បន្ទាយមានជ័យ ៖ បុរសម្នាក់ឈរនោមលើផ្ទះ បានធ្លាក់ពីលើផ្ទះដែលមានកម្ពស់៤ម៉ែត្រ បោកក្បាលត្រូវនឹងបង្គោលរបង ត្រូវរងរបួសធ្ងន់។ ក្រោយមកបានស្លាប់ នៅក្នុងមន្ទីរពេទ្យបង្អែកស្រុកភ្នំស្រុក។ ហេតុការណ៍គ្រោះថ្នាក់ដោយចៃដន្យបង្កឡើងដោយខ្លួនឯងនេះ បានកើតឡើងនៅវេលាម៉ោង០៩និង២០នាទីយប់ថ្ងៃទី១០ ខែកញ្ញា ឆ្នាំ២០២០ នៅភូមិណាំតៅ ឃុំ ណាំតៅ ស្រុកភ្នំស្រុក ខេត្តបន្ទាយមានជ័យ ។
លោកវរសេនីយ៍ឯក យ៉ត សុផល អធិការនគរបាលខេត្តបន្ទាយមានជ័យ បានឲ្យដឹងថា ៖ ជនរងគ្រោះ ឈ្មោះ ជ្រឹង យុង ភេទប្រុសអាយុ៤១ឆ្នាំ នៅភូមិណាំតៅ ឃុំណាំតៅ ស្រុកភ្នំស្រុក ខេត្ត បន្ទាយមានជ័យ។
លោកអធិការបានបញ្ជាក់ថា ៖ តាមការរៀបរាបបំភ្លឺពីឈ្មោះ ចាន់ សាឃួន ភេទស្រី អាយុ៤៧ឆ្នាំ ត្រូវជាប្រពន្ធជនរងគ្រោះបានអោយដឹងថា នៅមុនពេលកើតហេតុ ខ្លួននិងប្ដី ក្រោយពេលហូបបាយល្ងាច រួចក៏នាំគ្នាឡើងទៅលើផ្ទះបើកទូរទស្សន៍ លុះដល់ម៉ោងប្រហែល ៩និង២០នាទីយប់ ថ្ងៃទី១០ ខែកញ្ញា ឆ្នាំ២០២០ ប្ដីរបស់ខ្លួន បានក្រោកដើរទៅបត់ជើងតូច និងរ៉ង់ដាផ្ទះចំហៀងខាងជើង ពេលនោះគាត់បានឮសូរសំឡេងធ្លាក់ពីលើផ្ទះ ហើយក៏ស្ទុះទៅមើលឃើញប្តីរបស់គាត់ធ្លាក់ពីលើផ្ទះ នៅពេលនោះក៏បានចុះមកលើកប្ដី ហើយស្រែកហៅឲ្យបងប្អូនជិតខាងជួយ និងបានយកប្ដីមកមន្ទីរពេទ្យបង្អែកស្រុកភ្នំស្រុក ពេលមកដល់បានមួយសន្ទុះ ប្ដីរបស់គាត់បានដាច់ខ្យល់ស្លាប់ នៅវេលាម៉ោង១០និង២២នាទីយប់ថ្ងៃដដែល ចំពោះប្តីរបស់គាត់ នៅយប់នោះមិនបានស្រវឹងស្រា ឬក៏ធ្លាប់មានជំងឺអ្វីដែរ ។
លោកអធិការបានបន្តឲ្យដឹងទៀតថា ពេលទទួលបានព័ត៌មានកម្លាំងជំនាញពិនិត្យវិភាគសហការជាមួយកម្លាំងប៉ុស្តិ៍ណាំតៅ ប្រធានមណ្ឌលសុខភាពណាំតៅ ចុះពិនិត្យសាកសពកន្លែងកើតហេតុ បើតាមកាសន្និដ្ឋាន សង្ស័យថា ជនរងគ្រោះបានក្រោកពីដេកទាំងមមីមមើ ដើរឆ្លងបង្កាន់ដៃដែកមកឈរបត់ជើងតូច លើសំយ៉ាបស៊ីម៉ងត៍មានទំហំប្រហែល១ម៉ែត្រខាងក្រៅបង្កាន់ដៃ ហើយក៏ច្រឡោតធ្លាក់មកដីតែម្តង បណ្តាលឲ្យត្រូវនឹងបង្គោលរបងព្រំដីបែកក្បាលផ្នែកចិញ្ចើមខាងស្តាំមានឈាមហូរច្រើន រងរបួសធ្ងន់ ។ ក្រោយមកក៏ស្លាប់នៅមន្ទីរពេទ្យ។ សពជនរងគ្រោះ ត្រូវបានប្រគល់ជូនក្រុមគ្រួសាររៀបចំធ្វើបុណ្យតាមប្រពៃណី៕ដោយ៖បញ្ញាស័ក្តិ
