ភ្នំពេញ៖ ឯកឧត្តមទេសរដ្ឋមន្ត្រី ឱម យ៉ិនទៀង ប្រធានអង្គភាពប្រឆាំងអំពើពុករលួយ (ACU) បានចេញលិខិតមួយច្បាប់ជូនទៅ លោក គាត ហ៊ុល អភិបាលក្រុងប៉ោយប៉ែត ខេត្តបន្ទាយមានជ័យ ក្នុងកម្មវត្ថុសុំការបំភ្លឺពាក់ព័ន្ធនឹងប្រវត្តិដីទំនាស់ ១១៣ហិកតា របស់ប្រជាពលរដ្ឋ ៥១គ្រួសារ នៅចំណុចអូរស្វារអិល ភូមិសូរិយា សង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ។
លិខិតរបស់ឯកឧត្តមទេសរដ្ឋមន្ត្រី ឱម យ៉ិនទៀង បានផ្ញើទៅអភិបាលក្រុងប៉ោយប៉ែត យោងតាមពាក្យប្តឹងដែលអង្គភាពប្រឆាំងអំពើពុករលួយ ទទួលបាននៅថ្ងៃទី៣១ ខែសីហា ឆ្នាំ២០២០ និងស្មារតីអង្គប្រជុំពិនិត្យពាក្យប្តឹង នៅថ្ងៃទី១ ខែកញ្ញា ឆ្នាំ២០២០។
ប្រធាន ACU បានជម្រាបលោកអភិបាលក្រុងថា អង្គភាពប្រឆាំងអំពើពុករលួយ បានទទួលនិងពិនិត្យ ពាក្យប្តឹងរបស់ប្រជាពលរដ្ឋទាំង ៥១គ្រួសារ នៅចំណុចអូរស្វារអិល ភូមិសូរិយា សង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ ដែលបានឲ្យរៀបរាប់ថា ពួកគាត់មានទំនាស់ដីធ្លីជាមួយឈ្មោះ ទុយ វ៉ាន់នី តំណាងឲ្យប្រជាពលរដ្ឋ ១៤គ្រួសារ។ ដីទំនាស់នោះ ដំបូងឡើយឈ្មោះ ទុយ វ៉ាន់នី បានបញ្ជាក់ច្បាស់ថា ដីរបស់ពួកខ្លួន ១៤គ្រួសារ គឺស្ថិតនៅភូមិអូរឫស្សី ឃុំប៉ោយប៉ែត ប៉ុន្តែក្នុងឆ្នាំ២០១៥ មានការបញ្ជាក់ពីលោកមេភូមិសូរិយា និងចៅសង្កាត់និមិត្តអះអាងថា ដីរបស់ឈ្មោះ ទុយ វ៉ាន់នី តំណាងឲ្យពលរដ្ឋទាំង ១៤គ្រួសារ ស្ថិតនៅភូមិសូរិយា សង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យទៅវិញ។ បើយោងតាមអនុក្រឹត្យលេខ១០២ អនក្រ.បក ចុះថ្ងៃទី៣១ ខែឧសភា ឆ្នាំ២០១១ ស្តីពីការបង្កើតផ្សារកណ្តាល នៃក្រុងប៉ោយប៉ែត បានបង្ហាញថា ភូមិអូរឫស្សី គឺស្ថិតនៅសង្កាត់ផ្សារកណ្តាល ដូចនេះបានន័យថា ទីតាំងភូមិសាស្ត្រ នៃភូមិអូរឫស្សីមិនដែលប្តូរ ឬមិនដែលកាត់ចូលដែនរដ្ឋបាលភូមិសាស្ត្រភូមិសូរិយា សង្កាត់និមិត្ត ក្រុងប៉ោយប៉ែតឡើយ។ តើភូមិអូរឫស្សី ពិតជាភូមិសូរិយាបច្ចុប្បន្នមែនទេ?
លោក ឱម យ៉ិនទៀង បានបញ្ជាក់ក្នុងលិខិតនោះថា «អាស្រ័យហេតុនេះ សូមលោកអភិបាលក្រុង បំភ្លឺករណីនេះ និងផ្តល់ឯកសារពាក់ព័ន្ធទៅ អ.ប.ព ឲ្យបានទាន់ពេល ដើម្បីបន្តនីតិវិធី»៕ ដោយ៖កូឡាប