ឧត្តរមានជ័យ៖ បុរស២នាក់បានសត្វកំភេមខ្មោចយកមកហូត បណ្តាលឲ្យពុលស្លាប់ ក្រោយបញ្ជូនទៅធ្វើការសង្គ្រោះនៅឯមន្ទីរពេទ្យខេត្តសៀមរាប ។
សមត្ថកិច្ចនគរបាលក្រុងសំរោង បានបញ្ជាក់ថា នៅថ្ងៃទី១០ ខែកញ្ញា ឆ្នាំ២០២០ ជនរងគ្រោះទាំង២នាក់ ដែលមានមុខរបរស៊ីឈ្នួលបើករថយន្តឲ្យគេ បាននាំគ្នាហូបសត្វកំភេមខ្មោច។ បន្ទាប់ពីបរិភោគរួច ក៏មានអាការពុល ត្រូវបានបញ្ជូនទៅសង្គ្រោះនៅឯមន្ទីរពេទ្យបង្អែកខេត្តឧត្តរមានជ័យ តែដោយអាការធ្ងន់ធ្ងរពេក ក៏បញ្ជូនបន្តទៅសង្គ្រោះ នៅឯមន្ទីរពេទ្យខេត្តសៀមរាប។
សមត្ថកិច្ចបានបន្តថា វេលាម៉ោង ១២និង០០នាទី ថ្ងៃទី១០ ខែកញ្ញា ជនរងគ្រោះទី១ ផុន ញូង អាយុ៣៨ឆ្នាំ បានស្លាប់នៅមន្ទីរពេទ្យខេត្តសៀមរាប លុះដល់ម៉ោង ១និង៣០នាទី ថ្ងៃទី១១ ខែកញ្ញា ជនរងគ្រោះទី២ ផល មួន អាយុ៤៧ឆ្នាំ ក៏បានស្លាប់នៅមន្ទីរពេទ្យសៀមរាបទៀត ហើយសពត្រូវបានក្រុមគ្រួសារយកមកធ្វើបុណ្យតាមប្រពៃណីនៅភូមិបាក់នឹម សង្កាត់សំរោង ក្រុងសំរោង ខេត្តឧត្តរមានជ័យ។
លោកវេជ្ជបណ្ឌិត ឃ្លោក ហួត ប្រធានមន្ទីរសុខាភិបាលខេត្តឧត្តរមានជ័យ បានថ្លែងបញ្ជាក់ថា មូលហេតុដែលបញ្ជូនជនរងគ្រោះទាំង២ ទៅសង្គ្រោះបន្តនៅខេត្តសៀមរាប ដោយសារពេទ្យនៅសៀមរាបមានឧបករណ៍គ្រប់គ្រាន់ ដូចជា ឧបករណ៍លាងតម្រងនោម ដោយសារជនរងគ្រោះនោមតិចទៅៗ ហើយការពុលនេះគឺប៉ះពាល់តម្រងនោម ដូច្នេះយើងត្រូវលាងវា ម្យ៉ាងទៀតជនរងគ្រោះ ពេលមកដល់មន្ទីរពេទ្យខេត្តមានអាការធ្ងន់ធ្ងរទៅៗហើយ។
លោកវេជ្ជបណ្ឌិត ឃ្លោក ហួត បានអំពាវនាវឲ្យបងប្អូនប្រជាពរដ្ឋយើង ត្រូវចូលរួមរក្សាអនាម័យជានិច្ចក្នុងការរស់នៅ ពោលគឺត្រូវហូបស្អាត ផឹកស្អាត រស់នៅស្អាត ដើម្បីការពារ ពីជំងឺផ្សេងៗ ពិសេសត្រូវហូបចំណីអាហារណាដែលយើងស្គាល់ច្បាស់ របស់ណាដែលយើងមិនស្គាល់ច្បាស់មិនត្រូវហូបនោះទេ ដូចជាផ្សិត ត្រីកំពតឬក៏សត្វផ្សេងៗ ដែលជាហេតុធ្វើឲ្យរងគ្រោះដោយការពុលរហូតស្លាប់៕
ដោយ៖បញ្ញាស័ក្តិ