កណ្ដាល ៖ រដ្ឋបាលខេត្តកណ្តាល បានផ្សព្វផ្សាយព័ត៌មានថា នៅថ្ងៃអាទិត្យ ទី៦ ខែកញ្ញា ឆ្នាំ២០២០ ឯកឧត្តម គង់ សោភ័ណ្ឌ អភិបាលខេត្តកណ្ដាល និងឯកឧត្តម ដួង ដារ៉ា ជំនួយការសម្តេចតេជោនាយករដ្ឋមន្ត្រី និងជាអនុរដ្ឋលេខា ធិការទីស្តីការគណៈរដ្ឋមន្ត្រី បានដឹកនាំកិច្ចប្រជុំសម្របសម្រួលដោះស្រាយបញ្ចប់ទំនាស់រវាងភាគីលោកស្រី ស៊ុយ ផូ ជាជីដូន និងភាគីឈ្មោះ ប៊ូ ស្រីទូច ជាចៅលើករណីវិវាទដីទំហំ ១៣ម៉ែត្រ គុណ២០ម៉ែត្រ ស្ថិតនៅទីតាំងដីទំនាស់ ភូមិអញ្ចែងក្រោម ឃុំពុកឫស្សី ស្រុកខ្សាច់ កណ្តាល។
បន្ទាប់ពីពិភាក្សាគ្នា យល់ដឹងអំពីដើមហេតុនៃទំនាស់ និងស្តាប់មតិចូលរួមរបស់ភាគីពាក់ព័ន្ធ អាជ្ញាធរដែនដី និងតំណាងមន្ទីរជំនាញរួចមក ភាគីទាំងសងខាងបានព្រមព្រៀងឯកភាពគ្នាបញ្ចប់ទំនាស់តាមលក្ខខណ្ឌដូចខាងក្រោម៖ ភាគីលោកស្រី ស៊ុយ ផូ បានយល់ព្រមបញ្ចប់ទំនាស់ដោយឯកភាពទទួលយកសំណងចំនួន ៣០.០០០ដុល្លារអាម៉េរិក ដែលជាការឧបត្ថម្ភដ៏ខ្ពង់ខ្ពស់របស់សម្តេចតេជោនាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត ដោយលោកស្រី ស៊ុយ ផូ ព្រមប្រគល់ដីទំហំ១៣ម៉ែត្រ គុណ២០ម៉ែត្រ ស្ថិតនៅភូមិអញ្ចែងក្រោម ឃុំពុកឫស្សី ស្រុកខ្សាច់កណ្តាល ឱ្យទៅភាគីលោកស្រី ប៊ូ ស្រីទូច ដើម្បីរស់ប្រកបរបរចិញ្ចឹមជីវិត។ ភាគីលោកស្រី ប៊ូ ស្រីទូច ឯកភាពទទួលយកដំណោះស្រាយនេះ និងសូមគោរពអរគុណដល់ សម្តេចតេជោនាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត។ ភាគីទាំងសងខាង ឯកភាពឈប់ ប្តឹងគ្នា និងដកពាក្យបណ្តឹងដែលធ្លាប់ដាក់ពាក្យប្តឹងតវ៉ាគ្នាទៅវិញទៅមកនៅគ្រប់ស្ថាប័ន អង្គភាព។ បងប្អូនភាគីទាំងសងខាង ឯកភាពគ្នានៅចំពោះមុខ ឯកឧត្តមអភិបាលខេត្ត និងក្រុមការងារថា នឹងស្រុះស្រួលគ្នាបញ្ឈប់ការឈ្លោះទាស់ទែងគ្នាតទៅមុខទៀត។
ឆ្លៀតក្នុងឱកាសនោះដែរ ឯកឧត្តម គង់ សោភ័ណ្ឌ អភិបាលខេត្តកណ្ដាលបានថ្លែងអំណរអរគុណសន្តិភាព សូមគោរពអរគុណសម្តេចអគ្គស្ថាបនិកសន្តិភាព ដែលជារឿយៗ សម្តេច តែងតែគិតគូរពីសុខទុក្ខប្រជារាស្ត្រជួបការលំបាកខ្វះខាត នេះជាដំណោះស្រាយឈ្នះឈ្នះ ដែលយើងគ្រប់គ្នាត្រូវតែគោរព និងអនុវត្តន៍តាម ហើយក៏សូមអរគុណក្រុមការងារពាក់ព័ន្ធទាំងអស់ អរគុណដល់គូវិវាទទាំងសងខាង ដែលយល់ព្រមអត់ឱន យល់យោគ ឱ្យគ្នាទៅវិញទៅមក លែងប្រកាន់ខឹងគ្នា សាមគ្គីរីកចម្រើន បែកបាក់សាមគ្គីគឺពិបាក ខ្មែរត្រូវតែចេះស្រឡាញ់ខ្មែរ គ្មានទេពាក្យថាចាញ់ គឺឈ្នះទាំងអស់គ្នា៕
ដោយ៖កូឡាប