ភ្នំពេញ៖ លោក ជិន ម៉ាលីន អ្នកនាំពាក្យគណៈកម្មាធិការសិទ្ធិមនុស្សកម្ពុជា បានលើកឡើងថា វាជារឿងធម្មតាដែលលោកស្រី រ៉ូណា ស្មីត (Rhona Smith) លើកឡើងពីក្តីបារម្ភពាក់ព័ន្ធនឹងស្ថានភាពសិទ្ធិមនុស្សនៅកម្ពុជា នៅពេលដែលលោកស្រីទទួលបាននូវរបាយការណ៍ក៏ដូចជាព័ត៌មានផ្សេងៗពាក់ព័ន្ធនឹងករណីនេះ ។ លោក ជិន ម៉ាលីនក៏ បានស្វាគមន៍ចំពោះអនុសាសន៍របស់លោកស្រី ដែលលើកទឹកចិត្តឱ្យអាជ្ញាធរចាប់ក្រុមអ្នកតវ៉ាទាំងនេះទៅកាន់តុលាការ។
លោក ជិន ម៉ាលីន បានថ្លែងសារនៅបណ្តាញសង្គមហ្វេសប៊ុក នៅថ្ងៃទី៩ខែកញ្ញាឆ្នាំ២០២០នេះថា បីចំណុច អំពីសាររបស់លោកស្រី Rhona Smith អ្នករាយការណ៍ពិសេសរបស់អង្គការសហប្រជាជាតិ ទទួលបន្ទុកសិទ្ធិមនុស្សនៅកម្ពុជា ៖
១. វាជារឿងធម្មតាដែលលោកស្រី Rhona Smith លើកឡើងពីក្តីបារម្ភពាក់ព័ន្ធនឹងស្ថានភាពសិទ្ធិមនុស្សនៅកម្ពុជា នៅពេលដែលលោកស្រីទទួលបាននូវរបាយការណ៍ក៏ដូចជាព័ត៌មានផ្សេងៗពាក់ព័ន្ធនឹងករណីនេះ ទោះបីជារបាយការណ៍និងព័ត៌មានទាំងនោះ ផ្តល់ដោយប្រភពនិងក្រុម ដែលមាននិន្នាការនយោបាយយ៉ាងណាក៏ដោយ ព្រោះវាជាកតព្វកិច្ច និងអណត្តិរបស់លោកស្រី ក្នុងនាមជាអ្នករាយការណ៍ពិសេសរបស់អង្គការសហប្រជាជាតិ ទទួលបន្ទុកស្ថានភាពសិទ្ធិមនុស្សនៅកម្ពុជា។
២. សាររបស់លោកស្រី មិនបានចោទប្រកាន់វិធានការច្បាប់ របស់សមត្ថកិច្ចថា ជាការរំលោភបំពានសិទ្ធិមនុស្សនោះទេ គឺគ្រាន់តែលើកពីគោលការណ៍ទូទៅ នៃសិទ្ធិមនុស្សដែលរដ្ឋាភិបាលមានកាតព្វកិច្ចគោរព ការពារ និងបំពេញ ដើម្បីធានាថាពលរដ្ឋអាចអនុវត្តសិទ្ធិរបស់ខ្លួន បានដោយសេរី និងក្នុងក្របខ័ណ្ឌច្បាប់ ហើយដែលរដ្ឋាភិបាលបាននិងកំពុងប្រកាន់យក និងអនុវត្តយ៉ាងភ្ជាប់ខ្ជួនតាមរយៈយន្តការ នៃការអនុវត្តច្បាប់យ៉ាងម៉ឹងម៉ាត់ នាពេលកន្លងមក។
