ភ្នំពេញ៖ ប្រមុខការទូតកម្ពុជា បានបញ្ជាក់សាជាថ្មីនូវគោលការណ៍រដ្ឋធម្មុញ្ញ របស់ប្រទេសកម្ពុជា អំពីអព្យាក្រឹតភាពអចិន្ត្រៃយ៍ និងការមិនចូលបក្សសម្ព័ន្ធ ដែលមិនអនុញ្ញាត កម្ពុជាមានមូលដ្ឋានយោធាបរទេសនៅលើទឹកដីរបស់ខ្លួន ឬចូលរួមក្នុងសម្ព័ន្ធមិត្តនិងសន្ធិសញ្ញា យោធាណាមួយឡើយ។
ក្រសួងការបរទេស និងសហ ប្រតិបត្តិការអន្តរជាតិ បានចេញសេចក្ដីប្រកាសព័ត៌មានស្ដីពីលទ្ធផលកិច្ចប្រជុំវេទិកាតំបន់អាស៊ានលើកទី២៧ និងកិច្ចប្រជុំពាក់ព័ន្ធ តាមប្រព័ន្ធវីដេអូ នៅថ្ងៃទី១២ ខែកញ្ញា ឆ្នាំ២០២០។
ថ្ងៃទី១២ ខែកញ្ញា ឆ្នាំ២០២០ ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហ ប្រតិបត្តិការអន្តរជាតិ បានចូលរួមកិច្ចប្រជុំវេទិកាតំបន់អាស៊ានទី២៧ កិច្ចប្រជុំរដ្ឋមន្ត្រីការបរទេស អាស៊ានជាមួយសហភាពអឺរ៉ុប និងកិច្ចប្រជុំរដ្ឋមន្ត្រីការបរទេសអាស៊ានជាមួយឥណ្ឌា ក្នុងឱកាសកិច្ចប្រជុំ រដ្ឋមន្ត្រីការបរទេសអាស៊ានលើកទី ៥៣ និងកិច្ចប្រជុំពាក់ព័ន្ធផ្សេងទៀត ។
កិច្ចប្រជុំវេទិកាតំបន់អាស៊ានលើកទី២៧៖ កិច្ចប្រជុំបានផ្លាស់ប្តូរទស្សនៈលើបញ្ហាតំបន់ និងអន្តរជាតិ និងបានពិភាក្សាអំពី ទិសដៅនាពេល អនាគតរបស់វេទិកាតំបន់អាស៊ាន។ កិច្ចប្រជុំបានកត់សម្គាល់ពីសារសំខាន់នៃការចូលរួមចំណែក របស់វេទិកាតំបន់អាស៊ាន ក្នុងការថែរក្សាសន្តិភាព សន្តិសុខ និងស្ថិរភាព នៅអាស៊ីប៉ាស៊ីហ្វិក តាមរយៈ កិច្ចសន្ទនា និងការពិគ្រោះយោបល់ ដើម្បីលើកកម្ពស់ការកសាងទំនុកចិត្ត និងភាពជឿជាក់ ក្នុង ចំណោមនិងរវាងអ្នកចូលរួម។ កិច្ចប្រជុំក៏បានកត់សម្គាល់ដោយសេចក្ដីពេញចិត្តចំពោះការងារដែល វេទិកាតំបន់អាស៊ានកំពុងបំពេញ តាមរយៈវឌ្ឍនភាពនៃការអនុវត្តផែនការសកម្មភាពរបស់ទីក្រុង ហាណូយ និងបានពិនិត្យឡើងវិញនូវកិច្ចសហប្រតិបត្តិការក្នុងក្របខ័ណ្ឌវេទិកាតំបន់អាស៊ាន ក្នុង អំឡុងពេលនៃការ ផ្ទុះឡើងនៃជំងឺរាតត្បាតកូវីដ-១៩។
