ក្មេងស្រីជាសិស្សសាលាបឋមម្នាក់ នៅក្នុងខេត្តស៊ីឈួន ប្រទេសចិន ត្រូវបានគ្រូរបស់នាងដាក់ទណ្ឌកម្មវ៉ៃរហូតសន្លប់ ដោយសារនាងឆ្លើយសំណួរ២ខុស។
ក្មេងស្រីរងគ្រោះមានឈ្មោះ Ning Ning អាយុ ១០ ឆ្នាំ ត្រូវបានដឹងថា នាងបានឆ្លើយសំណួរគណិតវិទ្យាចំនួន២ ខុស ហើយគ្រូរបស់នាងបានផ្ទុះកំហឹងតែម្តង។ ជាការដាក់ទណ្ឌកម្ម គ្រូនោះបានឲ្យនាងលុតជង្គង់ចុះ រួចយកដៃញ៉ឹងស្លឹកត្រចៀក ទះកំផ្លៀង និងអ្វីដែលអាក្រក់បំផុតនោះ គឺវាយក្បាលរបស់នាង។
យោងតាមម្តាយបងស្រីភ្លោះរបស់ Ning ដែលរៀនក្នុងថ្នាក់ជាមួយគ្នា បានប្រាប់ឲ្យដឹងថា បងស្រីរបស់នាងមិនអាចងើបក្បាល ឬ កម្រើកខ្លួននោះទេ ក្នុងអំឡុងពេលគ្រូដាក់ទណ្ឌកម្ម។ បន្ទាប់ពីដាក់ទណ្ឌកម្ម មិត្តរួមថ្នាក់របស់នាងបានប្រញាប់ប្រញាល់ទៅជួយលើកគ្រានាងឲ្យអង្គុយ។
ខណៈឃើញហាក់មិនស្រួល គ្រូចិត្តកំណាចនោះក៏បានទូរស័ព្ទហៅជីដូនរបស់ Ning មកយកនាងទៅផ្ទះ ដោយនិយាយលេសថានាងហាក់មិនស្រួលខ្លួន។ ជីដូនរបស់នាងក៏បានប្រញាប់ប្រញាល់ទៅកាន់សាលា និងបានរកឃើញថា Ning Ning មិនអាចបើកភ្នែក និងនិយាយអ្វីបានឡើយ។ បន្ទាប់មក ជីដូនក៏បានប្រញាប់ប្រញាល់បញ្ជូននាងទៅកាន់មន្ទីរពេទ្យ ជាកន្លែងដែលពួកគេបានព្យាយាមជួយសង្គ្រោះ ប៉ុន្តែ ជាអកុសល នាងបានស្លាប់បាត់បង់ជីវិតទៅហើយ។
ក្រោយរឿងនេះកើតឡើង អ្នកសារព័ត៌មានបានទៅកាន់សាលារៀនរបស់នាង ដើម្បីសុំការបំភ្លឺ ប៉ុន្តែ ទោះយ៉ាងណា ក្រោយពីបានឮថាក្រុមសារព័ត៌មាន អ្នកនាយកបានពន្យារការជួប និងមិនឆ្លើយទូរស័ព្ទ៕ ដោយ៖ លឹម ហុង