៣. ការដែលលោកស្រីជំរុញឱ្យសមត្ថកិច្ចបញ្ជូនជនល្មើសទៅតុលាការ សបញ្ជាក់ឱ្យឃើញយ៉ាងច្បាស់ថា លោកស្រីគាំទ្រនិងយល់ច្បាស់នូវវិធានការច្បាប់ របស់រដ្ឋាភិបាលចំពោះអ្នកដែលអនុវត្តសិទ្ធិ ដោយបំពាននិងឈានទៅការប្រព្រឹត្តបទល្មើស ដែលជនជាប់ចោទត្រូវទទួលខុសត្រូវតាមផ្លូវច្បាប់ និងត្រូវចូលរួមក្នុងដំណើរការនីតិវិធីតុលាការ ដើម្បីធ្វើការការពារខ្លួន តតាំងជាមួយសមត្ថកិច្ច ដែលមានមូលដ្ឋានច្បាប់រឹងមាំ និងច្បាស់លាស់ក្នុងការចោទប្រកាន់ ហើយដែលនេះ ជាមធ្យោបាយស្របច្បាប់តែមួយគត់ ក្នុងការការពារជនជាប់ចោទ នៅក្នុងសង្គមប្រជាធិបតេយ្យនីតិរដ្ឋ ជាជាងការជួបជុំតវ៉ាបែបអនាធិបតេយ្យ ដាក់សម្ពាធដល់រដ្ឋាភិបាល និងស្ថាប័នតុលាការ ដែលជាស្ថាប័នឯករាជ្យឱ្យធ្វើការដោះលែង ឬទម្លាក់ចោលបទចោទទាំងបំពានច្បាប់ រដ្ឋធម្មនុញ្ញ គោលការណ៍ប្រជាធិបតេយ្យនីតិរដ្ឋ និងការបែងចែកអំណាច។
លោកស្រី រ៉ូណា ស្មីត នៅថ្ងៃទី៨ ខែកញ្ញា ឆ្នាំ២០២០ បានបង្ហោះសារលើទំព័រហ្វេសប៊ុកដោយបង្ហាញក្តីបារម្ភរបស់ខ្លួន ជុំវិញវិធានការ និងចំណាត់ការរបស់អាជ្ញាធរមានសមត្ថកិច្ចរបស់កម្ពុជា លើក្រុមយុវជនមួយក្រុម ដែលធ្វើសកម្មភាពតវ៉ានាំឱ្យប៉ះពាល់ដល់សន្តិសុខ និងសណ្តាប់ធ្នាប់សង្គមនៅកម្ពុជា។
លោកស្រី រ៉ូណា ស្មីត បានសរសេរថា ខ្ញុំមានកង្វល់ចំពោះរបាយការណ៍ថ្មីៗនេះអំពីការចាប់ខ្លួនសកម្មជនបរិស្ថានចំនួនបីរូប ដែលឥឡូវនេះត្រូវបានចោទប្រកាន់ពីបទ ញុះញង់ឲ្យប្រព្រឹត្តបទឧក្រិដ្ឋ និងបង្កើតភាពវឹកវរនៅក្នុងសង្គម តាមមាត្រា ៤៩៤ និង៤៩៥នៃក្រមព្រហ្មទណ្ឌ។ បុគ្គលមួយចំនួនទៀត រាប់ទាំងព្រះសង្ឃមួយអង្គត្រូវបានចាប់ខ្លួន និងឃុំខ្លួនចាប់តាំងពីថ្ងៃសុក្រសប្តាហ៍មុន។
លោកស្រីបន្ថែមថា ខ្ញុំសូមលើកទឹកចិត្តដល់អាជ្ញាធរកម្ពុជា ធានាថា សិទ្ធិទាំងនេះត្រូវបានគោរព និងការពារ ហើយបង្កើតបរិយាកាសមួយ ដែលបុគ្គលម្នាក់ៗអាចអនុវត្តសិទ្ធិទាំងនេះ។ ខ្ញុំសូមជំរុញឲ្យបញ្ជូនអ្នកដែលត្រូវបានចាប់ខ្លួនទាំងនោះទៅតុលាការ ហើយត្រូវគោរពឲ្យបានពេញលេញនូវសិទ្ធិទទួលបាននីតិវិធីត្រឹមត្រូវរបស់ពួកគេ។ ខ្ញុំកំពុងតាមដានព្រឹត្តិការណ៍ទាំងនេះយ៉ាងដិតដល់នៅក្នុងប្រទេសកម្ពុជា៕ដោយ៖កូឡាប
