ភ្នំពេញ ៖ នៅរសៀលថ្ងៃទី១៤ ខែកញ្ញា ឆ្នាំ២០២០ ឯកឧត្តម ឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ បានអញ្ជើញដឹកនាំកិច្ចប្រជុំផ្សព្វផ្សាយដល់លោក លោកស្រីស្នងការរងទាំងអស់ ត្រូវចុះដោយផ្ទាល់តាមគ្រប់គោលដៅ និងប៉ុស្តិ៍នគរបាលរដ្ឋបាលទាំង១០៥ ដើម្បីផ្តល់ជូនជាទឹកបរិសុទ្ធ ភេសជ្ជៈ និងថវិកាមួយចំនួន ផ្តល់ជូនកម្លាំងតាមគ្រប់គោលដៅ ប៉ុស្តិ៍នគរបាលរដ្ឋបាល ។
នាឱកាសនោះ ឯកឧត្តម ស ថេត ក៏បានប្រាប់លោក លោកស្រីស្នងការរងទាំងអស់ត្រូវនាំយកមតិណែនាំរបស់ឯកឧត្តមជូនដល់មន្ត្រីប្រចាំការតាមគ្រប់គោលដៅទាំងអស់ត្រូវជួយសម្រួលចរាចរណ៍ជូនថ្នាក់ដឹកនាំ ប្រជាពលរដ្ឋ និងភ្ញៀវជាតិ អន្តរជាតិ ដើម្បីកាត់បន្ថយការកកស្ទះក្នុងពិធីបុណ្យភ្ជុំបិណ្ឌ ។ ចំណែកតាមអធិការដ្ឋាននគបាលខណ្ឌ និងប៉ុស្តិ៍នគរបាលរដ្ឋបាល ត្រូវតែមានមន្ត្រីប្រចាំការ ២៤ម៉ោងលើ២៤ម៉ោង ដើម្បីដោះស្រាយបញ្ហានានាជូនប្រជាពលរដ្ឋ ។
ឯកឧត្តម ឧត្តមសេនីយ៍ឯក ស ថេត បានបញ្ជាក់បន្ថែមថា មន្ត្រីទាំងអស់ត្រូវបំពេញភារកិច្ច តួនាទីឲ្យបានល្អ បង្ហាញអាកប្បកិរិយា និងសម្តីឲ្យបានសមរម្យជាកងកម្លាំង ជាពិសេសត្រូវកាត់សក់ខ្លីជានិច្ច ។ ជាពិសេសត្រូវតែធ្វើអនាម័យនៅកន្លែងការងារឲ្យបានស្អាត ដើម្បីបង្ការ និងទប់ស្កាត់រាល់ជំងឺផ្សេងៗកុំឲ្យកើតមានឡើង ។
ឯកឧត្តមស្នងការ បានបញ្ជាក់ដល់សមត្ថកិច្ចទាំងអស់ ត្រូវមានការប្រុងប្រយ័ត្នខ្ពស់ នឹងត្រៀមជានិច្ចដើម្បីបង្ការ និងទប់ស្កាត់រាល់ករណីល្មើសនានា ដូចជាករណីលួច ឆក់ គាស់ទ្វារ ឬកញ្ចក់រថយន្តយកទ្រព្យសម្បត្តិប្រជាពលរដ្ឋ ដែលបាននាំយកម្ហូបអាហារទៅប្រគេនព្រះសង្ឃ និងទៅដើរលេងតាមទីកន្លែងកម្សាន្តនានាក្នុងរាជធានីភ្នំពេញ ៕
ដោយ: កូឡាប
