ភ្នំពេញ៖ ព្រះករុណា ព្រះបាទ សម្តេចព្រះ បរមនាថ នរោត្តម សីហមុនី ព្រះមហាក្សត្រនៃកម្ពុជា នៅថ្ងៃព្រហស្បតិ៍ ទី៣ ខែកញ្ញា ឆ្នាំ២០២០នេះ បានចេញព្រះរាជក្រឹត្យផ្តល់នីតិសម្បទាធ្វើនយោបាយជាថ្មី ដល់លោក សុន ឆ័យ, លោក តាវ គឹមឈន, និងលោក វ៉ា សាម៉ុននៃអតីតគណបក្សសង្គ្រោះជាតិ (CNRP) ដែលត្រូវបានហាមឃាត់មិនឲ្យធ្វើសកម្មភាពនយោបាយសម្រាប់រយៈពេល៥ឆ្នាំ កាលពីខែវិច្ឆិកា ឆ្នាំ២០១៧កន្លងទៅ តាមអំណាចសាលដីការរបស់តុលាការកំពូល។
ការទទួលបាននីតិសម្បទា ដើម្បីធ្វើនយោបាយឡើងវិញនេះ បន្ទាប់ពីអតីតតំណាងរាស្ត្រ និងអតីតមន្ត្រីជាន់ខ្ពស់ នៃអតីតគណបក្សសង្គ្រោះជាតិ (CNRP) ចំនួន៣រូបនោះបានដាក់លិខិតទៅសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដើម្បីស្នើសុំលើកបម្រាមសិទ្ធិនយោបាយ ដើម្បីផ្តល់នីតិសម្បទាឡើងវិញ កាលពីថ្ងៃទី២៧ ខែសីហា ឆ្នាំ២០២០ ។
អតីតមន្ត្រីតគណបក្សប្រឆាំងទាំងនោះរួមមាន ទី១, លោក សុន ឆ័យ អតីតអ្នកតំណាងរាស្ត្រមណ្ឌល ភ្នំពេញ និងជាសមាជិកគណៈកម្មាធិការអចិន្ត្រៃយ៍ អតីតគណបក្សសង្គ្រោះជាតិ ទី២, លោក វ៉ា សាម៉ុន អតីតសមាជិកក្រុមការងារ អតីតគណបក្សសង្គ្រោះជាតិ ខេត្តកំពង់ចាម និងជាសមាជិកគណៈកម្មាធិការនាយក អតីតគណបក្សសង្គ្រោះជាតិ និងទី៣, លោក តាវ គឹមឈន អតីតសមាជិកក្រុមការងារ ខេត្តកំពង់ចាម និងជាសមាជិកគណៈកម្មាធិការនាយក អតីតគណបក្សសង្គ្រោះជាតិ។
គួររំលឹកដែរថា កាលពីថ្ងៃទី២៧ ខែសីហា ឆ្នាំ២០២០កន្លងទៅនេះ លោក សុន ឆ័យ, លោក តាវ គឹមឈន និងលោក វ៉ា សាម៉ុន បានសរសេរលិខិត ដាច់ដោយឡែកពីគ្នាគោរពជូន សម្តេចក្រឡាហោ ម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដើម្បីស្នើសុំនីតិសម្បាទា ធ្វើនយោបាយឡើងវិញ។
នៅក្នុងលិខិតមន្ត្រីទាំង៣រូប ដែលបានជម្រាបជូនសម្តេចក្រឡាហោម ស ខេង បានលើកឡើងប្រហាក់ប្រហែលគ្នាថា រូបខ្លួនទាំង៣នាក់ ដែលកំពុងស្ថិតនៅក្នុងការហាមឃាត់មិនឲ្យធ្វើសកម្មភាពនយោបាយ សម្រាប់រយៈពេល៥ឆ្នាំ តាមអំណាចសាលដីកាលេខ៣៤០(ឆ) ករណីគណបក្សសង្គ្រោះជាតិ ចុះថ្ងៃទី១៦ ខែវិច្ឆិកា ឆ្នាំ២០១៧ របស់តុលាការកំពូល។ ដោយផ្អែកតាមមាត្រា៤៥ថ្មី(ស្ទួនមួយ) នៃច្បាប់ស្តីពីគណបក្សនយោបាយ ដែលបង្កលក្ខណៈឲ្យអ្នកដែលត្រូវបានឃាមឃាត់មិនឲ្យធ្វើ សកម្មភាពនយោបាយ អាចទទួលបាន នីតិសម្បទា ធ្វើនយោបាយឡើងវិញ។ ដូចនេះ សូមស្នើសុំសម្តេចក្រឡាហោម ឧបនាយករដ្ឋមន្ត្រី មេត្តាពិនិត្យតាមនីតិវិធី ដើម្បីផ្តល់នីតិសម្បទាធ្វើនយោបាយឡើងវិញដល់ពួកខ្លួនដោយក្តីអនុគ្រោះ។
សូមបញ្ជាក់ដែរថា ដើម្បីបាននីតិសម្បទាក្នុងការធ្វើនយោបាយឡើងវិញនោះ អ្នកនយោបាយដែលជាប់បម្រាមតុលាការក្នុងការធ្វើនយោបាយ ត្រូវស្នើលិខិតទៅក្រសួងមហាផ្ទៃ ដើម្បីក្រសួងធ្វើការពិនិត្យក្នុងដាក់សំណើបន្តទៅកាន់នាយករដ្ឋមន្ត្រី ដើម្បីពិចារណាធ្វើលិខិតទូលថ្វាយព្រះមហាក្សត្រ ក្នុងការផ្តល់នីតិសម្បទានយោបាយឡើងវិញ៕
ដោយ៖កូឡាប
