ភ្នំពេញ ៖ ជឿជាក់ថា បងប្អូនប្រិយមិត្តជាច្រើន ប្រាកដជាបានស្គាល់ហើយ ពីសមត្ថភាពដ៏អស្ចារ្យរបស់ព្រះនាងតូច នរោត្តម ជេនណា ដែលមានទេពកោសល្យសិល្បៈដ៏មិននឹកស្មាន ទាំងការសម្តែង និងការបកស្រាយបទចម្រៀងជាដើម…។
ពិតមែនហើយ ក្រោយពីទទួលបានការគាំទ្រ និងកោតសរសើរជាខ្លាំង ព្រះនាងតូច ជេនណា ដែលជាព្រះចៅព្រះមហាក្សត្រមួយដួង ពុំត្រឹមតែមានរូបសម្រស់ដ៏ស្រស់សោភា និងដុងសិល្បៈនោះ ថ្មីៗនេះ ព្រះនាងតូចបានធ្វើឲ្យមជ្ឈដ្ឋានមហាជនទូទៅកោតសរសើរយ៉ាងខ្លាំង បន្ទាប់ពីបានឃើញព្រះនាងតូចចូលរួមសម្តែងនៅក្នុងខ្សែភាពយន្តខ្មែរដ៏ជក់ចិត្តដិតអារម្មណ៍ គឺរឿង «ទេពធីតា ព្ពុលមាស»។
យ៉ាងណាមិញ ក្រោយពីបានមើលឃើញភាពល្បីល្បាញ និងសន្ទុះគាំទ្រដ៏ច្រើនលប់ ពីសំណាក់ប្រជាពលរដ្ឋខ្មែរស្ទើរគ្រប់មជ្ឈដ្ឋាន ព្រះនាងតូច ជេនណា ក៏ទទួលបានមហាកិត្តិយសដ៏មិននឹកស្មានមួយ ដោយផលិតកម្មភាពយន្តកូរ៉េមួយ បានអញ្ញើញព្រះនាងតូចថតសម្តែង។
ក្នុងនោះផងដែរ តាមរយៈទំព័រហ្វេសប៊ុក KR Arts Cambodia បានបង្ហោះរូបភាប១សន្លឹក អមដោយសាររៀបរាប់ថា៖ «KR ARTS CAMBODIA ពិតជាសម្តែងនូវការគាំទ្រយ៉ាងខ្លាំង ចំពោះវត្តមានរបស់ព្រះនាងតូច ជេនណា ដែលបានចូលរួមសម្តែងនៅក្នុងខ្សែភាពយន្តកូរ៉េ-កម្ពុជា»។
ជាមួយគ្នានេះ អ្នកប្រើប្រាស់បណ្តាញសង្គមជាច្រើន បានសម្តែងក្តីរំភើបរីករាយយ៉ាងខ្លាំង ក្រោយពីបានឮបែបនេះ និងជូនពរព្រះនាងតូច ទទួលបានការគាំទ្រយ៉ាងច្រើនៗ ដូចដែលព្រះនាងតូចសម្តែងនៅក្នុងរឿងភាគបុរាណខ្មែរ «ទេពធីតា ព្ពុលមាស» អ៊ីចឹង។
គួរបញ្ជាក់ឲ្យដឹងផងដែរថា អ្នកអង្គម្ចាស់តូច នរោត្តម ជេនណា ប្រសូតនៅថ្ងៃទី១១ ខែមីនា ឆ្នាំ២០១១ នៅឯទីក្រុងប៉ារីស ប្រទេសបារាំង។ ទ្រង់បានយាងមករស់នៅទឹកកម្ពុជាវិញបាន ៦ ឆ្នាំកន្លងទៅហើយ បច្ចុប្បន្នទ្រង់ទើបមានព្រះជន្ម ៩ ព្រះវស្សា តែប៉ុណ្ណោះ។ ទ្រង់ជាបុត្រីទីពីររបស់អ្នកអង្គម្ចាស់នរោត្តមបុប្ផារី និងជាព្រះរាជនត្តារបស់សម្តេចព្រះមហិស្សរា នរោត្តមចក្រពង្ស៕ ដោយ៖ លឹម ហុង
