ភ្នំពេញ៖ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ អញ្ជើញជាអធិបតីដ៏ខ្ពង់ខ្ពស់ ដឹកនាំកិច្ចប្រជុំពិនិត្យលើរបាយការណ៍ ស្ដីពីលទ្ធផលនៃការពិភាក្សាកម្រិតបច្ចេកទេស និងកម្រិតថ្នាក់ដឹកនាំនូវផែនការថវិកាឆ្នាំ២០២១ របស់ក្រសួងមហាផ្ទៃ ដោយមានការចូលរួមពី រដ្ឋលេខាធិការ អនុរដ្ឋលេខាធិការ អគ្គលេខាធិការ អគ្គនាយក នៃអគ្គនាយកដ្ឋាន ក្រសួងមហាផ្ទៃ អគ្គស្នងការដ្ឋាននគរបាលជាតិ អគ្គនាយកដ្ឋាន និងអង្គភាពពាក់ព័ន្ធជាច្រើនផងដែរ នៅទីស្ដីការក្រសួងមហាផ្ទៃ នាព្រឹកថ្ងៃព្រហស្បតិ៍ ទី១០ ខែកញ្ញា ឆ្នាំ២០២០នេះ ។
អញ្ជើញមានប្រសាសន៍បើកកិច្ចប្រជុំនាឱកាសនោះ សម្ដេចក្រឡាហោម ស ខេង ឧបនាយករដ្ឋមន្ត្រី បានគូសបញ្ជាក់ថាកិច្ចប្រជុំនេះ មានគោលបំណងរួមគ្នាពិនិត្យលើគម្រោងផែនការថវិការបស់ក្រសួងមហាផ្ទៃ ទាំងផ្នែកសន្តិសុខសាធារណៈ និងផ្នែករដ្ឋបាលសម្រាប់ឆ្នាំ២០២១ និងបានចាត់ទុកផែនការនេះថាជាគម្រោងដ៏មានសារសំខាន់ និងចាំបាច់ដែលត្រូវតែសម្របតាមបរិបទជាក់ស្ដែង ពិសេសការប្រែប្រួលនានាក្នុងពេលរាតត្បាតជំងឺរាតត្បាតកូវីដ-១៩។
ក្នុងកិច្ចប្រជុំនេះផងដែរ ឯកឧត្តម នាយឧត្តមសេនីយ៍ សេង យូអ៊ាន់ អគ្គនាយក នៃអគ្គនាយកដ្ឋានភស្តុភារ និងហិរញ្ញវត្ថុ ក៏បានធ្វើបទបង្ហាញជូនអង្គប្រជុំនូវទិដ្ឋភាពទូទៅ នៃការអនុវត្តថវិកាកម្មវិធីរបស់ក្រសួងមហាផ្ទៃ ផែនការយុទ្ធសាស្ត្រថវិកាឆ្នាំ២០២១-២០២៣ គម្រោងចំណាយថវិកាឆ្នាំ២០២១ បញ្ហាប្រឈម និងសំណូមពរផ្សេងៗផងដែរ។
គួរជម្រាបជូនថា ការអនុវត្តថវិការកម្មវិធីក្រសួងមហាផ្ទៃ លើផ្នែករដ្ឋបាលទូទៅ មានគោលបំណង និងគោលនយោបាយដឹកនាំ គ្រប់គ្រងរដ្ឋបាលដែនដី ដើម្បីលើកកម្ពស់ការផ្ដល់សេវាសាធារណៈ និងអភិវឌ្ឍ ដោយឡែកសម្រាប់ផ្នែកសន្តិសុខសាធារណៈ មានគោលនយោបាយ ក្នុងការពង្រឹងសន្តិភាព ស្ថិរភាពនយោបាយ សន្តិសុខ និងសណ្ដាប់ធ្នាប់សាធារណៈ៕ដោយ៖បញ្ញាស័ក្តិ
