ភ្នំពេញ៖ កាលពីម្សិលមិញនេះ ថ្ងៃទី៩ ខែកញ្ញា ឆ្នាំ២០២០ មានរឿងដ៏ភ្ញាក់ផ្អើល និងគួរឲ្យស្លុតរន្ធត់មួយ ត្រូវបានចែករំលែកនៅលើបណ្តាញសង្គម គ្រាដែលគេបានដឹងថា បុរសម្នាក់ជាជនជាតិចិន ស្ថិតក្នុងស្ថានភាពពាក់មួកកន្តឹបពណ៌ស និងបិទម៉ាស បានចូលមកឈប់ពីមុខកន្លែងលក់ថ្នាំពេទ្យ នៃផ្ទះ Pharmacy មួយកន្លែង ដោយឈរសម្លក់សម្លឹងលើសម្លឹងក្រោមពុំនិយាយស្តីយ៉ាងយូរ ដោយពុំដឹងមានបំណងអ្វីឲ្យប្រាកដ ប៉ុន្តែ ចុងក្រោយ បានពោលពាក្យប៉ុន្មានម៉ាត់ដ៏គួរឲ្យខ្លាចបំផុត…។
នេះបើយោងតាមម្ចាស់គ្លីនិកដែលមានគណនីហ្វេសប៊ុកឈ្មោះ Kunthea Un បានប្រាប់ពីករណីដ៏ចម្លែកញាក់សាច់នេះឲ្យដឹងថា បុរសម្នាក់ពាក់មួកកន្តឹបពណ៌ស និងបិទម៉ាស បានចូលមកឈប់ពីកន្លែងលក់ថ្នាំពេទ្យរបស់គាត់យ៉ាងយូរ។ នៅពេលសួរនាំតើមានការអ្វីដែរ បុរសដ៏ចម្លែករូបនេះពុំនិយាយអ្វីទាំងអស់ ហើយភ្នែកក្រឡេកក្រឡាច់សម្លឹងលើក្រោមមកក្នុង Pharmacy ដែលធ្វើឲ្យប្អូនៗប៉ុន្មាននាក់ដែលកំពុងនៅជួបជុំគ្នាជាមួយគាត់ មានការភ័យខ្លាចជាខ្លាំង។
ម្ចាស់គ្លីនិកខាងលើបន្តថា បន្ទាប់មក បុរសរូបនោះក៏បានហុចលុយមូលក្រដាស 1000 រៀល មកឲ្យពួកគាត់ (ក្នុងគោលបំណងចង់ឱ្យកាន់លុយនោះ) តែពួកគាត់អត់ប៉ះពាល់អ្វីទាំងអស់ ។ ដោយគិតក្នុងចិត្តថា ប្រហែលបុរសរូបនេះមានបំណងសុំលុយ ពួកគាត់ក៏បានហុចលុយឱ្យ1000រៀល តែបុរសនោះបដិសេធទទួលយកទេ ហើយបានបង្ហើបសំឡេងមកបែបភាសាចិនស្តាប់ពុំបាន។ ដោយពុំដឹងមានបំណងអ្វីឲ្យប្រាកដ ព្រោះនៅតែឈរសម្លក់សម្លឹងយ៉ាងយូរដដែល ក្រោយមកគាត់ (ម្ចាស់គ្លីនិក) ក៏បានសួរជាភាសាចិនទៅគាត់វិញថា “ Ni xiang Yao shen me “ ? (តើអ្នកចង់បានអ្វី ) ពេលនោះបុរសនេះក៏បានកែវភ្នែកបើកធំៗ ហើយនិយាយមកវិញយ៉ាងលឿនដ៏ញាក់សាច់បែបនេះថា “ Xiang sha ren “ មានន័យថា (គាត់ចង់សម្លាប់មនុស្ស) ។ ហេតុអ្វីបានជាគាត់ឆ្លើយបែបនេះ ដោយចម្លើយមិនគួរឱ្យចង់ស្តាប់ទាល់តែសោះ តែអាចមកពីបុរសនេះបែកថ្នាំឬយ៉ាងណា?។
ទោះយ៉ាងណា បន្ទាប់មក បុរសរូបនេះនៅតែទុកក្រដាសលុយមួយសន្លឹកនោះ ព្រោះតែចង់ឲ្យម្ចាស់ហ្វាម៉ាស៊ីប៉ះលុយរបស់ខ្លួន ប៉ុន្តែ ដោយសារតែសង្ស័យជាល្បិចរបស់ជនដាក់ថ្នាំ ពួកគាត់ដាច់ខាតមិនប៉ះក្រដាសលុយនោះឡើយ ដែលជាហេតុធ្វើឲ្យបុរសនោះទ្រាំនៅលែងបាន ក៏បានដើរចេញទៅវិញទៅ។
ជាមួយគ្នានេះផងដែរ ករណីដូចគ្នាខាងលើ ក៏បានកើតឡើងនៅហាងលក់ទូរស័ព្ទមួយកន្លែងនៅទួលសង្កែ ដោយក្នុងនោះ ម្ចាស់ហាងទូរស័ព្ទដែលមានគណនីហ្វេសប៊ុកឈ្មោះ Srey Leak បានបង្ហោះរូបភាពស្តែងៗពីបុរសម្នាក់មានភិនភាគដូចគ្នានេះដែរ (ជាជនជាតិចិន) និងបញ្ជាក់ប្រាប់ឲ្យដឹងថា៖ «ដូចគ្នាបងម៉ោងជាង7 គាត់ក៏ចូលផ្ទះខ្ញុំដែរ ហើយដេញមិនទៅមិនដឹងគាត់ចង់បានអ្វីទេ ខ្ញុំមិនចេះស្តាប់ភាសាចិនមករកទិញទូរស័ព្ទ តែមើលទៅមិនទំនងជាអ្នកទិញសោះ នៅទួលសង្កែដាណែតលក់ទូរស័ព្ទ»។
សូមប្រយ័ត្ន នេះជាល្បិចបោកថ្មីរបស់ជនខិលខូច ឲ្យយើងយកលុយវា ព្រោះលុយវាដាក់ថ្នាំសន្ដំ ពេលប៉ះហើយ យើងនឹងទន់ដៃទន់ជើង រួចវានឹងប្រមូលយកអីវ៉ាន់ទ្រព្យរបស់យើងអស់តែម្តង»៕ ដោយ៖ លឹម ហុង