តាកែវ ៖ កាលពីថ្ងៃទី២១ ខែកក្កដា កន្លងមក សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី បានអញ្ចើញមកចូលរួមភ្ជួររាស់ សាបព្រោះ និងប្រមូលផលស្រូវវស្សាដើមរដូវ និងអញ្ជើញជាអធិបតីដ៏ខ្ពង់ខ្ពស់ក្នុងពិធីសំណេះសំណាល ជាមួយសមាជិកសហគមន៍កសិករប្រើប្រាស់ទឹកប្រឡាយមេតាស៊ូង ក្នុងភូមិពន្ទង ឃុំបានកាម ស្រុកព្រៃកប្បាស ខេត្តតាកែវ។
ក្នុងឱកាសនោះ សម្តេចបានសន្យាជាមួយប្រជាកសិករថា ជួយឧបត្ថម្ភជាឧបករណ៍ដាំគ្រាប់ស្រូវដើម្បីជួយពន្លឿន ការងារបង្កបង្កើនផល កាត់បន្ថយកំលាំងពលកម្ម ចំណេញពេលវេលា និងជាពិសេសចូលរួមអភិវឌ្ឍន៍វិស័យផលិតកម្មស្រូវតាមរយ:ការប្រើគ្រឿងចក្រទំនើបទាន់សម័យ មានលក្ខណ:ងាយស្រួលសម្រាប់កសិករ។
ដូចដែលបានសន្យា នាព្រឹកថ្ងៃអាទិត្យ ទី១៣ ខែកញ្ញា ឆ្នាំ២០២០ ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ តំណាងដ៏ខ្ពង់ខ្ពស់សម្តេចតេជោ បាននាំយកឧបករណ៍ដាំគ្រាប់ស្រូវចំនួន ១៣០គ្រឿង ដែលជាអំណោយដ៏ថ្លៃថ្លារបស់សម្តេចតេជោ មកចែកជូនប្រជាកសិករចំនួន ១៣០នាក់ ដែលពិធីនេះបានរៀបចំនៅក្នុងសាលាស្រុកព្រៃកប្បាស។
ក្នុងពិធីនេះក៏មានការអញ្ជើញចូលរួមផងដែរពី សំណាក់ឯកឧត្តម ថាន់ សុខា អភិបាលរងខេត្ត ឯកឧត្តមរដ្ឋ និងអនុរដ្ឋលេខាធិការ ឯកឧត្តមប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយកនៃអគ្គនាយកដ្ឋានកសិកម្ម នាយកគម្រោងស្តីពី “កម្មវិធីខ្សែសង្វាក់តម្លៃកសិកម្មកម្ពុជា ហៅថា CAVAC” មន្ត្រីជំនាញ និងអាជ្ញាធរមូលដ្ឋានយ៉ាងច្រើនកុះករ។
ជាសង្ខេប លោកប្រធានមន្ទីរកសិកម្ម រុក្ខាប្រមាញ់ និងនេសាទ បានរាយការណ៍ជូនជ្រាបអំពីល្បឿនបង្កបង្កើនផល និងបញ្ហាប្រឈមសំខាន់ៗមួយចំនួនដែលប្រជាកសិករនៅទូទាំងខេត្តតាកែវកំពុងជួបប្រទះ។
ឆ្លៀតយកឱកាសនេះ ឯកឧត្តមរដ្ឋមន្ត្រីបានធ្វើការសំណេះសំណាលដោយបានពាំនាំនូវការផ្តាំផ្ញើសាកសួរសុខទុក្ខពីសម្តេចតេជោ ហ៊ុន សែន នាយករដ្ឋមន្ត្រី សម្តេចកិត្តិព្រឹត្តបណ្ឌិត មកជូន ព្រមទាំងជូនពរឲ្យបង ប្អូនប្រជាពលរដ្ឋគ្រប់ៗក្រុមគ្រួសារឲ្យជួបតែពុទ្ធពរទាំង ៤ប្រការ។
ទាក់ទងនឹងកម្មវិធីនាព្រឹកនេះ ឯកឧត្តមរដ្ឋមន្ត្រីជម្រាបជូនអង្គពិធីថា ឧបករណ៍នេះគឺជាធាតុចូលមួយផ្នែកយ៉ាងសំខាន់សម្រាប់ជួយជំរុញល្បឿនបង្កបង្កើន ផលស្រូវឲ្យបានទាន់ពេលវេលា ស្របទៅនឹងអនុសាសន៍ដ៏ខ្ពង់ខ្ពស់របស់សម្តេចតេជោ ដែលបានជំរុញឲ្យប្រជាកសិករ ពិសេសក្រសួងឲ្យខិតខំយកចិត្តទុកដាក់ក្នុងការផលិតស្បៀងដើម្បីធានាឲ្យបាននូវសន្តិសុខស្បៀងក្នុងគ្រួសារ ឈានជាជំហានៗទៅបង្កើនបរិមាណ៕ដោយ៖កូឡាប
