កំពង់ធំ៖ បុរសម្នាក់ស្រវឹងស្រា និងមានជំងឺសរសៃប្រសាទ បានដុតផ្ទះខ្លួនឯង ឆេះម៉ដ្ឋ។ ហេតុការណ៍បានកើតឡើង កាលពីថ្ងៃទី៦ ខែកញ្ញា ឆ្នាំ២០២០ វេលាម៉ោង១១នឹង៣០នាទី ស្ថិតនៅភូមិ ត្រពាំងអារក្ស ឃុំជ័យ ស្រុកកំពង់ស្វាយ ខេត្តកំពង់ធំ។
យោងតាមរបាយការណ៍ពីសមត្ថកិច្ចមូលដ្ឋានបានឲ្យដឹងថា ម្ចាស់ឈ្មោះ ឡាញ់ ផុន ភេទស្រី អាយុ ៤៩ឆ្នាំ។
ប្រភេទសំណង់ ផ្ទះធ្វើអំពីឈើ ទំហំ៧ម៉ែត្រគុណ៨ម៉ែត្រ ដំបូលប្រក់ក្បឿង ជញ្ជាំងក្តា រនាបក្តា។ ខូចខាតឆេះផ្ទះមួយខ្នងទាំងស្រុង, ប្រាក់រៀលចំនួន ២លានរៀល, ប្រាក់បាតចំនួន៨០០បាត , ខ្សែកមាសចំនួន ២ខ្សែស្មើ ៧ជី, ខ្សែកផ្លាកទីនចំនួន២ខ្សែស្មើ ៩ជី , កងដៃផ្លាកទីនចំនួន១កងស្មើ១ជី, ក្រវិលផ្លាកទីនចំនួន ១គូស្មើ ១ជី, ម៉ូតូចំនួន ១គ្រឿង រទេះគោ (កង់ឡាន)ចំនួន១ អង្ករចំនួន ១បេ ស្រូវចំនួន ៥បេ ធុងទឹកកកធំចំនួន២ ផ្ទាំងសូឡា និងអាគុយចំនួន១ ទូរទស្សន៍ចំនួន១គ្រឿង ទូរស័ព្ទចំនួន២គ្រឿង ឯកសារ និងសម្ភារប្រើប្រាស់ក្នុងផ្ទះមួយចំនួនទៀត។
ប្រភពដដែលបន្តថា មូលហេតុបណ្តាលមកពីឈ្មោះ សោម ចុង អាយុ៤៩ឆ្នាំ ត្រូវជាប្តីផឹកស្រាស្រវឹង មានជំងឺសរសៃប្រសាទដុតផ្ទះខ្លួនឯង។
ករណីខាងលើនេះដែរ ដឹកនាំដោយលោកវរសេនីយ៍ទោ កែ កញ្ចនា អធិការនគរបាលស្រុកកំពង់ស្វាយ បានដឹកនាំកម្លាំងអន្តរាគមន៍ពន្លត់ចំនួន១៩ នាក់ និងនាំយករថយន្តអគ្គិភ័យរបស់អធិការដ្ឋាននគរបាលស្រុក បានចេញអន្តរាគមន៍ចំនួន ១ គ្រឿង ប្រើប្រាស់ទឹកអស់ចំនួន២ រថយន្តស្មើនិង ១២ ម៉ែត្រគុប ទើបរលត់ទាំងស្រុង មិនរាលដាលដល់ផ្ទះអ្នកជិតខាងឡើយ ៕ដោយ៖បញ្ញាស័ក្តិ