ភ្នំពេញ៖ ថ្មីៗនេះ នៅលើបណ្តាញសង្គមហ្វេសប៊ុក បានផ្ទុះកក្រើកទៀតហើយ ទាក់ទងករណីយកឡានស៊េរីដ៏ទំនើប១គ្រឿង ទៅថ្វាយបង្គំដល់មុខព្រះ នៅលើសាលាឆាន់ ដែលនាំឲ្យមហាជននាំគ្នារិះគន់យ៉ាងចាស់ៗដៃតែម្តង។
ការផ្អើលរិះគន់តៗគ្នានេះផងដែរ គឺបានកើតឡើង បន្ទាប់ពីមានគណនីហ្វេសប៊ុកមួយឈ្មោះថា Aplok Choy បានបង្ហោះរូបភាព២សន្លឹក ដោយភ្ជាប់សារបែបនេះថា៖ «ខែភ្ជុំ 2020…. យកស្រីស សខ្ចី ទៅថ្វាយបង្គុំព្រះ.. នាំសិរីសួស្តីហេងៗ…..»។
ទោះយ៉ាងណា ក្រោយពីបានឃើញរឿងកំពុងត្រូវបានគេរិះគន់សឹងមួយពេញប្រទេស ចំពោះការបង្ហោះរបស់គណនីខាងលើ ដែលពុំមែនជាម្ចាស់រថយន្ត ស្រាប់តែមានគណនីហ្វេសប៊ុកមួយឈ្មោះ Sorn Rady បានចេញមុខមកបញ្ជាក់ឲ្យដឹងច្បាស់ថា «ឡាននឹងគាត់ប្រគេនលោកទេ ហើយកិច្ចដែលជិះចូលសាលាឆាន់នោះក៏គោរពតាមសង្ឃដីកាដែរ មិនមែនជាគំនិតពួកគាត់ទេ ហើយអ្នកលួចថតគេយកទៅបង្ហោះនោះនិយាយមុសាថែមទៀត អ្នកឃើញហើយយល់ច្រឡំនោះក៏និយាយមិនគិតទៅទៀត គាត់ជាមនុស្សចិត្តបុណ្យណាស់ រៀនគិតអីវិជ្ជមានខ្លះទៅ កុំតែស្ករពេកបងប្អូនមួយចំនួន ជួយshareឲ្យដឹងពីមូលហេតុផង កុំឲ្យនាំគ្នាយល់ច្រឡំទៀតបងបង»។
ដោយឡែក គណនីឈ្មោះ Thida Vira ក៏បានឆេះកំហឹងយ៉ាងខ្លាំងដែរថា៖ «អ្នកដែលយករូបថតគេមកផុសហ្នឹង មានសួរម្ចាស់ឡានទេ ថាយកឡានមកធ្វើអីក្នុងសាលាឆាន់? រឿងមិនពិតចេះលួចថតយករូបគេមកផុសដោយមិនមែនជាការពិត ធ្វើមើលតែរបស់ខ្លួនឯង ពេលដែរម្ចាស់ទាន (ម្ចាស់ឡាន) អត់ដឹងខ្លួនសោះ! ខែបុណ្យ ខែទាន ចឹងនរកស៊ីក្បាលណាអាផ្លក់ចយ អើយ..!»។
ចំណែកគណនី Anna Chhin ក៏បានតបថា៖ «អើយពួកម៉ាកគ្នាខឹងជំនួស នៅសុខសុខគេជេរមួយប្រទេសមនុស្ស សម័យនេះស្អីក៏ធ្វើបាន ដើម្បីប្រយោន៍ខ្លួនឯងសាហាវ»។
តែយ៉ាងណា ជុំវិញរឿងបង្កការរិះគន់ដែលគេថាធ្វើឡើងដ៏មិនសមរម្យ ឬ ហាក់ដូចជ្រុលពេកនេះ គឺមានតែចៅអធិការវត្តទេ ដែលអាចបកស្រាយពន្យល់បាន ព្រោះថាមានតែលោកទេដែលអាចមានសិទ្ធិ ក្នុងការសម្រេចធ្វើរឿងនេះឡើង៕ ដោយ៖ លឹម ហុង