ភ្នំពេញ ៖ ជឿជាក់ថា ប្រិយមិត្តទស្សនិកជាច្រើនបានប្រាកដជាបានស្គាល់រួចហើយ តារាសម្ដែង និងម៉ូដែលចាយរាងសិចស៊ី ហ្វីយ៉ាតា។ កាលពីពេលកន្លងមកនេះ ស្រីស្អាតសម្តីមិនណយរូបនេះ ធ្លាប់បានផ្ទុះជម្លោះដ៏ក្តៅគគុកនៅលើបណ្តាញសង្គម ជាមួយអតីតមិត្តភក្តិរបស់នាង គឺ ពេជ្រ សូលីកា ដោយសារឿងដណ្តើមសង្សារគ្នា ដែល ហ្វីយ៉ាតា ចោទប្រកាន់ សូលីកា ដោយមិននឹកស្មានថាជាមិត្តភក្តិនឹងគ្នាតាំងតូចអស់រយៈពេល ១៣ ឆ្នាំ ចុងក្រោយ បានធ្វើរឿងដ៏មិនចេះអៀនខ្មាសដណ្តើមសង្សារខ្លួន។
ទោះយ៉ាងណា ជម្លោះបរិហារកេរ្តិ៍គ្នារហូតដល់មានការប្តឹងផ្តល់រវាងអ្នកទាំងពីរ ត្រូវបានបញ្ចប់តាមរយៈការដោះស្រាយដោយសន្តិវិធី ។ ហើយក្រោយមក គេក៏ពុំបានឃើញភាគីណា ចេញមកនិយាយដៀមដាមឲ្យអ្នកណាទៀតឡើយ។
យ៉ាងណាមិញ ក្រឡេមកមើលពីជីវិតផ្ទាល់ខ្លួនវិញ តារាស្រីដែលហាក់មិនសូវខ្វល់ខ្វាយកើតទុក្ខនាំសៅហ្មងរូបនេះ គេតែងសង្កេតឃើញបង្ហាញពីជីវិតដ៏ស្រស់ៗស្រាយ ជាមួយសកម្មភាពសប្បាយៗច្រើន បង្ហោះនៅលើណ្តាញសង្គមជារឿយៗ មិនសូវលោះថ្ងៃនោះទេ។
ដោយឡែក ថ្មីៗនេះ ស្រីស្អាត ហ្វី យ៉ាតា បានធ្វើឲ្យហ្វេនៗមានការភ្ញាក់ផ្អើល និងលាន់មាត់សរសើរជាខ្លាំង ក្រោយពីបានឃើញ ហ្វីយ៉ាតា បានចេញបទចម្រៀងមនោសញ្ចេតនាមួយបទពិតជាពិរោះយ៉ាងខ្លាំងតែម្តង ដែលបទចម្រៀងនោះមានចំណងជើងថា៖ «ក្តីស្រម៉ៃ»។
ក្នុងនោះ ហ្វី យ៉ាតា បានភ្ជាប់សារសរសេររៀបរាប់ភ្ជាប់នឹងវីដេអូបទចម្រៀងថ្មីនេះ នៅលើទំព័រហ្វេសប៊ុកខ្លួនផ្ទាល់យ៉ាងដូច្នេះថា៖ «កន្លងមកនេះមិនមានអ្វីជាកាដូសម្រាប់អ្នកទាំងអស់គ្នា ក្រៅពីពាក្យថាអរគុណសម្រាប់ការគាំទ្រនិងស្រឡាញ់ តែពេលនេះខ្ញុំមានចម្រៀងជារបស់ខ្លួនឯងមួយបទជូនទៅអ្នកទាំងអស់គ្នា ស្ដាប់កម្សាន្តអារម្មណ៍លេង ពេលដែលនៅម្នាក់ឯង នៅជាមួយ Crush ឬក៏ពេលដែលនឹកដល់ខ្ញុំ សុំទោសបើសិនជាមានកំហុសខុសឆ្គងហើយក៏សូមអរគុណ សម្រាប់ការគាំទ្រពីមុនរហូតមកដល់ពេលនេះនឹងជារៀងរហូតទៅ ខ្ញុំស្រឡាញ់អ្នកទាំងអស់គ្នា ការគាំទ្ររបស់អ្នកទាំងអស់គ្នាគឺជាចំណែកដ៏ធំដែលធ្វើឲ្យខ្ញុំមានថ្ងៃនេះ»៕ ដោយ៖ លឹម ហុង
