ភ្នំពេញ៖ រាត្រីថ្ងៃទី១៣ ខែកញ្ញា ឆ្នាំ២០២០ កងយោធាមួកខៀវកម្ពុជាចំនួន១៣៩ នាក់ក្នុងចំណោមនោះនារីចំនួន១១នាក់ បាននិវត្តមកដល់កម្ពុជាដោយសុវត្ថិភាព បន្ទាប់ពីបានបញ្ចប់បេសកកម្មរក្សាសន្តិភាពក្រោមឆត្រអង្គការសហប្រជាជាតិនៅសាធារណរដ្ឋម៉ាលី រយៈពេល១ឆ្នាំ ហើយចាត់បញ្ជូនទៅធ្វើចត្តាឡីស័ក។
ឯកឧត្តម នាយឧត្តមសេនីយ៍ សែម សុវណ្ណនី អនុប្រធានគណៈកម្មាធិការជាតិ និងជាអគ្គនាយកមជ្ឈមណ្ឌលជាតិរក្សាសន្តិភាពរក្សាសន្តិភាព ព្រមទាំងនាយទាហាន នាយទាហានរង មជ្ឈមណ្ឌលជាតិជាច្រើនរូបទៀត បានអញ្ជើញទទួលស្វាគមន៍កងកម្លាំងយោធាមួកខៀវ នៅព្រលានយន្តហោះអន្តរជាតិភ្នំពេញ។
ឯកឧត្តម ឧត្តមសេនីយ៍ឯក អោក សៀង អគ្គនាយករងមជ្ឈមណ្ឌលជាតិរក្សាសន្តិភាព និងជាអនុប្រធានគណៈកម្មការការងារកូវីដ-១៩ នៃមជ្ឈមណ្ឌលជាតិរក្សាសន្តិភាព បានថ្លែងបញ្ជាក់ថាៈ កងយោធាមួកខៀវកម្ពុជា ដែលទើបធ្វើមាតុភូមិនិវត្តន៍មកដល់កម្ពុជានាពេលនេះ ត្រូវបានចាត់បញ្ជូនទៅធ្វើចត្តាឡីស័កនៅវិទ្យាស្ថានហ្វឹកហ្វីនកងកម្លាំងរក្សាសន្តិភាព បណ្តុះបណ្តាលបោសសម្អាតមីន និងកាកសំណល់សង្គ្រាមនៅស្រុកឧដុង្គចំនួន៤៥នាក់ ក្នុងនោះនារីមួយនាក់ និង នៅសាលាហ្វឹកហ្វឺនកងកម្លាំងពហុសាន៍ ស្ថិតក្នុងស្រុកភ្នំស្រួច ខេត្តកំពង់ស្ពឺ ចំនួន៩៤នាក់ ក្នុងនោះនារីចំនួន១០នាក់។
សូមបញ្ជាក់ថា នៅអាកាសយាន្តដ្ឋានអន្តរជាតិភ្នំពេញ នៅពីថ្ងៃទី ១១ ខែកញ្ញា ឆ្នាំ ២០២០ ឯកឧត្តម នាយឧត្តមសេនីយ៍ សែម សុវណ្ណនី អនុប្រធានគណៈកម្មាធិការជាតិ និងជាអគ្គនាយកមជ្ឈមណ្ឌលជាតិរក្សាសន្តិភាព អញ្ជើញជាអធិបតីក្នុងពិធិជូនដំណើរកងកម្លាំងរក្សាសន្តិភាពកម្ពុជា ចំនួន២ កងមានកងអនុសេនាធំវិស្វកម្មព្រលានយន្តហោះ និងកងអនុសេនាធំកងម្ទេចគ្រាប់ មានចំនួនសរុប២១៨នាក់ ក្នុងនោះក៏មានកម្លាំងនារី១៨នាក់ ទៅចូលរួមបំពេញបេសកកម្មអង្គការសហប្រជាជាតិ នៅសាធារណរដ្ឋម៉ាលី ដើម្បីប្តូរវេនកម្លាំងចាស់ នឹងត្រូវធ្វើមាតុភូមិនិវត្តន៍នៅថ្ងៃទី១៣ ខែកញ្ញា ឆ្នាំ២០២០នេះផងដែរ៕ ដោយ៖កូឡាប
