កំពត៖ អ្នកនាំពាក្យសាលាដំបូងខេត្តកំពតនៅថ្ងៃទី១០ ខែកញ្ញា ឆ្នាំ២០២០ បានឲ្យដឹងថា សាលាដំបូងខេត្តកំពត បានសម្រេចប្រកាសសាលក្រមចំពោះពិរុទ្ធជនឈ្មោះ ប៉ែន មុំ ដាក់ពន្ធនាគាររយៈពេល ៥ឆ្នាំ ពីបទ«រួមគំនិតក្បត់» ក្នុងចលនាក្បត់ជាមួយទណ្ឌិតសម រង្ស៊ី។
សេចក្តីប្រកាសព័ត៌មានរបស់អ្នកនាំពាក្យសាលាដំបូងខេត្តកំពត បានឱ្យដឹងថា ពិរុទ្ធជន ប៉ែន មុំ ត្រូវបានបញ្ជូនទៅឃុំខ្លួន នៅពន្ធនាគារខេត្តកំពតរួចហើយ តាមដីកាបង្គាប់ឲ្យឃុំខ្លួន លេខ៩៥៨ ចុះថ្ងៃទី៩ ខែកញ្ញា ឆ្នាំ២០២០។ សូមបញ្ជាក់ថា ស្ត្រីរូបនេះធ្លាប់ជាប់ពន្ធនាគារម្តងរួចមកហើយ ក្នុងករណីស្រដៀងគ្នានេះដែរ ហើយត្រូវបានដោះលែងឲ្យមានសេរីភាព ប៉ុន្តែនៅតែមិនរាងចាល។ សាលាដំបូងខេត្តកំពត កាលពីថ្ងៃទី៩ខែកញ្ញា បានផ្តន្ទាទោសស្ត្រីអតីតសកម្មជនបក្សសង្គ្រោះជាតិម្នាក់នេះដាក់ពន្ធនាគារ៥ឆ្នាំ ពីបទ«រួមគំនិតក្បត់ជាតិ»។
សេចក្តីប្រកាសព័ត៌មានរបស់អ្នកនាំពាក្យសាលាដំបូងខេត្តកំពត បានឱ្យដឹងថា កាលពីថ្ងៃទី២៥ ខែសីហា សាលាដំបូងខេត្ត បានបើកសវនាការជំនុំជម្រះលើសំណុំរឿងព្រហ្មទណ្ឌដែលមានជនជាប់ចោទឈ្មោះ ប៉ែន មុំ អាយុ៣៩ឆ្នាំ ពីបទ «រួមគំនិតក្បត់ជាតិ» ពាក់ព័ន្ធនឹងអង្គហេតុការកៀរគរនិងបំផុសប្រជាជនឱ្យចូលរួមក្នុងផែនការប៉ុនប៉ងធ្វើរដ្ឋប្រហារផ្តួលរំលំរដ្ឋាភិបាល ដែលដឹកនាំនិងចាត់តាំងអនុវត្តដោយទណ្ឌិត សម រង្ស៊ី ដែលកំពុងរត់ភៀសខ្លួននៅក្រៅប្រទេស។
អ្នកនាំពាក្យសាលាដំបូងខេត្ត បានបន្តថា នៅពេលប្រកាសសាលក្រមកាលពីថ្ងៃទី៩ខែកញ្ញា តុលាការបានសម្រេចផ្តន្ទាទោសឈ្មោះ ប៉ែន មុំ ដាក់ពន្ធនាគារ៥ឆ្នាំ ពីបទ «រួមគំនិតក្បត់ជាតិ» ប្រព្រឹត្តនៅភូមិទឹកក្រហម ឃុំកណ្តោល ស្រុកទឹកឈូ ខេត្តកំពត កាលពីថ្ងៃទី១៦ ខែវិច្ឆិកា ឆ្នាំ២០១៧ បទល្មើសព្រហ្មទណ្ឌ មានចែងឲ្យផ្តន្ទាទោសតាមបញ្ញត្តិមាត្រា៤៥៣ នៃក្រមព្រហ្មទណ្ឌ និងត្រូវបានចេញដីកា បង្គាប់ឲ្យឃុំខ្លួនលេខ៩៥៨ ចុះថ្ងៃទី៩ ខែកញ្ញា ឆ្នាំ២០២០ តាមមាត្រា៣៥៣ នៃក្រមនីតិវិធីព្រហ្មទណ្ឌ។
សូមបញ្ជាក់ថា កាលពីថ្ងៃទី២៥ ខែសីហា ឆ្នាំ២០២០ សាលាដំបូងខេត្តកំពត បានបើកសវនាការជំនុំជម្រះ លើសំណុំរឿងព្រហ្មទណ្ឌលេខ ៧២៩ ចុះថ្ងៃទី១៣ ខែតុលា ឆ្នាំ២០១៩ ដែលមានជនជាប់ចោទឈ្មោះ ប៉ែន មុំ ពីបទរួមគំនិតក្បត់ អង្គហេតុទាក់ទងទៅនឹងការកៀរគរ និងបំផុសប្រជាជនឲ្យចូលរួម ក្នុងផែនការប៉ុនប៉ង ធ្វើរដ្ឋប្រហារផ្តួលរំលំរាជរដ្ឋាភិបាល ដែលដឹកនាំនិងចាត់តាំង អនុវត្តន៍ដោយឧក្រិដ្ឋជន សម រង្ស៊ី ក្រោមឧបាយកលជា «ផែនការវិលត្រឡប់មកកម្ពុជាវិញ នៅថ្ងៃទី៩ ខែវិច្ឆិកា ឆ្នាំ២០១៩»៕ដោយ៖កូឡាប