ខេត្តព្រះសីហនុ ៖ កម្លាំងជំនាញកងរាជអាវុធខេត្តព្រះសីហនុ បានឃាត់ខ្លួនជនសង្ស័យជនជាតិចិនចំនួន២នាក់ ពាក់ព័ន្ធបទល្មើសជួញដូរ រក្សាទុកដោយខុសច្បាប់ នូវសារធាតុញៀន និងដកហូតបានវត្ថុតាងសារធាតុញៀនច្រើនមុខ ដែលបង្ក្រាបបាន នៅក្រុម៦ ភូមិ៣ សង្កាត់លេខ៤ ក្រុងព្រះសីហនុ កាលពីថ្ងៃទី៣ ខែកញ្ញា ឆ្នាំ២០២០ ។
សង្ស័យជនជាតិចិនចំនួន២នាក់ រួមមាន៖ ទី១. ឈ្មោះ សៀវ ឡុង ភេទប្រុស អាយុ៣០ឆ្នាំ ជនជាតិចិន មុខរបរមិនពិតប្រាកដ ស្នាក់នៅបណ្ដោះអាសន្នក្រុម៦ ភូមិ៣ សង្កាត់៤ ក្រុងព្រះសីហនុ។ ទី២. ឈ្មោះ ចាំង អោទី ភេទប្រុស អាយុ២៨ឆ្នាំ ជនជាតិចិន មុខរបរមិនពិតប្រាកដ ស្នាក់នៅបណ្ដោះអាសន្នក្រុម៦ ភូមិ៣ សង្កាត់៤ ក្រុងព្រះសីហនុ។
សមត្ថកិច្ចដកហូតវត្ថុតាងរួមមាន ៖ ម្សៅពណ៌សប្រភេទ ខេ ១៣កញ្ចប់ , ម្សៅសថ្លាចំនួន ៤៣កញ្ចប់ , ថ្នាំគ្រាប់ពណ៌ក្រហមចំនួន៤៩គ្រាប់ , ថ្នាំគ្រាប់ពណ៌ផ្កាឈូកចំនួន ៥១គ្រាប់, ថ្នាំគ្រាប់ពណ៌បៃតងចំនួន ២៩គ្រាប់ , ថ្នាំកញ្ចប់ពណ៌បៃតង និងពណ៌ស្វាយចំនួន ១៦កញ្ចប់ , ទូរស័ព្ទចំនួន ២គ្រឿង , ម៉ូតូចំនួន១គ្រឿង និងសម្ភារពាក់ព័ន្ធមួយចំនួនទៀត។
កម្លាំងការិយាល័យជំនាញកំពុងសាកសួរជនសង្ស័យទាំងពីរនាក់ នៅបញ្ជាការដ្ឋានកងរាជអាវុធហត្ថខេត្តព្រះសីហនុ ដើម្បីបន្តនីតិវិធី បញ្ជូនទៅតុលាការខេត្តផ្តន្ទាទោសតាមច្បាប់ ៕
ដោយ៖បញ្ញាស័ក្តិ