ភ្នំពេញ៖ លោកវីល្លាម ប្រធានគណបក្សខ្មែរក្រោក បានលើកឡើងថា ថ្មីៗនេះមានសារព័ត៌មានក្នុងស្រុក បានផ្សាយអំពីរូបភាពបុរសវៀតណាមម្នាក់ ដែលបង្ហោះពីសមិទ្ធផលត្បូងថ្មមានតម្លៃ ដែលសារព័ត៌មានអះអាងថា រ៉ែនោះយកចេញពីកម្ពុជា។
លោកបានបន្តថា ពិតណាស់ត្បិតនេះ ជារូបដែលបង្ហោះដោយជនជាតិវៀតណាមម្នាក់ ហើយពិបាកវាយតម្លៃថាពិត ឬមិនពិតណាស់ តែយ៉ាងណាមិញវាក៏ជាតម្រុយដែលនាំឲ្យយើងគិតដល់ប្រធានបទពាក់ព័ន្ធនិងធនធានរ៉ែនេះដែរ ព្រោះកន្លងមកពិតជាមានព័ត៌មានល្ហៀងថា មានក្រុមហ៊ុនបរទេសមួយចំនួនពិតជាបានធ្វើសកម្មភាពរុករករ៉ែនៅកម្ពុជាពិតមែន រហូតមានក្រុមហ៊ុនរុករករ៉ែខ្លះ ប្រព្រឹត្តសកម្មភាពទាំងខុសច្បាប់ទៀតផង គឺ២ក្រុមហ៊ុនដែលរុករករ៉ែស្ពាន់នៅសៀមរាបកន្លងមក ។
ប្រធានគណបក្សខ្មែរក្រោក បានសង្កត់ធ្ងន់ថា “និយាយមកដល់នេះ ខ្ញុំមានចំណេះដឹងតិចផ្នែកហ្នឹងណាស់ តែដឹងច្រើនតែម្យាងគត់ គឺ រ៉ែ វានៅក្នុងដីរបស់ខ្មែរ អាចនិយាយបែបមិនសូវយល់បានថា វាជារបស់យើងទាំងអស់គ្នា ? តែបើមើលទៅរូបខាងលើយើងមានការពិចារណាថា ចុះដល់តែវៀតណាមឬបរទេសបានយកបាន ឬយើងគ្មានសមត្ថភាពយកបានតើមែនទេ ? ឬធនធាននិងយើងមិនអាចប្រើប្រាស់បាន ឬដល់តែនាំចេញទៅគេកែច្នៃរួចទើបយើងទិញតពីគេ ?”។
“ពាក់ព័ន្ធនិងបញ្ហានេះខ្ញុំលើកទឹកចិត្តឲ្យពាណិជ្ជករខ្មែរសិក្សាមើលចំពោះការរុករករ៉ែ និងហ៊ានស្នើសុំអាជ្ញាប័ណ្ណដើម្បីរុករក និងយកសមិទ្ធផលនោះមកផ្គត់ផ្គង់ទីផ្សារក្នុងស្រុកផង បរទេសផង ។ ហើយសង្ឃឹមថា អាជ្ញាប័ណ្ណរុករករ៉ែ ផ្ដល់ឲ្យតាមតែលក្ខខណ្ឌច្បាប់ដោយមិនផ្ដោតលើ «ស្រម៉ូម» និងលើកទឹកចិត្តឲ្យមានការវិនិយោគលើវិស័យកែច្នៃធនធានរ៉ែនេះដើម្បីជាប្រយោជន៍ឲ្យបានច្រើនបន្ថែមទៅទៀត” លោកបន្ថែមយ៉ាងដូច្នេះ។
លោកបានបញ្ជាក់ថា ហើយអ្វីដែលល្អវិសេសបំផុត ប្រសិនជារដ្ឋជាអ្នករុករក ហើយបើកឱកាសឲ្យឯកជនមកវិនិយោគជាមួយទើបកាន់តែប្រសើរលើការរុករករ៉ែនេះ ដើម្បីជាសក្ខីកម្មនៃ ការយករ៉ែក្រោមដីខ្មែរបម្រើប្រយោជន៍ខ្មែរយ៉ាងពិតប្រាកដ ៕ ដោយ៖កូឡាប
