ភ្នំពេញ៖លោក ពេជ្រ ស្រស់ ប្រធានគណបក្សយុវជនកម្ពុជា និងជាសមាជិកឧត្តមក្រុមប្រឹក្សាពិគ្រោះនិងផ្តល់យោបល់ បានថ្លែងថា បានទទួលបានតម្រុយពីប្រជាពលរដ្ឋ នៅភូមិរូង ឃុំក្រាំលាវ ស្រុកបាទី ខេត្តតាកែវ ថាមានករណីអភិបាលស្រុកបាទី ហាមឃាត់មិនឲ្យពលរដ្ឋធ្វើផ្លូវតាមខ្នងប្រឡាយ។
បើយោងតាមផេកហ្វេសប៊ុកផ្លូវការរបស់លោក ពេជ្រ ស្រស់ នាថ្ងៃទី១២ ខែកញ្ញា ឆ្នាំ២០២០ នេះ បានរៀបរាប់ថា ” (តម្រុយ) សម្រែកពលរដ្ឋ៖ មិនដឹងថាអភិបាលស្រុកបាទីមានគំនុំជាមួយនរណាទេ បានជាហាមឃាត់ និងមិនឲ្យពលរដ្ឋធ្វើផ្លូវតាមខ្នងប្រឡាយ គឺពលរដ្ឋរ៉ៃលុយគ្នាធ្វើនៅក្នុងភូមិរូង ឃុំក្រាំលាវ ស្រុកបាទី ខេត្តតាកែវ ហើយរឿងនេះគឺពលរដ្ឋក៏បានប្តឹងមកខ្ញុំម្តងហើយដែរ ក្រោយមកក៏មានមន្ត្រីខាងធនធានទឹក ចុះទៅពិនិត្យកន្លែងជាក់ស្តែង ប៉ុន្តែក៏ស្ងាត់ទៅវិញ ហើយឥឡូវអភិបាលស្រុកបាទី បានបញ្ជាឲ្យកាយលូចេញពីក្នុងប្រឡាយវិញ ដោយមិនឲ្យតភ្ជាប់លូជាប្រព័ន្ធរំដោះទឹកចេញបាន ” ។
លោកបន្តថា ” ករណីនេះខ្ញុំនឹងចុះទៅផ្ទាល់តែម្តង ដើម្បីដឹងច្បាស់ពីប្រភពជំទាស់នៅក្រោយខ្នង បើយោងតាមរដ្ឋមន្ត្រីធនធានទឹក បានមានប្រសាសន៍ថា ប្រឡាយអាចកាយជីកឲ្យជ្រៅបាន ក៏ប៉ុន្តែមិនអាចលុបបានទេ ចុះហេតុអ្វីបានជាលោកអភិបាលស្រុកបាទី រារាំងមិនឲ្យពលរដ្ឋធ្វើការស្តារប្រឡាយយ៉ាងដូច្នេះ ? ” ៕
ដោយ៖បញ្ញាស័ក្តិ
