសាលាជាមុខសញ្ញាប្រើប្រាស់គ្រឿងញៀន រស់នៅភូមិនិមិត្ត១ សង្កាត់និមិត្ត ក្រុងសេរីសោភ័ណ ខេត្តបន្ទាយមានជ័យ រងរបួស កំពុងសម្រាក់ព្យាបាលរបួសនៅមន្ទីរពេទ្យ។ ចំណែកបក្ខពួក ៣ នាក់ទៀតក៏ត្រូវចាប់ខ្លួនបញ្ជូនទៅតុលាការផងដែរ។
លោកអាត់ ខែម ស្នងការខេត្តបន្ទាយមានជ័យ បានបញ្ជាក់ថា ជនរងគ្រោះពិតជារងរបួស ដោយសារគ្រាប់កាំភ្លើងចំនួន១គ្រាប់ ពិតមែន កាលពីយប់ថ្ងៃទី២៧ ខែសីហា ឆ្នាំ២០២០ ត្រូវចំពីក្រោយខ្នងបៀមគ្រាប់ នៅក្រោមគាកខាងស្តាំ។ លោកស្នងការខេត្តបន្តថា ក្រោយពេលទទួលបានព័ត៌មាន ពីការបាញ់បោះបង្ករបួសស្នាម សមត្ថកិច្ចក៏បានចុះទៅស្រាវជ្រាវ និងបានឃាត់ខ្លួនជនសង្ស័យខាងលើ នាំមកកាន់ស្នងការខេត្តកសាងសំណុំរឿង បញ្ជូនទៅកាន់សាលាដំបូងខេត្ត បន្តនីតិវិធីចាត់ការតាមច្បាប់។
លោកស៊ុំ ច័ន្ទគា មន្ត្រីសម្របសម្រួលសមាគមការពារសិទ្ធិមនុស្សអាដហុកខេត្តបន្ទាយមានជ័យ បានសរសេរសារលើហ្វេសប៊ុកផ្លូវការថា “ប៉ូលិសនាយរងប៉ុស្តិ៍រដ្ឋបាលសង្កាត់និមិត្តIdolរបស់ខ្ញុំ ខាងបាញ់ពលរដ្ឋពីក្រោយ លើកឡើងថា ការពារខ្លួន ដែលប្រព្រឹត្តិឡើងកាលពីថ្ងៃទី២៧ ខែសីហា ឆ្នាំ២០២០ វេលាម៉ោង ១០និង៣០នាទីយប់ នៅតាមបណ្តោយផ្លូវជាតិលេខ៥ ស្ថិតភូមិមិត្ត១ សង្កាត់និមិត្ត ក្រុងប៉ោយប៉ែត នោះ ត្រូវបានចាប់ខ្លួន នឹងបញ្ជូនទៅតុលាការ នៅថ្ងៃទី ៣១ ខែសីហា ឆ្នាំ២០២០វេលា រសៀល ។
មន្ត្រីសម្របសម្រួលសមាគមការពារសិទ្ធិមនុស្សអាដហុក (Adhoc) ខេត្តបន្ទាយមានជ័យ លោក ស៊ុំ ច័ន្ទគា ដែលបានចុះស៊ើបអង្កេតរឿងនេះមានប្រសាសន៍ប្រាប់អ្នកកាសែតថា ការបាញ់ប្រជាពលរដ្ឋបែបនេះ ជាអំពើមនុស្សឃាតដោយចេតនាក៏ប៉ុន្តែជាសំណាងល្អដែលយុវជនរួបនោះត្រូវបានបញ្ជូនទៅសង្គ្រោះបន្ទាន់ទាន់ពេលវេលាមិនបណ្តាលឲ្យស្លាប់ ។ លោកថា អាជ្ញាធរពាក់ព័ន្ធគួរតែចាត់វិធានរឿងនេះតាមច្បាប់ជាបន្ទាន់ ដោយមិនអាចលើកលែងបានឡើយ។ លោកបញ្ជាក់ថា ប្រសិនបើអាជ្ញាធរមិនចាត់វិធានការរឿងនេះទេ គឺជាការអនុវត្តច្បាប់ស្តង់ដារ២ ដោយផ្ដន្ទាទោសចំពោះតែជនក្រីក្រ និងគ្មានអំណាច ចំណែកអ្នកមានលុយ និងមានអំណាចរស់នៅក្រៅសំណាញ់ច្បាប់៖ « អីចឹងបាញ់ចំពីក្រោយទៀតអីចឹងចេតនាគឺចង់បានលទ្ធផលគឺជនរងគ្រោះស្លាប់។ អីចឹងបើជនរងគ្រោះស្លាប់ ឬរបួសធ្ងន់ធ្ងរណាមួយនេះគឺជាការផ្ដើមចេញអំពីអំពើទុច្ចរិតរបស់សមត្ថកិច្ច។ អីចឹងទាំងអស់នេះហើយដែលខាងសមាគមអាដហុកបានទទួលពាក្យបណ្ដឹងរបស់គាត់ហើយ ហើយបានស៊ើបអង្កេតទៅលើរឿងហ្នឹង ហើយក៏បានអន្តរាគមន៍ខ្លះៗទៅតាមតេឡេក្រាមជាមួយព្រះរាជអាជ្ញាដែរ ដើម្បីឱ្យជួយចាត់ការរឿងនេះ ដើម្បីកុំឱ្យជនប្រព្រឹត្តដែលជាសមត្ថកិច្ចហ្នឹងរួចខ្លួន ចេះតែសុខផុតពីសំណាញ់ច្បាប់។»
សមត្ថកិច្ចថា ជនសង្ស័យរាលកៃកាំភ្លើងត្រូវចំក្មេងទំនើង មុខសញ្ញាចាស់ប្រើប្រាស់ថ្នាំញៀនចំណែកអណាព្យាបាល ថាកូនគាត់ពុំមែនជាក្មេងទំនើងអ្វីទេ ។
ស្នងការដ្ឋាននគរបាលខេត្តបន្ទាយមានជ័យ នៅថ្ងៃទី២ខែកញ្ញានេះ បានជម្រាប ជូនសាធារណជន អ្នកសារព័ត៌មាន និងបណ្តាញទំនាក់ទំនងសង្គម មេត្តាទទួលជ្រាបដូចខាងក្រោម៖
១-កាលពីថ្ងៃទី២៧ ខែសីហា ឆ្នាំ២០២០ វេលាម៉ោង ២៣.២០ នាទី កម្លាំងប៉ុស្តិ៍នគរបាលរដ្ឋបាលនិមិត្ត នៃអធិការដ្ឋាននគរបាលក្រុងប៉ោយប៉ែត បានចេញល្បា
តតាមគោលដៅកំណត់ និងបានជួបជនសង្ស័យចំនួន២នាក់ជិះម៉ូតូ០១គ្រឿង ដែលជាមុខសញ្ញាចាស់ធ្លាប់ប្រើប្រាស់ និងចែកចាយគ្រឿងញៀន និងបង្កហិង្សាដោយផ្ទុះអាវុធកាលអំឡុងឆ្នាំ២០១៦ ដែលបានរត់គេចខ្លួន។
២-អំឡុងពេលល្បាត លោកអនុសេនីយ៍ទោ ប្ញទ្ធី ពិសិដ្ឋ នាយរងប៉ុស្តិ៍រដ្ឋបាលនិមិត្ត បានធ្វើការឃាត់ដំណើរជនសង្ស័យខាងលើដើម្បីសួរនាំ និងធ្វើការពិនិត្យ ប៉ុន្តែជនសង្ស័យទាំង២នាក់មិនព្រមសហការ ថែមទាំងបានទូរស័ព្ទហៅបក្ខពួកចំនួន២នាក់ផ្សេងទៀត ជិះម៉ូតូ១គ្រឿងមកជួយអន្តរាគមន៍ និងបានឈានដល់ប្រព្រឹត្តអំពើហិង្សា ដោយជនទាំង៤នាក់ដើរចូលមកប៉ុនប៉ងវាយលើលោកអនុសេនីយ៍ទោ ប្ញទ្ធី ពិសិដ្ឋ ខណ:នោះ លោកអនុសេនីយ៍ទោ ប្ញទ្ធី ពិសិដ្ឋ បានដកកាំភ្លើងម៉ាកកា៥៩ លេខ.