ខេត្តបាត់ដំបង ៖ មន្ទីររ៉ែនិងថាមពលខេត្តបាត់ដំបង សហការជាមួយអាជ្ញាធរស្រុកបាណន់ បានចុះពិនិត្យ និងធ្វើការបញ្ឈប់សកម្មភាពគ្រឿងចក្រ ដែលក្រុមឈ្មួញលួចដាក់ជីកកាយទន្ទ្រានយកល្បាយដីភ្នំ ដោយគ្មានច្បាប់អនុញ្ញាត គ្មានអាជ្ញាប័ណ្ណនៅស្រុកបាណន់។
លោក ហ៊ឺ ដាវី អនុប្រធានមន្ទីររ៉ែនិងថាមពលខេត្តបាត់ដំបង បានឲ្យដឹងថា នៅក្នុងកិច្ចចុះប្រតិបត្តិការនេះ ធ្វើឡើងកាលពីរសៀលថ្ងៃទី៣ ខែកញ្ញា ឆ្នាំ២០២០ នៅចំណុចភូមិដូង ឃុំឈើទាល ស្រុកបាណន់ ខេត្តបាត់ដំបង បន្ទាប់ពីមន្ត្រីជំនាញចុះពិនិត្យឃើញថា ក្រុមហ៊ុនមួយនេះ បានលួចលាក់កាយទន្ទ្រានយកល្បាយដីភ្នំ (ដីក្រហម) ដោយគ្មានអាជ្ញាប័ណ្ណ។
លោកបន្តថា ប្រតិបត្តិការបង្ក្រាប់បទល្មើសជាក់ស្តែង មន្ត្រីជំនាញបានធ្វើការដកហូត អេស្កាវ៉ាទ័រ ចំនួន១គ្រឿង និងរថយន្តដឹកដី ចំណុះ២២ម៉ែត្រគូបចំនួន១គ្រឿង មានឈ្មោះ យឿន សំណាង ជាតំណាងក្រុមហ៊ុនគ្រឿងចក្រខាងលើ៕ដោយ៖បញ្ញាស័ក្តិ
