ស្ទឹងត្រែង៖ សាលាដំបូងខេត្តស្ទឹងត្រែង សម្រេចចោទប្រកាន់ពីបទគំរាមកំហែងកេរ្តិ៍ ដាក់ឃុំខ្លួនក្នុងពន្ធនាគារ រង់ចាំការស៊ើបអង្កេតជាបន្តទៀត កាលពីថ្ងៃទី៣ ខែកញ្ញា ឆ្នាំ ២០២០។ ជនជាប់ចោទខាងលើនេះ បានប្រើរូបភាពគំរាមទារប្រាក់ទៅលើនារីម្នាក់ ដែលជាសង្សារ ដោយលួចលាក់អស់រយៈពេលជាច្រើនឆ្នាំ។ បុរសនេះបានប្រើរូបភាពគំរាមបញ្ចេញវីដេអូរួមភេទ ទារប្រាក់ចំនួន ១០លានរៀល ពីនារីជាដៃគូសង្សារនឹងគ្នា។
សូមបញ្ជាក់ថា ជនជាប់ចោទឈ្មោះចាន់ ភ័ត្រា អាយុ២៤ឆ្នាំ មានស្រុកកំណើតភូមិក្រោម ឃុំព្រះរំកិល ស្រុកថាឡាបរិវ៉ាត់
បច្ចុប្បន្នរស់នៅភូមិលើ ឃុំថាឡា ស្រុកថាឡាបរិវ៉ាត់ ត្រូវបានសមត្ថកិច្ចនគរបាលព្រហ្មទណ្ឌកំរិតស្រាល នៃស្នងការដ្ឋានខេត្តស្ទឹងត្រែង ធ្វើការឃាត់ខ្លួនកាលពីថ្ងៃទី ១ ខែកញ្ញា ឆ្នាំ ២០២០។
សមត្ថកិច្ច បានបន្តថា ក្រោយពីជនជាប់ចោទខាងលើនេះ បានប្រើរូបភាពគំរាមទារប្រាក់ ទៅលើនារីម្នាក់ដែលជាសង្សារ ដោយលួចលាក់អស់រយៈពេលជាច្រើនឆ្នាំ។ បុរសនេះបានប្រើរូបភាពគំរាមបញ្ចេញវីដេអូរួមភេទទារប្រាក់ចំនួន ១០លានរៀលពីនារីជាដៃគូសង្សារនឹងគ្នា។ ក៏ប៉ុន្តែនារីដែលជាសង្សារ បានដាក់ពាក្យបណ្ដឹងទៅសមត្ថកិច្ច ដើម្បីធ្វើការចោទប្រកាន់ទៅលើបុរសជាសង្សាររបស់ខ្លួន កាលពីថ្ងៃទី ២៥ ខែសីហា ឆ្នាំ ២០២០។
ក្រោយពីនារីរងគ្រោះបានដាក់ពាក្យបណ្ដឹងរួចមក កងកម្លាំងនគរបាលខេត្ត ក៏បានស៊ើបអង្កេត និងប្រើនីតិវិធីដើម្បីចាប់ខ្លួនបុរសរូបនោះ។ បន្ទាប់ពីឃាត់ខ្លួនរួចហើយ ក៏ត្រូវបានបញ្ជូនទៅកាន់សាលាដំបូងខេត្ត ដើម្បីចាត់ការបន្ត។
នៅថ្ងៃទី ៣ ខែកញ្ញា ឆ្នាំ២០២០ ចៅក្រមស៊ើបសួរសាលាដំបូងខេត្តស្ទឹងត្រែង បានសម្រេចចោទប្រកាន់ឈ្មោះចាន់ ភ័ត្រា ពីបទគំរាមកំហែងកេរ្តិ៍ ប្រព្រឹត្តនៅភូមិស្រែពោធិ៍ សង្កាត់ស្រះឫស្សី ក្រុងស្ទឹងត្រែង។
លោក អួង វុទ្ធា ចៅក្រមស៊ើបសួរ នៃសាលាដំបូងខេត្តស្ទឹងត្រែង បានសម្រេចចោទប្រកាន់ជនត្រូវចោទឈ្មោះ ចាន់ ភ័ត្រា ពីបទ គំរាមកំហែងហែកកេរ្តិ៍ ៕ ដោយ៖សុខុម
