ភ្នំពេញ ៖ ឯកឧត្តម នាយឧត្តមសេនីយ៍ ម៉ុក ជីតូ អគ្គស្នងការរងនគរបាលជាតិ តំណាងដ៏ខ្ពង់ខ្ពស់ ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ ក្នុងពិធីបើកវគ្គបណ្តុះ បណ្តាល អំពីច្បាប់ស្តីពីការត្រួតពិនិត្យគ្រឿងញៀន ជំនាញស៊ើបអង្កេត បង្ក្រាបបទល្មើសគ្រឿងញៀន និងបទល្មើសសម្អាតប្រាក់ នាព្រឹកថ្ងៃទី៧ ខែកញ្ញា ឆ្នាំ២០២០ នៅអគ្គស្នងការដ្ឋាននគរបាលជាតិ ។
វគ្គបណ្តុះបណ្តាលនេះដែរ មានការអញ្ជើញចូលរួមជាគណៈអធិបតី ពី ឯកឧត្តម ឧត្តមសេនីយ៍ឯក ឡឹក វណ្ណៈ នាយកមន្ទីរប្រឆាំងបទល្មើសគ្រឿងញៀន, ឯកឧត្តម ឧត្តមសេនីយ៍ឯក យី សិទ្ធិ តំណាងអាជ្ញាធរប្រយុទ្ធប្រឆាំងគ្រឿងញៀន, ឯកឧត្តម ឧត្តមសេនីយ៍ឯក ហង្ស សុផាណារ៉ា តំណាងនាយកដ្ឋានកណ្តាលនគរបាលយុត្តិធម៌, ឯកឧត្តម អ៊ុង ចាន់ធួក អនុប្រធានសេនាធិការ។
ឯកឧត្តម នាយឧត្តមសេនីយ៍ ម៉ក់ ជីតូ អគ្គស្នងការរងនគរបាលជាតិបាន មានប្រសាសន៍ថា «ក្នុងឱកាសនេះដែរ ឯកឧត្តម នាយឧត្តមសេនីយ៍បាន នាំយកនូវការផ្តាំផ្ញើសាកសួរខុសទុក្ខរបស់ ឯកឧត្តម នាយឧត្តមសេនីយ៍ សន្តិបណ្ឌិត អគ្គស្នងការនគរបាលជាតិ ដែលបានយកចិត្តទុកដាក់គិតគូរដល់ ជីវភាពរស់នៅ ការអនុវត្តការងារ សុខុមាលភាពរបស់កងកម្លាំងយើងទាំងអស់គ្នា ដោយអនុវត្តតាមសេចក្តីណែនាំរបស់ក្រសួងសុខាភិបាល ក្នុងការប្រយុទ្ធប្រឆាំងជាមួយជំងឺកូវីដ១៩ ហើយត្រូវខិតខំដោយខ្លួនយើង ត្រូវរក្សាអនាម័យ រក្សាគម្លាតពីគ្នា ត្រូវពាក់ម៉ាស បាញ់អាកុល ឬជែល ។ ទន្ទឹមនឹងនោះដែរ ត្រូវណែនាំដល់ក្រុមគ្រួសារ សាច់ញាតិរបស់យើងឲ្យរក្សាអនាម័យថែមទៀត ។
ឯកឧត្តម នាយឧត្តមសេនីយ៍ អគ្គស្នងការរងនគរបាលជាតិបានមានប្រសាសន៍ទៀតថា «ថ្ងៃនេះ ជាថ្ងៃពិសេស និងជាកិត្តិយសរបស់មន្ទីរប្រឆាំងបទល្មើសគ្រឿងញៀន ដែលដំណើរការបើកវគ្គតាមសំណូមពរ ក៏ជាការដឹកនាំផែនការឆមាសទី២ ឆ្នាំ២០២០ ។ នេះជាការរៀបចំជំហានទី១ បានន័យថា វគ្គទី១ ឆ្នាំ២០២០ របស់មន្ទីរប្រឆាំងបទល្មើសគ្រឿងញៀន ក្នុងដំណើរការបើកវគ្គបណ្តុះបណ្តាល អំពីច្បាប់ស្តីពីការត្រួតពិនិត្យគ្រឿងញៀន ជំនាញស៊ើបអង្កេត បង្ក្រាបបទល្មើសគ្រឿងញៀន និងបទល្មើសសម្អាតប្រាក់» ។
