ក្រចេះ៖ ស្នងការដ្ឋាននគរបាលខេត្តក្រចេះ បានឲ្យដឹងថា ជនសង្ស័យ៣នាក់ សុទ្ធសឹងជាមុខសញ្ញាលួចយ៉ាងសកម្មដូចជាលួចកាច់សោ.កម៉ូតូនិងរថយន្ត បានសម្រេចជាច្រើនករណី ធ្លាប់ប្រព្រឹត្តនៅស្រុកស្នួល និងខេត្តដទៃទៀត ត្រូវបានកម្លាំងព្រហ្មទណ្ឌនគរបាលស្រុកស្នួល ដឹកនាំដោយលោកវរសេនីយ៍ឯក ចាន់ សុខគីម ធ្វើការស្រាវជ្រាវក្រសោបចាប់ខ្លួនបានជាបន្តបន្ទាប់នៅល្ងាចថ្ងៃទី១២ ខែកញ្ញា។
ជនទាំង៣នាក់ដែលត្រូវបានចាប់ខ្លួននេះមាន ១.ឈ្មោះ រ៉ ហ្វាត អាយុ២១ឆ្នាំ ជនជាតិខ្មែរឥស្លាម រស់នៅភូមិកំពង់ទ្រាស ឃុំកំពង់ទ្រាស ស្រុកក្រូចឆ្មារ ខេត្តត្បូងឃ្មុំ។ ២.ឈ្មោះរិន រី អាយុ២៥ឆ្នាំ រស់នៅភូមិកូវ ឃុំក្រែក ស្រុកពញាក្រែក ខេត្តត្បូងឃ្មុំ។
៣.ឈ្មោះរេន ម៉ាប់ អាយុ២២ឆ្នាំ រស់នៅភូមិពណ្ណរាយ សង្កាត់សួង ក្រុងសួង ខេត្តត្បូងឃ្មុំ ជននេះ ជាមុខសញ្ញាពាក់ព័ន្ធករណីប្លន់ប្រដាប់អាវុធនៅខេត្តស្វាយរៀងកាលពីថ្ងៃទី១២ ខែកញ្ញា ឆ្នាំ២០២០ និងបានរត់មកសម្ងំលាក់ខ្លួននៅស្រុកស្នួល។
អធិការនគរបាលស្រុកស្នួល លោកវរសេនីយ៍ឯក ចាន់ សុខគីម បានឲ្យដឹងថា ក្រុមជនសង្ស័យត្រូវបាននាំខ្លួនមកសាកសួរនៅអធិការដ្ឋាន ដើម្បីបន្តនីតិវិធី៕ដោយ៖បញ្ញាស័ក្តិ