ភ្នំពេញ៖ ឯកឧត្តម អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សា បរធនបាលនៃមូលនិធិគន្ធបុប្ផាកម្ពុជា បានឲ្យដឹងថា ក្នុងរយៈពេល៨ខែ ឆ្នាំ២០២០នេះ មូលនិធិគន្ធបុប្ផាកម្ពុជា ទទួលបានវិភាគទានសរុបចំនួន ១៥,៩៤៩,៤៧៤ដុល្លារ។ នេះបើតាមសេចក្តីប្រកាសព័ត៌មានរបស់ក្រសួងសេដ្ឋកិច្ច ដែលចុះផ្សាយនៅថ្ងៃនេះ។
ក្នុងនោះ ឯកឧត្តម អូន ព័ន្ធមុនីរ័ត្ន បានបញ្ជាក់ថា ចំនួននេះ ដោយាសារឥទ្ធិពលនៃជំងឺកូវីដ-១៩ បានធ្វើឲ្យថវិកាវិភាគទាននៅរយៈពេល៨ខែ ឆ្នាំ២០២០នេះ ថមថយបន្តិច បើធៀបនឹងរយៈពេលដូចគ្នា ឆ្នាំ២០១៩។
ការលើកឡើងរបស់ឯកឧត្តម អូន ព័ន្ធមុនីរ័ត្ន ធ្វើឡើងក្នុងជំនួបសម្តែងការស្វាគមន៍ចំពោះលោក Markus Buerli នាឱកាសដែលលោកទើបត្រូវបានតែងតាំងជាប្រធានទីភ្នាក់ងារសម្រាប់កិច្ចអភិវឌ្ឍន៍ និងសហប្រតិបត្តិការស្វីសប្រចាំកម្ពុជា។
លោក Markus Buerli បានទទួលស្គាល់ថា មូលនិធិគន្ធបុប្ផាកម្ពុជា បានដើរតួនាទីយ៉ាង សំខាន់ក្នុងការចូលរួមចំណែកផ្តល់ហិរញ្ញប្បទាន ដើម្បីរក្សាចីរភាពនៃកិច្ចដំណើរការមន្ទីរពេទ្យគន្ធបុប្ផាកម្ពុជា។
គួរបញ្ជាក់ថា បើតាមលោក Markus Buerli ក្រៅពីការបន្តជួយឧបត្ថម្ភដល់មន្ទីរពេទ្យគន្ធបុប្ផា ក្នុងបរិបទនៃការរីករាលដាលនៃជំងឺកូវីដ-១៩ នេះ រដ្ឋាភិបាលស្វីស បានអនុម័តថវិកាបន្ថែមទៀតចំនួន២.៥ លានដុល្លារដល់កម្ពុជា ដោយផ្តោតលើការអនុវត្តកម្មវិធីដូចជា ការបណ្តុះបណ្តាលជំនាញសម្រាប់រយៈពេលខ្លី, ការអភិវឌ្ឍវិស័យកសិកម្ម និងការដាំដុះតាមផ្ទះជាដើម៕
ដោយ៖CEN
