រាជធានីភ្នំពេញ៖ សម្តេចតេជោ ហ៊ុន សែន បានសម្តែងនូវការកោតស្ញប់ស្ញែងចំពោះកាយវិការរបស់លោកគ្រូម្នាក់ ដែលហ៊ានរាំតាមពាក្យសន្យានៅពេលសិស្សរបស់ខ្លួនប្រឡងបាននិទ្ទេស A។
នៅព្រឹកថ្ងៃទី១៤ ខែតុលា ឆ្នាំ២០១៧នេះ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ផ្តល់កិត្តិយសជួបសំណេះសំណាលដោយផ្ទាល់ ជាមួយសិស្សនិទ្ទេសA និងអាណាព្យាបាលរបស់ពួកគេ នៅវិមានសន្តិភាព។ សម្តេចតេជោ បានហៅកាយវិការនេះគឺជាទឹកចិត្តដ៏ធំធេង និងមិនកាត់ថ្លៃរបស់លោកគ្រូ អ្នកគ្រូ ដែលគ្មានអ្វីសប្បាយចិត្តជាងសិស្សរបស់ខ្លួនទទួលបានលទ្ធផលល្អ ហើយក៏បានថ្លែងកោតសរសើរដល់ក្រសួងអប់រំ ដែលបានប្រឹងប្រែងធ្វើកំណែទម្រង់លើវិស័យអប់រំ ដែលមិនអាចឈប់នោះឡើយ។
សម្តេចតេជោ ហ៊ុន សែន ស្នើកុំឲ្យមានការអាក់អន់ចិត្ត ឬប្រកែប្រកាន់ ចំពោះការរឹតត្បិតរបស់លោកគ្រូ អ្នកគ្រូ ក៏ដូចជាអង្គភាពប្រឆាំងអំពើពុករលួយក្នុងរឹតត្បិតនៅពេលប្រលង។
សម្តេចតេជោ ហ៊ុន សែន បានថ្លែងអំពាវនាវដល់សិស្សទាំងអស់ ត្រូវធ្វើឲ្យមាននូវចលនាដឹងគុណគ្រូនៅទូទាំងប្រទេស និងបានស្នើសុំឲ្យការដឹងគុណគ្រូ កុំធ្វើតែនៅថ្ងៃទី៥ ខែតុលា គឺត្រូវធ្វើពេញមួយជីវិត និងគ្រប់ពេលវេលា។
សម្តេចតេជោ ហ៊ុន សែន បានថ្លែងថា ការពង្រឹងលើវិស័យអប់រំនាពេលបច្ចុប្បន្ននេះ គឺជាការកំពុងធ្វើដំណើរនៅលើផ្លូវមួយយ៉ាងត្រឹមត្រូវ ដែលនឹងនាំឲ្យកម្ពុជាឆ្ពោះទៅរកភាពដ៏ល្អប្រសើរលើវិស័យអប់រំ និងការបណ្តុះធនធានមនុស្ស។
សម្តេចតេជោ ហ៊ុន សែន បានស្នើដល់អាណាព្យាបាលរបស់សិស្សទាំងអស់ កុំឲ្យទទួលយកតែរឿងល្អ ហើយរឿងមិនល្អទម្លាក់ឲ្យគ្រូៗ។
សូមបញ្ជាក់ថា លោកគ្រូដែលរាំតាំងពីក្លោងទ្វារវិទ្យាល័យរហូតដល់ដងទង់ជាតិ ក្រោយអនុវត្តតាមការសន្យាជាមួយសិស្សនោះ ពេលនេះទទួលបានកោតសរសើរយ៉ាងខ្លាំង ពីសម្តេចនាយករដ្ឋមន្ត្រីកម្ពុជា នៅចំពោះ ឥស្សរជនជាន់ខ្ពស់ លោកនាយក នាយិកាសាលា និងសិស្សឆ្នើមនិទ្ទេស A ទូទាំងប្រទេស ៤២៤នាក់។
ទោះបីជាសម្តេចតេជោ មិនបានបញ្ជាក់ពីឈ្មោះលោកគ្រូ ក៏ដោយ ប៉ុន្តែសម្តេចនាយករដ្ឋមន្ត្រី បានលើកសរសើរជាច្រើនចំណុចនូវសកម្មភាពរបស់លោកគ្រូ ទៀ សុធា ដែលបង្ហាញពីទឹកចិត្តដ៏ល្អផូរផង់លោកគ្រូ ក៏ដូចជាលោកគ្រូអ្នកគ្រូផ្សេងទៀត ដែលចង់ឲ្យសិស្សល្អ សិស្សពូកែ រហូតមានការភ្នាល់ជាមួយសិស្ស ដើម្បីបំផុសនិងជំរុញឲ្យសិស្សកាន់តែប្រឹងប្រែងយកនិទ្ទេសឲ្យបាន។
ក្រោយសិស្សខ្លួនបានជាប់និទ្ទេស A មែន គឺលោកគ្រូ គណិតវិទ្យា នៅវិទ្យាល័យ ហ៊ុន សែន ភ្នំពេញថ្មីរូបនេះ ក៏បានអនុវត្តតាមការសន្យាជាមួយសិស្សពិតប្រាកដមែន ដោយរាំតាំងរបងសាលារហូតដល់ដងទង់ជាតិ។
ទន្ទឹងនេះលោកគ្រូ ទៀ សុធា ថា លោកគ្រូតាំងនាម វិទ្យាល័យសម្តេចហ៊ុនភ្នំពេញថ្មីសូមគោរពនិងដឹងគុណសម្តេចយ៉ាងខ្លាំងដែលសម្តេចបានសាងសង់សាលារៀន និងបានស្នើសុំសម្តេចឲ្យជួយកសាងទីចាត់ការមួយ ដោយសារតែវិទ្យាល័យនៅខ្វះខាត៕ ដោយ៖ជាលី
