សៀមរាប ៖ ស្ត្រីម្នាក់ជាជនសង្ស័យដែលធ្វើសកម្មភាពលួចដោះក្រវិលពីត្រចៀកក្មេងៗ រួមជាមួយនឹងវត្ថុតាងក្រវិលចំនួន២គូរ (១គូទម្ងន់២ហ៊ុន និង១គូរទៀតទម្ងន់៣ហ៊ុន) ត្រូវបានកម្លាំងព្រហ្មទណ្ឌស្រុកប្រាសាទបាគង កសាងសំណុំរឿងបញ្ជូនទៅតុលាការ។
លោកវរសេនីយ៍ឯក លឹម សម្បត្តិ អធិការដ្ឋាននគរបាលស្រុកប្រាសាទបាគង បានថ្លែងថា អនុវត្តតាមការណែនាំរបស់ លោកឧត្តមសេនីយ៍ទោទិត្យ ណារ៉ុង ស្នងការនៃស្នងការដ្ឋាននគរបាលខេត្តសៀមរាប និងលោកឧត្តមសេនីយ៍ត្រីភឹង ចិន្តារ៉េតស្នងការរងទទួលផែនការងារព្រហ្មទណ្ឌ ក៏ដូចជាអនុវត្តន៍តាមផែនការរបស់គណៈបញ្ជាការឯកភាពស្រុកប្រាសាទបាគង កាលពីវេលាម៉ោង១២ និង០០នាទី ថ្ងៃទី១៤ ខែកញ្ញា ឆ្នាំ២០២០ម្សិលមិញ បន្ទាប់ពីទទួលសេចក្តីរាយការណ៍ពីបងប្អូនប្រជាពលរដ្ឋ ថាមានមនុស្សស្រីម្នាក់ ជិះម៉ូតូម៉ាកហុងដា ស៊េរីឆ្នាំ២០០៥ ពណ៌ក្រហម មកធ្វើសកម្មភាព លួចដោះក្រវិលកូនគាត់ ចំណុចភូមិពពេលឃុំបល្ល័ង្ក ស្រុកប្រាសាទបាគង ខេត្តសៀមរាប កម្លាំងនគរបាលប៉ុស្តិ៍រដ្ឋបាលបាគង និងកម្លាំងប្រជាការពារ សហការជាមួយកម្លាំងអធិការដ្ឋាននគរបាលស្រុកប្រាសាទបាគង បានធ្វើការប្រដេញ និងស្ទាក់តាមផ្លូវចាប់ឃាត់ខ្លួនបានភ្លាមៗតែម្តង។
តាមចម្លើយសារភាព ជនសង្ស័យមានឈ្មោះ ភួង សុជាតិ ហៅចំបើង ភេទស្រី អាយុ២៤ឆ្នាំនៅភូមិលលៃ ឃុំបាគង ស្រុកប្រាសាទបាគង ខេត្តសៀមរាប (ជាជនសង្ស័យ) បានឆ្លើយថា ខ្លួនពិតបានធ្វើសកម្មភាពលួចដោះក្រវិល (លោហៈធាតុពណ៌លឿង) ពីត្រចៀកក្មេងៗ ពិតប្រាកដមែន ហើយធ្លាប់ធ្វើសកម្មភាពលួចជាច្រើនលើកផងដែរ ។
វត្ថុតាងដកហូតបាន ម៉ូតូម៉ាកហុងដាស៊េរីឆ្នាំ២០០៥ ពណ៌ក្រហមដែលជនសង្ស័យជិះ ធ្វើសកម្មភាព ចំនួន១គ្រឿង លោហធាតុពណ៌លឿង ចំនួន២គូរ (១គូទម្ងន់២ហ៊ុន និង១គូរទៀតទម្ងន់៣ហ៊ុន)។ ជនសង្ស័យនិងវត្ថុតាង ត្រូវបានកម្លាំងព្រហ្មទណ្ឌស្រុកកសាងសំណុំរឿងបញ្ជូនទៅតុលាការ ដើម្បីចាត់ការតាមនិតិវិធី នៃច្បាប់៕ដោយ៖កូឡាប
