កំពត៖ ឯកឧត្តម ឧត្តមសេនីយ៍ឯក ហ៊ុន ម៉ាណែត បានបញ្ជាក់ថា «ការជ្រើសរើសមេបញ្ជាការថ្មី ដើម្បីបន្តដឹកនាំ និងកសាងអង្គភាពក្នុងរយៈកាលមួយទៅមុខទៀត មុននឹងមានការរៀបចំឱ្យមានការបន្តវេនបន្តបន្ទាប់ពីមួយជំនាន់ទៅមួយជំនាន់ គឺជាកិច្ចការសំខាន់ណាស់ ព្រោះអង្គភាពនីមួយៗនឹងមានអត្ថិភាពនៅបន្តរហូត ដើម្បីបំពេញ ភារកិច្ចបម្រើជាតិ និងប្រជាជន។
ឯកឧត្តម ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងទ័ពជើងគោក នៅព្រឹកថ្ងៃទី៧ ខែកញ្ញា ឆ្នាំ២០២០នេះក្នុងឱកាសអញ្ជើញជាអធិបតីក្នុងពិធី ប្រកាសតែងតាំង និងផ្លាស់ប្ដូរមុខតំណែងមេបញ្ជាការតំបន់ប្រតិបត្តិការសឹករងកំពត បានថ្លែងថា ដូច្នេះពីមួយដំណាក់កាលទៅមួយដំណាក់កាល យើងត្រូវរួមគ្នា ធ្វើយ៉ាងណាធានាឱ្យបាននូវនិរន្តរភាពនៃការងារ ដោយរក្សាបាននូវសមិទ្ធផលដែលមេបញ្ជាការ និងថ្នាក់ដឹកនាំមុនបានកសាងកន្លងមក ហើយត្រូវកសាងបន្ថែមបន្ត ដើម្បីរៀបចំជាមូលដ្ឋាន ទុកឱ្យនាយទាហានបន្តវេនក្រោយៗ។ អ្វីដែលសំខាន់ គឺការកសាងពង្រឹងអង្គភាពទាំងផ្នែករឹង រួមមានហេដ្ឋារចនាសម្ព័ន្ធ និងគ្រឿងបំពាក់ និងផ្នែកទន់ រួមមានមូលធនមនុស្ស និងប្រព័ន្ធការងារ»។
ឯកឧត្តមឧត្តមសេនីយ៍ឯក មេបញ្ជាការកងទ័ព ជើងគោកបានសង្កត់ធ្ងន់ថា៖ «ការតែងតាំងមុខតំណែងថ្មី ដែលបានធ្វើឡើងនេះ គឺជាការសម្រេចដោយឈរលើការពិនិត្យ និងវាយតម្លៃ ក៏ដូចជាការពិគ្រោះយោបល់យ៉ាងល្អិតល្អន់របស់ថ្នាក់ដឹកនាំនៃកងយោធពលខេមរភូមិន្ទ តាមឋានានុក្រមច្បាស់លាស់ ស្របនឹងគោលការណ៍ជាធរមាន ធ្វើយ៉ាងណាឱ្យការជ្រើសរើសនេះប្រកបដោយតម្លាភាព។ បេក្ខភាពមានច្រើន ហើយសុទ្ធតែមានគុណសម្បត្តិទាំងអស់ ដូច្នេះការជ្រើសរើសត្រូវឈរលើមូលដ្ឋានរួមផ្សំជាច្រើន ដូចជាឆន្ទៈ សមត្ថភាព លក្ខណៈសម្បត្តិជាអ្នកដឹកនាំ ភាពទទួលខុសត្រូវ អតីតភាពការងារនៅ ក្នុងអង្គភាពផ្ទាល់ចំណេះដឹង បទពិសោធន៍ សីលធម៌ សុខភាព ភាពតស៊ូអំណត់ព្យាយាម ក៏ដូចជាលទ្ធភាពនៃការជំរុញនិរន្តរភាពការងារក្នុងអង្គភាព»។
ឯកឧត្តម ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងទ័ពជើងគោក នៅព្រឹកថ្ងៃទី៧ ខែកញ្ញា ឆ្នាំ២០២០នេះ បានអញ្ជើញជាអធិបតីប្រកាសតែងតាំង និងផ្លាស់ប្ដូរមុខតំណែងមេបញ្ជាការតំបន់ប្រតិបត្តិការសឹករងកំពត។ ពិធីនេះក៏មាន ការចូលរួមពី ឯកឧត្តម ជាវ តាយ អភិបាល ខេត្តកំពត ឯកឧត្តម សោម ពិសិដ្ឋ អភិបាលខេត្តកែប ប្រតិភូអមដំណើរ ព្រម ទាំងមន្ត្រី និងកងកម្លាំងពាក់ព័ន្ធជាច្រើនរូបផងដែរ។ យោងតាមសម្រេចរបស់រដ្ឋមន្ត្រីក្រសួងការពារជាតិ សម្តេចពិជ័យសេនា ទៀ បាញ់ ដោយបានសម្រេចតែងតាំងលោកវរសេនីយ៍ឯក ហុក ចន្តា ពីមេបញ្ជា ការរងតំបន់ប្រតិបត្តិការសឹករងកំពត ទៅជាមេបញ្ជាការជំនួសលោកឧត្តមសេនីយ៍ទោ យឹន ប៊ុនធឿន ដែលត្រូវតែងតាំងជាមេបញ្ជាការរង យោធភូមិភាគទី៣។ ក្នុងពិធីនោះដែរ ក៏មានការតែងតាំង បំពាក់ឋានន្តរស័ក្តិ ជូននាយទាហានតំបន់ប្រតិបត្តិការសឹករងកំពតជាច្រើនរូបផងដែរ៕ ដោយ៖កូឡាប