ភ្នំពេញ៖ នគរបាលសហព័ន្ធអូស្ត្រាលី និងអគ្គនាយកដ្ឋាន អន្តោប្រវេសន៍កម្ពុជា នឹងនៅតែបន្តកិច្ចសហប្រតិបត្តិល្អ ក្នុងការបង្ការ និងទប់ស្កាត់បទល្មើសឧក្រិដ្ឋកម្មឆ្លងដែននានា ដែលមានដូចជាអំពើជួញដូរគ្រឿងញៀនខុសច្បាប់គ្រប់រូបភាព អំពើជួញដូរមនុស្ស និងអំពើរត់ពន្ធមនុស្សជាដើម ដោយទទួលបានជោគជ័យជាបន្តបន្ទាប់។
នៅរសៀល ថ្ងៃទី២ ខែកញ្ញា ឆ្នាំ២០២០ ឯកឧត្តម នាយឧត្តមសេនីយ៍ គៀត ច័ន្ទថារិទ្ធ អគ្គនាយកអន្តោប្រវេសន៍ បានទទួលជួបពិភាក្សាការងារជាមួយលោក ANTHONY MAGUIRE នាយនគរបាលជាន់ខ្ពស់ នៃនគរបាលសហព័ន្ធអូស្ត្រាលី នាឱកាសដែលលោកទើបតែមកបំពេញភារកិច្ច ក្នុងអាណត្តិការងារថ្មី នៅព្រះរាជាណាចក្រកម្ពុជា។
ឯកឧត្តម នាយឧត្តមសេនីយ៍ គៀត ច័ន្ទថារិទ្ធ អគ្គនាយកអន្តោប្រវេសន៍ បានបង្ហាញក្តីរំពឹងយ៉ាងមុតមាំថា ក្នុងអាណត្តិថ្មីរបស់លោក ANTHONY MAGUIRE នាយនគរបាលជាន់ខ្ពស់ នៃនគរបាលសហព័ន្ធអូស្ត្រាលី កម្ពុជា និងអូស្ត្រាលី នឹងនៅតែបន្តកិច្ចសហប្រតិបត្តិល្អ ក្នុងការបង្ការ និងទប់ស្កាត់បទល្មើសឧក្រិដ្ឋកម្មឆ្លងដែននានា ដែលមានដូចជាអំពើជួញដូរគ្រឿងញៀនខុសច្បាប់គ្រប់រូបភាព អំពើជួញដូរមនុស្ស និងអំពើរត់ពន្ធមនុស្សជាដើម ដោយទទួលបានជោគជ័យជាបន្តបន្ទាប់។
ឆ្លៀតក្នុងឱកាសនៃជំនួបពិភាក្សានេះផងដែរ ឯកឧត្តម នាយឧត្តមសេនីយ៍ គៀត ច័ន្ទថារិទ្ធ អគ្គនាយកអន្តោប្រវេសន៍ បានថ្លែងអំណរគុណ ជូនចំពោះរដ្ឋាភិបាលអូស្ត្រាលី តាមរយ:ស្ថានទូតអូស្ត្រាលី និងនគរបាលសហព័ន្ធអូស្ត្រាលី ដែលតែងតែយកចិត្តទុកដាក់ផ្តល់ជាជំនួយបច្ចេកទេស និងការបណ្តុះបណ្តាលជំនាញពាក់ព័ន្ធនានា ដល់មន្ត្រីអន្តោប្រវេសន៍កម្ពុជា នាបណ្តាឆ្នាំកន្លងមក ក្នុងភាពជាដៃគូកិច្ចសហប្រតិបត្តិការ លើការងារអន្តោប្រវេសន៍។
ជាមួយគ្នានេះផងដែរ លោក ANTHONY MAGUIRE នាយនគរបាលជាន់ខ្ពស់ នៃនគរបាលសហព័ន្ធអូស្ត្រាលី ក៏បានថ្លែងអំណរគុណអគ្គនាយកដ្ឋានអន្តោប្រវេសន៍ ដែលបានផ្តល់នូវកិច្ចសហប្រតិបត្តិការល្អនាពេលកន្លងមក តាមរយ:កិច្ចសហប្រតិបត្តិការត្រីភាគី ដែលឱ្យឈ្មោះ Strikeforce Dragon សំដៅបង្ការ និងទប់ស្កាត់បទល្មើសឧក្រិដ្ឋកម្មឆ្លងដែននានា ដែលអាចបង្កហានិភ័យដល់សន្តិសុខជាតិនៃប្រទេសទាំងពីរ៕ ដោយ៖កូឡាប