ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានមានប្រសាសន៍ថា៖
១- រាជរដ្ឋាភិបាល បានសម្រេចបញ្ចេញកញ្ចប់ថវិកាចំនួនពី១០០លានដុល្លារអាម៉េរិក ទៅ ១៥០លានដុល្លារអាម៉េរិក សម្រាប់គម្រោងសាងសង់ផ្លូវចំនួន៣៨ខ្សែក្នុងទីរួមខេត្តសៀមរាប ដើម្បីជួយ កែលម្អហេដ្ឋារចនាសម្ព័ន្ធទីក្រុងសៀមរាប បង្កើតការងារនិងលើកស្ទួយជីវភាពប្រជាពលរដ្ឋ ជំរុញកំណើន ភ្ញៀវទេសចរនិងកំណើនសេដ្ឋកិច្ចជាតិក្រោយវិបត្តិជំងឺកូវីដ-១៩។ សម្តេចតេជោនាយករដ្ឋមន្ត្រី បាន សង្កត់ធ្ងន់ថា គម្រោងកែលម្អហេដ្ឋារចនាសម្ព័ន្ធផ្លូវក្នុងទីរួមខេត្តសៀមរាបនេះ នឹងត្រូវបញ្ចប់នៅចុងឆ្នាំ២០២១ ហើយនឹងធ្វើឱ្យភ្ញៀវទេសចរកាន់តែមានមោទនភាពចំពោះសម្បត្តិបេតិកភណ្ឌវប្បធម៌ប្រវត្តិសាស្ត្ររបស់ កម្ពុជាដែលស្ថិតក្នុងទឹកដីអច្ឆរិយៈនេះ ព្រមទាំងមានមោទនភាពចំពោះការអភិវឌ្ឍហេដ្ឋារចនាសម្ព័ន្ធរូបវន្ត នៅក្នុងទីរួមខេត្តសៀមរាបផងដែរ ។
២- រាជរដ្ឋាភិបាល សូមថ្លែងអំណរគុណដល់គ្រប់ក្រសួងស្ថាប័ននិងរដ្ឋបាលថ្នាក់ក្រោមជាតិ ដែលបានខិតខំសន្សំសំចៃ មិនខ្ជះខ្ជាយថវិកា ក្នុងដំណាក់កាលនៃការឆ្លងរាលដាលជំងឺកូវីដ-១៩ ដែលធ្វើឱ្យកម្ពុជាសន្សំថវិកាបានជាង៦០០លានដុល្លារអាម៉េរិក ដើម្បីប្រើប្រាស់បន្ថែមក្នុងការអភិវឌ្ឍប្រទេសជាតិ។
៣- កម្ពុជាត្រូវអភិវឌ្ឍសេដ្ឋកិច្ចខ្លួនឱ្យដើរទាន់សភាពការណ៍ តាមរយៈជំរុញការអនុវត្តកិច្ច ព្រមព្រៀងពាណិជ្ជកម្មទ្វេភាគីឬពហុភាគី និងត្រូវខិតខំនាំចេញទំនិញដែលផលិត បានទៅកាន់ទីផ្សារទាំងនោះព្រមទាំងបន្តចរចា និងឈានទៅចុះកិច្ចព្រមព្រៀងពាណិជ្ជកម្មជាមួយដៃគូថ្មីៗទៀត ដើម្បីលើកកម្ពស់ទំនាក់ទំនងសេដ្ឋកិច្ច និងនយោបាយរបស់ព្រះរាជាណាចក្រកម្ពុជា។
៤- ក្នុងដំណាក់កាលបច្ចុប្បន្ននៃវិបត្តិជំងឺកូវីដ-១៩ កម្ពុជាត្រូវបង្កើនឧត្តមភាពប្រកួតប្រជែងក្នុង ការជំរុញការនាំចេញស្បៀង ពិសេសការនាំចេញអង្ករទៅកាន់ទីផ្សារបរទេស នូវអតិរេកស្រូវអង្ករប្រចាំឆ្នាំ ដែលកម្ពុជាសម្រេចបាន។
៥- ក្នុងឱកាសពិធីបុណ្យកាន់បិណ្ឌ និងភ្ជុំបិណ្ឌខាងមុខនេះ សម្តេចតេជោនាយករដ្ឋមន្ត្រី ណែនាំដល់ក្រសួងស្ថាប័ន កងកម្លាំងមានសមត្ថកិច្ចគ្រប់ផ្នែកពាក់ព័ន្ធ និងរដ្ឋបាលថ្នាក់ក្រោមជាតិ ត្រូវខិតខំ ធានាការពារសន្តិសុខ សណ្តាប់ធ្នាប់សាធារណៈ ឱ្យបានល្អប្រសើរជូនប្រជាពលរដ្ឋ និងត្រូវបន្តជំរុញការ ផ្សព្វផ្សាយសេចក្តីណែនាំរបស់ក្រសួងស្ថាប័នពាក់ព័ន្ធ ស្តីពីវិធានការការពារការឆ្លងជំងឺកូវីដ-១៩។
៦- ក្នុងឱកាសពិធីបុណ្យកាន់បិណ្ឌ និងភ្ជុំបិណ្ឌខាងមុខនេះ សម្តេចតេជោនាយករដ្ឋមន្ត្រី បាន ជូនពរដល់មន្ត្រីរាជការគ្រប់លំដាប់ថ្នាក់ កងកម្លាំងប្រដាប់អាវុធ វិស័យឯកជន និងជនរួមជាតិខ្មែរគ្រប់រូប ដែលកំពុងរស់នៅក្នុងនិងក្រៅប្រទេស សូមទទួលបាននូវជោគជ័យ សិរីសួស្តី ជ័យមង្គល វិបុលសុខ និង ការពារកុំឱ្យមានការឆ្លងរាលដាលជំងឺកូវីដ -១៩ ជារៀងដរាបតទៅ៕ដោយ៖កូឡាប