បន្ទាយមានជ័យ ៖ លោកឯកអគ្គរាជទូតអូស្ត្រាលីប្រចាំកម្ពុជា Pablo Kang និងអគ្គនាយករងនៃអគ្គនាយកដ្ឋានអន្តោប្រវេសន៍កម្ពុជា ឯកឧត្តម ឃុន សំបូរ បានចាប់ផ្តើមបើកវគ្គបណ្តុះបណ្តាល មន្ត្រីនគរបាលព្រំដែន និងអន្តោប្រវេសន៍ជួរមុខ នៅប៉ោយប៉ែត។ ការបណ្តុះបណ្តាលនឹងត្រូវធ្វើឡើង នៅច្រកទ្វារអន្តរជាតិប៉ោយប៉ែត ដួង និងអូរស្មាច់។
លោកPablo Kang បានមានប្រសាសន៍ថា អូស្ត្រាលីក៏បានផ្តល់អំណោយ ដល់អគ្គនាយកដ្ឋានអន្តោប្រវេសន៍ផងដែរ នូវបរិក្ខារការពារផ្ទាល់ខ្លួន សម្រាប់មន្ត្រីព្រំដែនរបស់ខ្លួន។ អូស្ត្រាលីមានសេចក្តីរីករាយ ក្នុងការធ្វើជាដៃគូ ជាមួយ អង្គការអន្តរជាតិទេសន្តរប្រវេសន៍ (IOM) ដើម្បីបំពាក់ និងផ្តល់ការណែនាំ ដល់មន្ត្រីព្រំដែន អំពីបញ្ហាប្រឈមមុខរបស់ជំងឺកូវីដ-១៩ នៅតាមព្រំដែន និងការប្រយុទ្ធប្រឆាំងការឆ្លងជំងឺកូវីដ-១៩ នៅទូទាំងប្រទេសតំបន់មេគង្គ។
លោក បានបន្ថែមថា គម្រោងនេះក៏ផ្តល់ជូនអ្នកធ្វើចំណាកស្រុកកម្ពុជា ដែលត្រឡប់មកប្រទេសវិញ នូវបរិក្ខារអនាម័យ និងសម្ភារៈអប់រំ ទាក់ទងនឹងវិធានការបង្ការ និងសេវាកម្មថែទាំសុខភាព។
សូមបញ្ជាក់ថា នៅថ្ងៃទី៨ ខែកញ្ញា ឆ្នាំ២០២០ វេលាម៉ោង ៩និង០០នាទី ប៉ុស្តិ៍នគរបាលច្រកទ្វារព្រំដែនអន្តរជាតិប៉ោយប៉ែត បានចូលរួមពិធីបើកសិក្ខាសាលា ស្តីពីការលើកកម្ពស់សមត្ថភាព មន្ត្រីគ្រប់គ្រងព្រំដែន និងប្រឆាំងមេរោគកូវីដ-១៩ ដែលរៀបចំឡើងដោយស្ថានទូតអូស្ត្រាលី និងអង្គការ IOM ប្រចាំកម្ពុជា ក្រោមអធិបតីភាព ឯកឧត្តម នាយឧត្តមសេនីយ៍ ឃុន សំបូរ អគ្គនាយករងអន្តោប្រវេសន៍ ជំនួយការដឹកនាំនាយកដ្ឋានច្រកទ្វារទី១, ឯកឧត្តម ផាប្លូ ខាំង (PABLO KANG) អគ្គរាជទូតអូស្ត្រាលីប្រចាំនៅកម្ពុជា និងលោកស្រី គ្រីស្ទីន ផាកូ (KRISTIN PARCO) ប្រធានអង្គការអន្តរជាតិទេសន្តប្រវេសន៍ (IOM) ប្រចាំនៅកម្ពុជា។
វគ្គសិក្ខាសាលានេះ មានរយៈពេល ៣ថ្ងៃ គិតចាប់ពីថ្ងៃទី៨ ដល់ថ្ងៃទី១០ ខែកញ្ញា ឆ្នាំ២០២០ នៅសណ្ឋាគារលី ក្រុងប៉ោយប៉ែត ខេត្តបន្ទាយមានជ័យ។
ពិធីនេះក៏មានការអញ្ជើញចូលរួមពីសំណាក់ លោកឧត្តមសេនីយ៍ទោ ទៀប ប៊ុនលាភ អនុប្រធាននាយកដ្ឋានច្រកទ្វារទី១ ជាគ្រូបង្គោល, លោកវរសេនីយ៍ឯក ជឹម ភិរម្យ នាយការិយាល័យច្រកទ្វារព្រំដែនអន្តរជាតិ, លោកឧត្តមសេនីយ៍ត្រី អុី ចំរើន នាយប៉ុស្តិ៍ ព្រមទាំងលោកនាយរងប៉ុស្តិ៍, នាយ-នាយរងផ្នែក, មន្ត្រីប៉ុស្តិ៍ និងក្រុមផ្ដល់ទិដ្ឋាការច្រកទ្វារព្រំដែនអន្តរជាតិប៉ោយប៉ែត សរុបចំនួន៤១នាក់៕
ដោយ៖កូឡាប