៣៣៦០ អាមេបំណងបាញ់ឡើងលើ ដើម្បីការពារខ្លួន និងបំបែកហ្វូងមុខសញ្ញានេះ ប៉ុន្តែចៃដន្យកាំភ្លើងរាលកៃផ្ទុះ១គ្រាប់ ត្រូវចំខ្នងចំហៀងខាងឆ្វេងឈ្មោះ នាង មករា ភេទប្រុស អាយុ ២១ឆ្នាំ រស់នៅភូមិនិមិត្ត១ សង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ និងត្រូវបញ្ជូនទៅសង្គ្រោះនៅមន្ទីរពេទ្យស្រុកមង្គលបូរី(ពុំមានគ្រោះថ្នាក់ដល់ជីវិតនោះទេ) ។ ដោយឡែកជនសង្ស័យចំនួន៣នាក់ទៀតបានរត់គេចខ្លួន ។ ក្រោយមកជំនាញបានកំណត់ មុខសញ្ញា និងបានកោះហៅជនទាំង០៣នាក់នោះ មានឈ្មោះ កែម ឆៃយ៉ា ភេទប្រុស អាយុ ១៦ឆ្នាំ ឈ្មោះ ហួន រដ្ឋា ហៅ ខួច ភេទប្រុស អាយុ១៦ឆ្នាំ និងឈ្មោះ ម៉ាប់ នីត ភេទប្រុស អាយុ១៨ឆ្នាំ រស់នៅភូមិនិមិត្ត១ សង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ មកធ្វើការសាកសួរ និងបានយកទឹកនោមទៅពិនិត្យរកសារធាតុញៀន លទ្ធផលគឺវិជ្ជមាន ។ អនុវត្តតាមមតិណែនាំរបស់ព្រះរាជអាជ្ញាអមសាលាដំបូងខេត្ត សមត្ថកិច្ចជំនាញបានកសាងសំណុំរឿងចាត់ការតាមនីតិវិធី។
៣-ដោយឡែក នៅថ្ងៃទី១ ខែកញ្ញា ឆ្នាំ២០២០ ស្នងការដ្ឋាននគរបាលខេត្តបន្ទាយមានជ័យ បានកសាងសំណុំរឿងលើករណីលោកអនុសេនីយ៍ទោ ប្ញទ្ធី ពិសិដ្ឋ បញ្ជូនទៅសាលាដំបូងខេត្ត ដើម្បីចាត់ការតាមនីតិវិធីច្បាប់ផងដែរ។
៤-ស្នងការដ្ឋាននគរបាលខេត្តបន្ទាយមានជ័យ សូមថ្លែងអំណរគុណចំពោះសាធារណជន អ្នកសារព័ត៌មាន និងបណ្តាញទំនាក់ទំនងសង្គម ដែលបានចូលរួមចំណែកក្នុងការរក្សាសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម ។ យើងខ្ញុំសូមអំពាវនាវដល់មហាជនគ្រប់និន្នាការ សូមមេត្តាកុំធ្វើការសន្និដ្ឋានវាយតម្លៃរឿងហេតុដោយពុំមានព័ត៌មានពេញលេញ ទុកអោយស្ថាប័នមានសមត្ថកិច្ចចាត់ការតាមនីតិវិធី ចៀសវាងការសន្និដ្ឋានវាយតម្លៃនោះប៉ះពាល់ដល់កិត្តិយស និងសេចក្តីថ្លៃថ្នូររបស់បុគ្គលឬស្ថាប័នអនុវត្តច្បាប់ និងអាចប្រឈមចំពោះមុខច្បាប់ជាធរមាន៕ ដោយ៖កូឡាប