ភ្នំពេញ៖ លោកស្រី ឱ វណ្ណឌីន រដ្ឋលេខាធិការ និងអ្នកនាំពាក្យក្រសួងសុខាភិបាល សូមប្រកាសតាមរយៈបណ្តាញព័ត៌មាន និងសាធារណជនឲ្យបានជ្រាបថា មានជនជាតិចិន២នាក់ រត់ចេញពីមណ្ឌលចត្តាឡីស័កប្រាកដមែន។
លោកស្រី ឱ វណ្ណឌីន បានបញ្ជាក់ថា ឆ្លើយតបទៅនឹងសំណួរអ្នកសារព័ត៌មានជាច្រើន ខ្ញុំសូមជម្រាបជូនសាធារណជនទាំងអស់ ឲ្យបានជ្រាបថា មានករណីជនជាតិចិន ២នាក់បានរត់ចេញពីសណ្ឋាគារមួយក្នុងរាជធានីភ្នំពេញ ពិតប្រាកដមែន។
លោកស្រី ឱ វណ្ណឌីន បានបញ្ជាក់បន្ថែមថា ពួកគាត់ជាអ្នកដំណើរមកពីប្រទេសចិន មកដល់កម្ពុជា នៅម៉ោងប្រហែល១១ថ្ងៃត្រង់នៃថ្ងៃទី៨ ខែកញ្ញា ឆ្នាំ២០២០ ។ ហេតុការណ៍បានកើតឡើង ក្រោយពីបានចូលស្នាក់នៅសណ្ឋាគារមួយក្នុងរាជធានីភ្នំពេញ ដើម្បីរងចាំលទ្ធផលតេស្តរកវីរុសកូវីដ-១៩ ពួកគាត់ ក៏មានទំនាស់គ្នីគ្នាគាត់ បន្ទាប់មក ក៏រត់ចេញពីសណ្ឋាគារនោះតែម្តងនៅរសៀលថ្ងៃទី៩ ខែកញ្ញា ឆ្នាំ២០២០។
បច្ចុប្បន្ន អាជ្ញាធរមានសមត្ថកិច្ចបាន និងកំពុងតែស្រាវជ្រាវរកបុគ្គលទាំងពីរនាក់ខាងលើនេះ ហើយលទ្ធផលតេស្តរបស់ពួកគាត់ទាំងពីរនាក់ គឺអវិជ្ជមានវីរុសកូវីដ-១៩ ដែលតម្រូវឲ្យបន្តធ្វើចត្តាឡីស័កជាបន្តទៀត៕ដោយ៖កូឡាប