កិច្ចប្រជុំក៏បានអនុម័តសេចក្តីប្រកាសវេទិកាតំបន់អាស៊ាន ស្តីពីការលើកកម្ពស់កិច្ចសហប្រតិបត្តិការ ដើម្បីបង្ការ និងប្រឆាំងការរីករាលដាលនៃជំងឺឆ្លង សេចក្តីប្រកាសវេទិកាតំបន់អាស៊ាន ស្តីពីការប្រព្រឹត្ត លើកុមារដែលត្រូវបានជ្រើសរើស ឬជាប់ពាក់ព័ន្ធជាមួយក្រុមភេរវករ និងសេចក្តីប្រកាសវេទិកាតំបន់ អាស៊ាន ស្តីពីកិច្ចសហប្រតិបត្តិការក្នុងវិស័យសន្តិសុខ និងក្នុងការប្រើប្រាស់បច្ចេកវិទ្យា គមនាគមន៍ និងព័ត៌មាន នៅក្នុងបរិបទសន្តិសុខអន្តរជាតិ។ កិច្ចប្រជុំក៏បានទទួលស្គាល់ការបង្កើននូវតួនាទីកាន់តែសំខាន់នៃយន្តការវេទិកាតំបន់អាស៊ាន ដែលជាវេទិកាសម្រាប់កិច្ចសន្ទនា និងការពិគ្រោះយោបល់ និងកិច្ចសហប្រតិបត្តិការពហុភាគី ក្នុងអំឡុងពេល មានបញ្ហាប្រឈមកាន់តែខ្លាំងឡើង និងភាពមិនប្រាកដប្រជារបស់ពិភពលោក។
ឯកឧត្តមឧបនាយករដ្ឋមន្ត្រី បានសង្កត់ធ្ងន់លើបញ្ហាប្រឈមផ្នែកសន្តិសុខដ៏សំខាន់ចំនួន ២ គឺ ជំងឺ រាតត្បាតុវីដ-១៩ និងការប្រកួតប្រជែងរវាងប្រទេសមហាអំណាច និងការផ្តាច់ខ្លួនជាឯករតាភាគី ពីការប្តេជ្ញាចិត្តអន្តរជាតិ ក្នុងពេលមួយដែលពិភពលោកត្រូវការកិច្ចខិតខំប្រឹងប្រែងរួមគ្នាបន្ថែមទៀត។ ឯកឧត្តមឧបនាយករដ្ឋមន្ត្រី ក៏បានរំលឹកឡើងវិញនូវសេចក្តីប្រកាសរបស់រដ្ឋមន្ត្រីការបរទេសអាស៊ាន
ស្តីពីសារសំខាន់នៃការថែរក្សាសន្តិភាព និងស្ថិរភាព នៅតំបន់អាស៊ីអាគ្នេយ៍ ដែលបានបង្ហាញនូវបំណងប្រាថ្នាយ៉ាងមុតមាំ ដើម្បីរក្សាសន្តិភាព សន្តិសុខ ស្ថិរភាព និងអព្យាក្រឹតភាពក្នុងតំបន់។
ឯកឧត្តមឧបនាយករដ្ឋមន្ត្រី បានសង្កត់ធ្ងន់លើការប្តេជ្ញាចិត្តរបស់កម្ពុជាក្នុងការចៀសវាងការកាន់ជើង ភាគីណាមួយ ក្នុងបរិបទនៃការប្រកួតប្រជែងរបស់ប្រទេសមហាអំណាច និងការធ្លាក់ក្នុងអន្ទាក់នៃការ ប្រកួតប្រជែងនេះ ដោយកម្ពុជាត្រូវចងចាំអំពីសោកនាដកម្ម ពីអតីតកាលដ៏សោកសៅ ដែល កម្ពុជាធ្លាប់ឆ្លងកាត់ ។
ឯកឧត្តមឧបនាយករដ្ឋមន្ត្រី បានបញ្ជាក់សាជាថ្មីនូវគោលការណ៍រដ្ឋធម្មុញ្ញ របស់ប្រទេសកម្ពុជា អំពីអព្យាក្រឹតភាពអចិន្ត្រៃយ៍ និងការមិនចូលបក្សសម្ព័ន្ធ ដែលមិនអនុញ្ញាត កម្ពុជាមានមូលដ្ឋានយោធាបរទេសនៅលើទឹកដីរបស់ខ្លួន ឬចូលរួមក្នុងសម្ព័ន្ធមិត្តនិងសន្ធិសញ្ញា យោធាណាមួយឡើយ៕