ភ្នំពេញ៖ លោកជិន ម៉ាលីន អ្នកនាំពាក្យ និងជារដ្ឋលេខាធិការនៃក្រសួងយុត្តិធម៌ បានចេញសារ ៤ចំណុច អំពីកំណត់សង្ខេបព័ត៌មានស្តីពីកម្ពុជារបស់ OHCHR ដោយលោកបានបញ្ជាក់ថា វិធានការច្បាប់ទៅលើក្រុមគោលដៅរបស់គេនាពេលថ្មីៗនេះ មិនមែនដោយសារតែពួកគេធ្វើសកម្មភាពក្នុងការការពារសិទ្ធិសេរីភាព បរិស្ថាន និងប្រយោជន៍សាធារណៈនោះទេ តែដោយសារតែពួកគេប្រព្រឹត្តបទល្មើស ដែលមានបញ្ញាត្តិនៅក្នុងច្បាប់របស់កម្ពុជា ដោយមានអង្គការចាត់តាំងរៀបចំចាត់ចែងច្បាស់លាស់នៅពីក្រោយ។
សារទាំង ៤ចំណុចនោះមានខ្លឹមសារដូចខាងក្រោម៖
១. កំណត់សង្ខេបនេះ មិនមានមូលដ្ឋានគ្រប់គ្រាន់និងគ្រប់ជ្រុងជ្រោយក្នុងការសន្និដ្ឋាននិងវាយតម្លៃពីស្ថានការណ៍សិទ្ធិមនុស្សនៅកម្ពុជានោះទេ ព្រោះថា វាគ្រាន់តែជាការប្រមូលចងក្រងនូវព្រឹត្តិការណ៍នៃការអនុវត្តច្បាប់របស់សមត្ថកិច្ចតែប៉ុណ្ណោះ ដោយមិនបានធ្វើការវិភាគសិក្សាស៊ីជំរៅអំពីអង្គហេតុនិងអង្គច្បាប់នៃព្រឹត្តិការណ៍នីមួយៗឡើយ។ ការសន្និដ្ឋានរបស់គេ គឺផ្តោតជាសំខាន់តែទៅលើរូបភាពខាងក្រៅតែប៉ុណ្ណោះ ពោលគឺនៅពែលដែលសមត្ថកិច្ចអនុវត្តច្បាប់ចំពោះសកម្មជននិងក្រុមគោលដៅដែលគេការពារ គេសន្និដ្ឋានថាជាការរំលោភសិទ្ធិមនុស្ស តែគេមិនខ្ចីខ្វល់និងធ្វើការវិភាគវែកញែកពីទង្វើនិងសកម្មភាពរបស់ក្រុមគោលដៅទាំងនោះឡើយ ថាតើវាមានមូលដ្ឋាននិងធាតុផ្សំគ្រប់គ្រាន់បង្កើតបានជាបទល្មើសតាមបញ្ញត្តិច្បាប់របស់កម្ពុជាដែរឬអត់ ហើយពួកគេបានធ្វើអ្វីខ្លះបានជានាំឱ្យមានការប្រឈមមុខតាមផ្លូវច្បាប់យ៉ាងដូច្នេះ។
២. វិធានការច្បាប់របស់សមត្ថកិច្ចនាពេលកន្លងមកមិនបានផ្តោតជាក់លាក់ទៅលើក្រុមគោលដៅណាមួយនោះទេ ពោលគឺអនុវត្តជាទូទៅ មិនថាអ្នកទាំងនោះជាសកម្មជនសិទ្ធិមនុស្ស សង្គមស៊ីវីល នយោបាយ ឬបរិស្ថាននោះទេ ឱ្យតែប្រព្រឹត្តល្មើសទៅនឹងច្បាប់ ត្រូវទទួលខុសត្រូវតាមផ្លូវច្បាប់ដូចៗគ្នា ដោយមិនមានការលើកលែងឬអភ័យឯកសិទ្ធិពិសេសដោយឡែកណាមួយនោះទេ។ វិធានការច្បាប់ទៅលើក្រុមគោលដៅរបស់គេនាពេលថ្មីៗនេះ មិនមែនដោយសារតែពួកគេធ្វើសកម្មភាពក្នុងការការពារសិទ្ធិសេរីភាព បរិស្ថាន និងប្រយោជន៍សាធារណៈនោះទេ តែដោយសារតែពួកគេប្រព្រឹត្តបទល្មើស ដែលមានបញ្ញត្តិនៅក្នុងច្បាប់របស់កម្ពុជា ដោយមានអង្គការចាត់តាំងរៀបចំចាត់ចែងច្បាស់លាស់នៅពីក្រោយ ហើយដែលសមត្ថកិច្ចមានមូលដ្ឋានរឹងមាំក្នុងការចាត់វិធានការតាមផ្លូវច្បាប់និងដំណើរការនីតិវិធីតាមផ្លូវតុលាការ។
៣. ការអំពាវនាវឱ្យទម្លាក់ចោលបទចោទនិងដោះលែងជនជាប់ឃុំណាមួយជាបន្ទាន់និងគ្មានលក្ខខណ្ទក្រៅនីតិវិធីតុលាការ រួមទាំងការជួបជុំតវ៉ាបែបអនាធិបតេយ្យដាក់សម្ពាធលើស្ថាប័នកំពូលៗរបស់រដ្ឋ មិនមែនជាមធ្យោបាយតាមផ្លូវច្បាប់ក្នុងការការពារជនជាប់ចោទនោះទេ ហើយក៏មិនមានឥទ្ធិពលតាមផ្លូវច្បាប់អ្វីដែរមកលើការសម្រេចរបស់តុលាការដែលជាស្ថាប័នឯករាជ្យនៃរដ្ឋអធិបតេយ្យ។ តែផ្ទុយទៅវិញ មានតែការចូលរួមក្នុងដំណើរការនីតិវិធីតុលាការក្នុងការការពារខ្លួនតាមផ្លូវច្បាប់នោះទេ ដោយបង្ហាញសក្ខីកម្មនិងភស្តុតាងឱ្យបានរឹងមាំក្នុងការដោះបន្ទុក ទើបជាមធ្យោបាយស្របច្បាប់តែមួយគត់ក្នុងការពារជនជាប់ចោទ នៅក្នុងសង្គមប្រជាធិបតីនីតិរដ្ឋ។
៤. គ្រប់អង្គការសង្គមស៊ីវិលទាំងអស់ទាំងជាតិនិងអន្តរជាតិដែលធ្វើសកម្មភាពនៅកម្ពុជាត្រូវគោរពឱ្យបានខ្ជាប់ខ្ជួននូវអធិបតេយ្យភាពនិងបញ្ញត្តិច្បាប់ជាតិរបស់កម្ពុជាដែលមានជាធរមានជាពិសេសច្បាប់ស្តីពីសមាគមនិងអង្គការក្រៅរដ្ឋាភិបាល ហើយក្នុងករណីដែលមានមូលដ្ឋានច្បាស់លាស់បញ្ជាក់ពីសកម្មភាពមិនប្រក្រតីដែលជាការបំពានច្បាប់ នោះសមត្ថកិច្ចមានសិទ្ធិធ្វើការត្រួតពិនិត្យបានគ្រប់ពេល ដើម្បីធានាបាននូវប្រសិទ្ធភាពនៃការអនុវត្តច្បាប់ នៅក្នុងសង្គមប្រជាធិបតេយ្យនីតិរដ្ឋ៕ ដោយ៖កូឡាប