រាជធានីភ្នំពេញ ៖ ឯកឧត្តម ឧត្តមសេនីយ៍ឯក ឆាយ គឹមខឿន អគ្គស្នងការរងនគរបាលជាតិ បានជំរុញដល់កងកម្លាំង នៃនាយកដ្ឋាននគរបាលការពារទាំងអស់ ត្រូវតែបង្កើនការប្រុងប្រយ័ត្នបន្ថែមទៀត ក្នុងការពង្រឹងសន្តិសុខតាមបណ្តាគោលដៅនយោបាយ ការទូត វប្បធ៌ម សេដ្ឋកិច្ចពិសេសស្ថាប័នកំពូលៗរបស់ជាតិ ដែលជាគោលដៅស្នូលរបស់ខ្លួន បើទោះបីជាប្រទេសកម្ពុជាពុំមានអំពើភេរវកម្ម និងជម្លោះប្រដាប់អាវុធក៏ដោយ។
ថ្លែងនៅក្នុងពិធីសំណេះសំណាលដល់កងកម្លាំង នៃនាយកដ្ឋាននគរបាលការពារ ក្នុងឱកាសបុណ្យភ្ជុំបិណ្ឌ នាព្រឹកថ្ងៃទី១៤ ខែកញ្ញា ឆ្នាំ ២០២០នេះ នៅអគ្គស្នងការដ្ឋាននគរបាលជាតិ ឯកឧត្តម ឧត្តមសេនីយ៍ឯក ឆាយ គឹមខឿន អគ្គស្នងការរងនគរបាលជាតិ បានលើកឡើងថា នាពេលបច្ចុប្បន្ននេះ ប្រទេសកម្ពុជាកំពុងមានសុខសន្តិភាព និងការអភិវឌ្ឍន៍ជាបន្តបន្ទាប់ ប៉ុន្តែក្នុងនាមយើងជានគរបាលការពារ គោលដៅត្រូវតែធ្វើការប្រុងប្រយ័ត្នជានិច្ចនិងត្រូវកែលម្អរាល់ភាពចន្លោះប្រហោង នាពេលកន្លងមក ។
ឯកឧត្តម ឧត្តមសេនីយ៍ឯក អគ្គស្នងការរងនគរបាលជាតិ បានលើកឡើងថា «គ្រប់អង្គទូតទាំងអស់ត្រូវបានទទួលកិច្ចការពារសុវត្ថិភាព ពិសេសស្ថានទូតនៃប្រទេសមហាអំណាចធំៗ សុទ្ធតែជាគោលដៅស្នូលដែលមិនអាចធ្វេសប្រហែសបានឡើយ។ បញ្ហាសំខាន់នោះ គឺត្រូវខិតខំធានាឱយបាននូវសុវត្ថិភាពទាំងស្រុង នៅតាមគោលដៅដើម្បីរក្សាកិត្តិយសនគរបាលជាតិ និងលើកស្ទួយកិត្បានុភាពជាតិ។ មួយវិញទៀត ត្រូវតែត្រៀមខ្លួនជានិច្ចដើម្បីជួយអន្តរាគមន៍ ដោះស្រាយសភាពការណ៍នានាដែលអាចកើតឡោះងជាយថាហេតុ ។
ជាមួយគ្នានោះដែរ ឯកឧត្តម ឧត្តមសេនីយ៍ឯក ឆាយ គឹមខឿន បានសំណូមពរឱ្យបន្តខិតខំបំពេញការងាររបស់ខ្លួន ដែលថ្នាក់លើដាក់ឲ្យនោះប្រកបដោយ ក្រមសីលធម៌និងវិជ្ជាជីវៈ មិនត្រូវធ្វើអ្វីដោយបំពានបទបញ្ជា និងល្មើសវិន័យកងកម្លាំងនគរបាល ឬប្រព្រឹត្តខុសច្បាប់រដ្ឋឡើយ។ មួយវិញទៀត ត្រូវធ្វើជាគំរូដ៏ល្អ ក្នុងការអនុវត្តច្បាប់ចរាចរណ៍ផ្លូវគោក និងត្រូវចៀសវាងឲ្យឆ្ងាយពីគ្រឿងញៀន ។
ត្រូវអនុវត្តន៍ឲ្យបានគ្រប់ពេលវេលាទាំងអស់ ក្នុងកិច្ចការពារការឆ្លងរាលដាលនៃវីរ៉ុសកូវីដ-១៩ ស្របទៅតាមវិធានសុខាភិបាល ៕
ដោយ៖បញ្ញាស័ក្តិ