ភ្នំពេញ៖ ប៉ុន្មានថ្ងៃនេះ រឿងរ៉ាវប្តីប្រពន្ធបែកបាក់របស់តារាចម្រៀង ទួច ស្រីលក្ខណ៍ ហាក់បានផ្ទុះឡើងជាថ្មី និងកំពុងទទួលការចាប់អារម្មណ៍តាមដានជាខ្លាំង ពីសំណាក់មហាជននៅលើបណ្តាញសង្គម បន្ទាប់ពីអតីតស្វាមីរបស់នាងគឺលោក Morten Kvammen បានចេញលិខិតបំភ្លឺរឿងរ៉ាវមួយចំនួន ក្រោយជីវិតប្តីប្រពន្ធរវាងអ្នកទាំងពីរឈានដល់ផ្លូវបំបែក។
គួររំលឹកឲ្យដឹងផងដែរថា កាលពីថ្ងៃទី៦ ខែកញ្ញា ឆ្នាំ២០២០ លោក Morten បានធ្វើឲ្យផ្ទុះការចាប់អារម្មណ៍ពេញបណ្តាញសង្គម និងប្រពន្ធផ្សព្វផ្សាយ បន្ទាប់លោកបានបង្ហោះនូវលិខិតបំភ្លឺជាភាសាអង់គ្លេស និងប្រែជាភាសាខ្មែរ ជុំវិញរឿងរ៉ាវមួយចំនួន ដើម្បីឆ្លើយតបទៅនឹងអ្វីៗដែល ទួច ស្រីលក្ខណ៍ បានលើកឡើងឲ្យគេឯងដឹងឮថាកំហុសគ្រប់យ៉ាងគឺដោយសារតែរូបលោក។
ក្នុងសារលិខិតដ៏វែងអន្លាយ លោក Morten បានបានបញ្ជាក់ឲ្យដឹងថា រាល់អ្វីៗដែល ទួច ស្រីលក្ខណ៍ បាននិយាយឡើងគឺចាត់ទុកជាការមួលបង្កាត់ បំភ្លៃការពិតទាំងអស់ ព្រោះតែដើម្បីកេរ្តិ៍ឈ្មោះខ្លួន។
ក្រោយសម្ងំមិនតបតប៉ុន្មានថ្ងៃ ស្រាប់តែម្សិលមិញនេះថ្ងៃទី៨ ខែកញ្ញា ឆ្នាំ២០២០ ទួច ស្រីលក្ខណ៍ ព្រោះតែអត់ទ្រាំនឹងសម្តីរបស់អតីតស្វាមីហាក់និយាយយកត្រូវតែខ្លួនឯងបែបនេះ ក៏បានឆ្លើយតបតាមរយៈរូបភាពម្តាយជាស្ត្រីមេម៉ាយម្នាក់ទោះលំបាកយ៉ាងណា ក៏តស៊ូដើម្បីកូនប្រុសជាទីស្រឡាញ់ម្នាក់គត់ និងភ្ជាប់សារបែបនេះថា៖ «ត្រូវចាំថា ការសរសេរបង្ហោះជាសារ វាជាបទដែរបរិហារកេរ្តិ៍ជាសាធារណៈយ៉ាងច្បាស់ តាមប្រព័ន្ធផ្សព្វផ្សាយ។ ដោយរូបខ្ញុំ មិនដែលតបត តែលោកនៅតែបន្តធ្វើបាបរូបខ្ញុំស្ទើរស្លាប់ទាំងរស់ ទឹកភ្នែកខ្ញុំស្រក់ព្រោះតែរូបខ្ញុំ មិននឹកស្មានថា ចិត្តប្រុសសាហាវដល់ថ្នាក់ហ្នឹង រៀបគំរោង ក្បត់ខ្ញុំ ដែលជាប្រពន្ធធ្វើឲ្យកូននឹងខ្ញុំ ស្រែកទ្រហោយំដោយស្នាដៃប្តី ប្តីក្បត់បំពានហ៊ានក្រាបក្បាលផ្ទឹមការជាមួយស្រីថ្មី ភ្លេចហើយឬ ប្តីថាខ្លួនមិនទាន់លែងលះ ទុកឲ្យច្បាប់ជាអ្នកធ្វើការចុះ យុត្តិធម៌មានសម្រាប់ស្ត្រីខ្មែរដូចជាខ្ញុំ»។
យ៉ាងណាមិញ នៅថ្ងៃដដែល គេក៏បានប្រទះឃើញ ទួច ស្រីលក្ខណ៍ បានបង្ហោះសារឆ្លើយតបមួយទៀត នៅលើគណនីហ្វេសប៊ុកខ្លួនឈ្មោះអង់គ្លេស Jenny Outver ដែលមានខ្លឹមសារធ្ងន់ៗយ៉ាងដូច្នេះថា៖ «ប្រអប់មាត់ប្រៀបដូចជាកាំភ្លើង សម្តីប្រៀបដូចគ្រាប់សំណ សូមប្រើវាដោយមានការពិចារណាឲ្យបានល្អិតល្អន់ មុននឹងនិយាយស្តីម្តងៗ ព្រោះពេលខ្លះវាអាចធ្វើឲ្យអ្នកស្តាយក្រោយអស់មួយជីវិត ដោយសារសម្តីរបស់ខ្លួនឯង ខ្ញុំត្រូវតែក្រោកឈរ ទោះស្ថិតនៅក្នុងស្ថានភាពលំបាកយ៉ាងណាក៏ដោយ»។
ជាមួយគ្នានេះផងដែរ អ្នកនាង ទួច ស្រីលក្ខណ៍ ក៏បានបកស្រាយបទចម្រៀងដោយច្រៀងគោកមួយបទមានចំណងជើងថា៖ «ស្ទើរស្លាប់ទាំងរស់» រៀបរាប់ពីទង្វើប្តីចុះចោលទៅមានស្រីថ្មីទាំងគ្មានរឿងអ្វី និងឈឺចាប់បំផុត ពេលស្រីប្តីដែលយកប្តីគេហើយ បែរជាចេញមកបញ្ឈឺដាក់ទៀត រីឯប្តីវិញមើលងាយប្រពន្ធថែមទៀត….។
ក្រោយពីបានឃើញគួរឲ្យកំសត់បែបនេះ អ្នកលេងបណ្តាញសង្គមជាច្រើន បានលើកទឹកចិត្ត ទួច ស្រីលក្ខណ៍ ឲ្យរឹងមាំឡើង ដោយចាត់ទុកថាមិនមែនប្តី គ្រាន់តែនំយើងស៊ីហើយក្អួតចោល។ ក្នុងនោះ អ្នកលេងហ្វេសប៊ុកម្នាក់ក៏បានលើកឡើងថា៖ « ប្តីអឺរ៉ុប វា មិនសូវមានមនោសញ្ចេតនា ដូចយើងស្រីអាស៊ីទេ តែវាឈប់ស្រឡាញ់យើងហើយ វារកថ្មីទៀតហើយ ។ កុំទៅស្រណោះគេអី គេ មិនបាននឹកស្រណោះយើងទេ ។ ខ្លូននៅស្អាតដែរ រកថ្មីទៀតទៅ »៕ ដោយ៖ លឹម ហុង