ខេត្តបាត់ដំបង៖ដំណើរការអនុវត្តគម្រោងអភិវឌ្ឍន៍ទំនប់ស្ទាក់ទឹកសាលាតាអន មានទីតាំងស្ថិតក្នុងស្រុកឯកភ្នំ ខេត្តបាត់ដំបង ដើម្បីយកទឹកស្តុកទុកក្នុងស្ទឹងសង្កែ និងសម្រាប់ប្រើប្រាស់គ្រប់គ្រាន់ទាំងរដូវប្រាំង និងរដូវវស្សាដែលមានផ្ទៃដីស្រោចស្រពជាង ១០.៤០០ ហិកតា ត្រូវចំណាយថវិកាប្រមាណ ៣៧លានដុល្លារ និងលើកកម្ពស់សោភ័ណភាពក្រុងបាត់ដំបង ឱ្យកាន់តែមានភាពទាក់ទាញបន្ថែមទៀត។
ពាក់ព័ន្ធគម្រោងខាងលើនេះ នៅព្រឹកថ្ងៃអង្គារ ទី៦ ខែកុម្ភៈ ឆ្នាំ២០១៨ លោក ងួន រតនៈ អភិបាលខេត្តបាត់ដំបង និងលោក ប៉ុញ សច្ចៈ អគ្គនាយក នៃអគ្គនាយកដ្ឋានបច្ចេកទេស ក្រសួងធនធានទឹក និងឧតុនិយម បានដឹកនាំកិច្ចប្រជុំពិភាក្សា ស្តីពី ដំណើរការគម្រោងអភិវឌ្ឍន៍សាងសង់ទំនប់ស្ទាក់ទឹកសាលាតាអន ស្ថិតក្នុងស្រុកឯកភ្នំ និងស្រុកសង្កែ ខេត្តបាត់ដំបង នៅសាលប្រជុំសាលាខេត្តបាត់ដំបង ។ បន្ទាប់ពីកិច្ចប្រជុំបានបញ្ចប់ ក្រុមការងារបានចុះពិនិត្យផ្ទាល់ទីតាំង ដែលត្រូវអនុវត្តគម្រោង ។
លោក ងួន រតនៈបានមានប្រសាសន៍ថា គម្រោងអភិវឌ្ឍន៍សាងសង់ទំនប់ស្ទាក់ទឹកសាលាតាអននេះ ត្រូវចំណាយថវិកាប្រមាណ ៣៧.០៨៦.៣៦៣ ដុល្លារ មានផ្ទៃដីស្រោចស្រពជាង ១០.៤០០ ហិកតា ដែលមានប្រឡាយសរុបប្រវែង ១៥គីឡូម៉ែត្រ ។ នៅពេលដែលគម្រោងនេះត្រូវបានសាងសង់រួចរាល់ ការរំពឹងទុកថាក្រុងបាត់ដំបងនឹងមានទឹកស្តុកទុកក្នុងស្ទឹងសង្កែ និងសម្រាប់ប្រើប្រាស់គ្រប់គ្រាន់ទាំងរដូវប្រាំង និងរដូវវស្សា ។
លោក ប៉ុញ សច្ចៈ អគ្គនាយក នៃអគ្គនាយកដ្ឋានបច្ចេកទេស បានថ្លែងថា ក្រោមជំនួយឥណទានពីសាធារណរដ្ឋកូរ៉េ និងថវិកាបដិភាគរបស់រាជរដ្ឋាភិបាលកម្ពុជា គម្រោងអភិវឌ្ឍន៍ទំនប់សាលាតាអន ត្រូវបានដំណើរការអនុវត្តដោយមានទំហំការងារ ៖ សាងសង់ប្រឡាយពង្វាងទឹកតាមមាត់ស្ទឹងសង្កែ ប្រវែង ២៥០ ម៉ែត្រ សាងសង់សំណង់ទ្វារទឹកមេកាត់ស្ទឹងសង្កែ ប្រវែង ៧៤ ម៉ែត្រ ចំនួន ១ កន្លែង សាងសង់ប្រឡាយបេតុង ចំនួន ៤ ខ្សែ ប្រវែង ១៣,៧៨ គីឡូម៉ែត្រ សាងសង់សំណង់ទ្វារទឹក ចំនួន ១២ កន្លែង សាងសង់សំណង់ស្ទាក់ទឹកប្រឡាយរង ចំនួន ២ កន្លែងសាងសង់សំណង់លូចែកចាយទឹកប្រឡាយមេ ចំនួន ៨ កន្លែង សាងសង់ស្ពានឆ្លងកាត់ និងស្ពានថ្មើរជើងកាត់ប្រឡាយមេ សរុបចំនួន ១៨ កន្លែង និងសាងសង់ជណ្តើរចុះប្រឡាយមេសម្រាប់អ្នកភូមិប្រើប្រាស់ ជាច្រើនកន្លែងទៀត ។
បើតាមលោកអគ្គនាយកដ្ឋានបច្ចេកទេស បានបញ្ជាក់ថា តាមការរំពឹងទុក ក្រោយពេលបញ្ចប់ការសាងសង់ជាស្ថាពរ គម្រោងអភិវឌ្ឍន៍ទំនប់សាលាតាអន នឹងផ្តល់ទឹកសម្រាប់ស្រោចស្រព ផ្ទៃដីបង្កបង្កើនផល របស់បងប្អូនប្រជាកសិកររាប់ម៉ឺនហិកតា នៅក្នុងស្រុកឯកភ្នំ ស្រុកសង្កែ និងស្រុកថ្មគោល ។ ទន្ទឹមនឹងនេះ ស្ទឹងសង្កែ ដែលទឹកធ្លាប់តែហូរធ្លាក់ចូលទៅកាន់បឹងទន្លេសាប ដោយឥតប្រយោជន៍ នឹងមានទឹកខួបប្រាំង ខួបវស្សា សម្រាប់ផ្គត់ផ្គង់ ឱ្យការផលិតទឹកស្អាត ស្រោចស្រពដំណាំកសិកម្ម និងលើកកម្ពស់សោភ័ណភាពក្រុងបាត់ដំបង ឱ្យកាន់តែមានភាពទាក់ទាញបន្ថែមទៀត៕ ដោយ៖បញ្ញាស័ក្តិ