ឯកឧត្តម នាយឧត្តមសេនីយ៍ អគ្គស្នងការរងនគរបាលជាតិបានមានប្រសាសន៍ទៀតថា «សិក្ខាកាមទាំង៧៥នាក់នេះ មានសិក្ខាកាមខ្លះបានហ្វឹកហ្វឺន រៀនសូត្រ នៅតាមសាលាផ្សេងៗ ដូចជាសាលាដីឥដ្ឋ និងបណ្តាប្រទេសមួយចំនួនផងដែរ ។ ប៉ុន្តែលើកនេះ ហេតុអ្វីបានជាយើងត្រូវបើកវគ្គបណ្តុះបណ្តាលនេះ ? អ្វីដែសលំខាន់ គឺយើង ចែករំលែកបទពិសោធន៍ ជំនាញ ដល់បងប្អូនឲ្យបានជ្រួតជ្រាបទាំងអស់គ្នា គឺថាយើងអាប់ឌេតឡើងវិញ នូវមុខងាររបស់យើង និងការងារជំនាញរបស់យើង ក៏ដូចជាច្បាប់ ។ ហើយអត្ថប្រយោជន៍នៃការបណ្តុះបណ្តាលនាពេលនេះ គឺទី១-បណ្តុះបណ្តាលអំពីច្បាប់, ទី២-បណ្តុះបណ្តាលអំពីជំនាញ ។ ហើយសំខាន់ជំនាញជាមូលដ្ឋាន របស់នគរបាលអនុវត្តច្បាប់ប្រឆាំងគ្រឿងញៀន ដូចជា ៖ ការកសាងមូលដ្ឋានសម្ងាត់, ការក្តាប់សភាពការណ៍, ការកត់ត្រាសួរចម្លើយ, ប្រមូលភស្តុតាង កិច្ចប្រតិបត្តិការជាដើម ។ ក្នុងនោះដែរ លេចធ្លោនូវការងារមួយទៀត ដែលជាការងារថ្មីរបស់យើង គឺច្បាប់ការប្រឆាំងការសម្អាតប្រាក់ ដែលបានមកពីបទល្មើសគ្រឿងញៀន ។
ឯកឧត្តម នាយឧត្តមសេនីយ៍ អគ្គស្នងការរងនគរបាលជាតិបានមានប្រសាសន៍ទៀតថា (ពាក់ព័ន្ធការងារប្រឆាំងបទល្មើសគ្រឿងញៀននេះដែរ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានយុទ្ធនាការប្រយុទ្ធប្រឆាំងគ្រឿងញៀនបានលើកឡើងនូវពាក្យស្លោកថា «៣កុំ ១រាយការណ៍»។ ៣កុំ គឺទី១-កុំពាក់ព័ន្ធ បានន័យថា កុំចូលរួមជួញដូរ ចាក់ ជក់ ប្រើប្រាស់ ឬការពារពួកឧក្រិដ្ឋជនជួញដូរគ្រឿងញៀន, ទី២-កុំអន្តរាគមន៍ បានន័យថា ពេលដែលត្រូវបង្ក្រាប ទោះបីសាច់ញាតិ បងប្អូនក៏ដោយ មិនត្រូវអន្តរាគមន៍ ការពារ ដើម្បីគេចផុតពីសំណាញ់ច្បាប់នោះទេ, ទី៣-កុំលើកលែងបន្ធូបន្ថយ គឺដាច់ខាតកុំលើកលែង និងបានជម្រុញឲ្យកងកម្លាំងទាំងអស់ ខិតខំបង្កើនសមត្ថភាពដល់ការបង្ការ ទប់ស្កាត់ និងបង្ក្រាបបទល្មើសគ្រប់ប្រភេទ ជាពិសេសបទល្មើសគ្រឿងញៀន និងបទល្មើសសម្អាតប្រាក់ ។
សូមបញ្ជាក់ថា ៖ សិក្ខាកាម ចូលរួមវគ្គបណ្តុះបណ្ដាលនេះ មានលោកនាយករងមន្ទីរ, នាយ-នាយរងការិយាល័យ នាយ-នាយរងផ្នែក និងមន្ត្រីទាំងអស់ ចំណុះមន្ទីរប្រឆាំងគ្រឿងញៀន សរុបចំនួន៧៥នាក់ មានរយៈពេល៥ថ្ងៃ ចាប់ពីថ្ងៃទី៧ ដល់ ដល់ថ្ងៃទី១១ ខែកញ្ញា ឆ្នាំ២០២០ ៕ដោយ៖កូឡាប