ភ្នំពេញ ៖ សារមន្ទីរឧក្រិដ្ឋកម្មប្រល័យពូជសាសន៍ទួលស្លែង បានទទួលរង្វាន់ JIKJI នៃស្មារតីចងចាំពិភពលោកឆ្នាំ២០២០ របស់អង្គការយូណេស្កូ ។ JIKII ជារង្វាន់ដែលបានបង្កើត ដើម្បីរំថោកដល់ខួបនៃការចុះបញ្ជីសៀវភៅ Buljo Jikj Sinche Yojecl ជាឯកសារបោះចេញពីពុម្ពអក្សរលោហៈផ្តុំគ្នាដែល នៅសល់ចាស់ជាងគេលើពិភពលោក នាវឡុងពេលនៃកិច្ចប្រជុំប្រតិបត្តិរបស់អង្គការយូណេស្កូកាលពីខែមេសា ឆ្នាំ២០០៤។ គោលបំណងនៃការបង្កើតកម្មវិធីនេះឡើង គឺដើម្បីចូលរួមលើកស្ទួយ និងលើកទឹកចិត្តដល់បុគ្គល ឬស្ថាប័នដែលបានខិតខំ គាំពារនិងថែរក្សាមរតកឯកសារដោយផ្តោតលើទិសដៅអប់រំបណ្តុះបណ្តាល ការផ្សព្វផ្សាយ និងការចែករំលែកចំណេះដឹងដល់ ប្រជាពលរដ្ឋគ្រប់ជាតិសាសន៍និងគ្រប់វ័យ។
យោងតាមសេចក្ដីជូនដំណឹងរបស់ក្រសួងវប្បធម៌ និងវិចិត្រសិល្បៈ នាថ្ងៃទី៤ ខែកញ្ញា ឆ្នាំ២០២០ បានឱ្យដឹងថា កាលពីថ្ងៃទី១៧ ខែសីហា ឆ្នាំ២០២០ អង្គការយូណេស្កូ ដែលមានមូលដ្ឋាននៅទីក្រុងប៉ារីស បានសម្រេចផ្តល់រង្វាន់ JIKJI នៃស្មារតីចងចាំពិភពលោក របស់អង្គការយូណេស្កូឆ្នាំ២០២០ ដល់សារមន្ទីរឧក្រិដ្ឋកម្មប្រល័យពូជសាសន៍ទួលស្លែង ទៅលើសមិទ្ធផល នៃការខិតខំប្រឹងប្រែងអភិរក្សឯកសារ និងបណ្ណសាររូបថត ជាមរតកឯកសារប្រវត្តិសាស្ត្រដ៏សំខាន់សម្រាប់មនុស្សជាតិ។
សេចក្ដីជូនដំណឹងបានបន្តថា ការសម្រេចផ្ដល់រង្វាន់ដល់គុកទួលស្លែង គឺធ្វើឡើងយ៉ាងហ្មត់ចត់បំផុត ពីគណៈកម្មាធិការវាយតម្លៃ ដែលជ្រើសចេញពីគណៈកម្មាធិការទីប្រឹក្សាអន្តរជាតិ នៃស្មារតីចងចាំពិភពលោករបស់អង្គការយូណេស្កូ។
ក្រសួងវប្បធម៌ និងវិចិត្រសិល្បៈបានបញ្ជាក់ផងដែរថា ពានរង្វាន់នៃ JIKJI នៃស្មារតីចងចាំពិភពលោករបស់អង្គការយូណេស្កូនេះ ជារង្វាន់បង្កើតឡើងដើម្បីរំលឹកដល់ខួបនៃការចុះបញ្ជីសៀវភៅ Butjo JiKji Sinche YoJeol ដែលបោះពុម្ពចេញពីអក្សរលោហៈផ្គុំគ្នា នៅសល់ចាស់ជាងគេលើពិភពលោក នាអំឡុងពេលនៃកិច្ចប្រជុំប្រតិបត្តិរបស់អង្គការយូណេស្កូ កាលពីខែមេសា ឆ្នាំ២០០៤។ គោលបំណង នៃការបង្កើតកម្មវិធីនេះឡើង ដើម្បីចូលរួមលើកស្ទួយ និងលើកទឹកចិត្តដល់បុគ្គល ឬស្ថាប័ន ដែលបានខិតខំគាំពារ ថែរក្សាមរតកឯកសារ ដោយផ្ដោតលើទិសដៅអប់រំបណ្ដុះបណ្ដាលការផ្សព្វផ្សាយ និងការចែករំលែកចំណេះដឹងដល់ប្រជាពលរដ្ឋគ្រប់ជាតិសាសន៍ និងគ្រប់វ័យ។ រង្វាន់ JIKJI នៃស្មារតីចងចាំពិភពលោករបស់អង្គការយូណេស្កូ បានផ្ដល់ជូនបុគ្គលិកសាធារណៈជារៀងរាល់ ២ឆ្នាំម្ដង។
សារមន្ទីរឧក្រិដ្ឋកម្មប្រល័យពូជសាសន៍ទួលស្លែង នៃព្រះរាជាណាចក្រកម្ពុជា ជាស្ថាប័នទី៨ ដែលទទួលបានរង្វាន់ប្រចាំឆ្នាំ២០២០។ មូលដ្ឋានសំខាន់ក្នុងការផ្ដល់រង្វាន់ គឺផ្ដោតទៅលើការថែរក្សាអភិរក្សឯកសារបណ្ណសាររូបថត និងការរៀបចំប្រព័ន្ធទិន្នន័យរួមមួយដែលផ្ដល់ភាពងាយស្រួលដល់សាធារណជន ក្នុងការស្វែងរកឯកសារ។ ការផ្ដល់រង្វាន់នេះ ជាសក្ខីភាពមួយបង្ហាញពីស្មារតី នៃការខិតខំប្រឹងប្រែងរបស់រាជរដ្ឋាភិបាល និងប្រជាជនកម្ពុជា សហការជាមួយដៃគូអន្តរជាតិនានា ក្នុងការថែរក្សាឯកសារទុកជាភស្តុតាងសម្រាប់មនុស្សជាតិទាំងមូលសិក្សារៀនសូត្រ ដើម្បីការពារកុំឱ្យអំពើប្រល័យពូជសាសន៍កើតឡើងសាជាថ្មីក្នុងប្រទេសកម្ពុជា និងពិភពលោក៕ដោយ៖បញ្ញាស័ក្តិ