ភ្នំពេញ៖ ក្រោយបញ្ចប់ការសួរនាំ នៅព្រឹកថ្ងៃទី៧ ខែកុម្ភៈ ឆ្នាំ២០១៨នេះ តុលាការកំពូល បានសម្រេចបន្តឃុំខ្លួនជនជាប់ចោទ ទេព វន្នី ដាក់ពន្ធនាគារដដែល ពាក់ព័ន្ធករណីប្រើអំពើហិង្សាលើសន្តិសុខពីរនាក់ បណ្តាលឲ្យរងរបួសធ្ងន់។ខណៈដែលអ្នកគាំទ្រជនជាប់ចោទជាច្រើននៅតែបន្តការតវ៉ាអស់រយៈពេលជិត១ឆ្នាំកន្លះមកហើយ ចាប់តាំងពីអ្នកស្រីត្រូវបានចាប់ខ្លួន។
ក្រោយបញ្ចប់ការសួរនាំជនជាប់ចោទ ទេព វន្នី ត្រូវបានមន្ត្រីអនុរក្សពន្ធនាគារបញ្ជូនត្រឡប់ទៅវិញ។ អំឡុងពេលសវនាការ ភាគីដើមបណ្ដឹងនិងសាក្សីដាក់បន្ទុកមិនបានបង្ហាញវត្តមាននៅក្នុងសវនាការនោះទេ ដែលនាំឲ្យភាគីជាប់ចោទគ្មានឱកាសជជីកសួរដេញដោលបាន។ ករណីនេះគឺដូចគ្នាទៅនឹងសវនាការនៅសាលាដំបូងរាជធានីភ្នំពេញនិងសវនាការនៅសាលាឧទ្ធរណ៍ផងដែរ។ មិនតែប៉ុណ្ណោះ សាក្សីដោះបន្ទុកមិនត្រូវបានអនុញ្ញាតឱ្យធ្វើជាកសិណសាក្សីនោះទេ ទោះបីជាពួកគាត់បានបង្ហាញវត្តមាននៅក្នុងសវនាការក៏ដោយ។
គួរបញ្ជាក់ថា ជនជាប់ចោទ ទេព វន្នី អាយុ៣៥ឆ្នាំ ជាប់ចោទពីបទ ហិង្សាដោយចេតនាមានស្ថានទម្ងន់ទោស ប្រព្រឹត្តនៅចំណុចខាងកើតវិមានឯករាជ្យ សង្កាត់ទន្លេបាសាក់ ខណ្ឌចំការមន កាលពីថ្ងៃទី១៣ ខែមិនា ឆ្នាំ២០១៣ ហើយត្រូវបាននាំខ្លួនមកកាត់ទោសនៅព្រឹកថ្ងៃនេះ។កន្លងមកសាលាដំបូងរាជធានីភ្នំពេញ និងសាលាឧទ្ធរណ៍ បានផ្តន្ទាទោសជនជាប់ចោទ ទេព វន្នី ដាក់ពន្ធនាគាររយៈពេល២ឆ្នាំ៦ខែ ពីបទ ហិង្សាដោយចេតនាមានស្ថានទម្ងន់ទោស តាមមាត្រា២១៨ នៃក្រមព្រហ្មទណ្ឌ។ ប៉ុន្តែជនជាប់ចោទ ទេព វន្នី មិនសុខចិត្តទើបប្តឹងសារទុក្ខមកតុលាការកំពូល។
បើតាមការផ្សាយរបស់អង្គការលីកាដូនៅថ្ងៃទី៧កុម្ភៈនេះ បានបញ្ជាក់ថា អំឡុងពេលតវ៉ាកាលពីថ្ងៃទី១៣ ខែមីនា ឆ្នាំ២០១៣ ក្នុងរាជធានីភ្នំពេញ ដើម្បីទាមទារឲ្យមានការដោះលែង សកម្មជនបឹងកក់មួយរូបផ្សេងទៀត នគរបាលនិងកងសន្ដិសុខជាច្រើននាក់ បានប្រើអំពើហិង្សាលើអ្នកស្រី ទេព វន្នី និងសមាជិកសហគមន៍បឹងកក់មួយចំនួនទៀត បណ្ដាលឲ្យរងរបួស។ ប៉ុន្តែអ្នកស្រី បែរជាត្រូវបានសាលាដំបូងរាជធានីភ្នំពេញផ្ដន្ទាទោសនៅថ្ងៃទី២៣ ខែកុម្ភៈ ឆ្នាំ២០១៧ ពី “បទប្រើអំពើហិង្សាដោយចេតនា មានស្ថានទម្ងន់ទោស” ទៅវិញ ទោះបីជាមិនមានភស្ដុតាងគួរឲ្យជឿទុកចិត្តណាមួយ ត្រូវបានបង្ហាញឡើងនៅក្នុងសវនាការក៏ដោយ។ អ្នកស្រី ទេព វន្នី ត្រូវបានសាលាដំបូងរាជធានីភ្នំពេញនិងសាលាឧទ្ធរណ៍ ផ្ដន្ទាទោសឲ្យជាប់ពន្ធនាគាររយៈពេល២ឆ្នាំកន្លះ និងពិន័យជាប្រាក់ ព្រមទាំងសំណងទៅដើមបណ្ដឹង សរុបទាំងអស់ចំនួន ១៤លានរៀល (ប្រហែល ៣៥០០ ដុល្លារអាមេរិក)។ គិតចាប់តាំងពីថ្ងៃចាប់ខ្លួន នៅថ្ងៃទី១៥ ខែសីហា ឆ្នាំ២០១៦ អ្នកស្រី ទេព វន្នី ត្រូវបានឃុំខ្លួនក្នុងពន្ធនាគារអស់រយៈពេល៥៤១ថ្ងៃមកហើយ។ សាលដីកាថ្ងៃនេះគឺជាករណីមួយក្នុងចំណោមករណីបីផ្សេងទៀត ដែលអសកម្មអស់រយៈពេលច្រើនឆ្នាំមកហើយ ប៉ុន្តែត្រូវបានសើរើឡើងវិញប្រឆាំងនឹង អ្នកស្រី ទេព វន្នី កាលពីខែសីហា ឆ្នាំ២០១៦ អំឡុងពេលអ្នកស្រីកំពុងស្ថិតក្រោមការឃុំខ្លួនបណ្ដោះអាសន្នរង់ចាំសវនាការលើបទចោទផ្សេងទៀត ពាក់ព័ន្ធនឹងយុទ្ធនាការអហិង្សាថ្ងៃច័ន្ទពណ៌ខ្មៅ ដើម្បីទាមទារឱ្យដោះលែងអ្នកការពារសិទ្ធិមនុស្ស៥នាក់៕ ដោយ៖បញ្ញាស័ក្តិ
