ភ្នំពេញ៖ នៅថ្ងៃទី១០ ខែសីហា ឆ្នាំ២០២០ វេលាម៉ោង៧និង៣០នាទី នៅចំណុចផ្ទះលេខ៤៨E1 ផ្លូវ១៧២ ភូមិ៤ សង្កាត់ជ័យជំនះ ខណ្ឌដូនពេញ ក្រោយពីទទួលបាននូវ ពាក្យបណ្តឹងរបស់ជនរងគ្រោះ កម្លាំងជំនាញខណ្ឌ-ប៉ុស្តិ៍ បានបើកការស្រាវជ្រាវ រហូតមកដល់ថ្ងៃទី១៥ ខែកញ្ញា ឆ្នាំ២០២០ វេលាម៉ោង១២និង៣០នាទី សមត្ថកិច្ចបានធ្វើការឃាត់ខ្លួនជនសង្ស័យម្នាក់ ឈ្មោះ ទួន ឌីដារិទ្ធ ភេទប្រុស អាយុ៣៦ឆ្នាំ ជនជាតិខ្មែរ មុខរបរជាងកាត់សក់ នៅចំណុចផ្ទះលេខ៨ ផ្លូវលេខ៥៦២ ភូមិ៧ សង្កាត់បឹងកក់១ ខណ្ឌទួលគោក។
ជនរងគ្រោះឈ្មោះ ទិត្យ វណ្ណសារ៉ា ភេទស្រី អាយុ២៣ឆ្នាំ ជនជាតិខ្មែរ មុខរបរបុគ្គលិកក្រុមហ៊ុន ស្នាក់នៅផ្ទះលេខ៤៨E1 ផ្លូវ១៧២ ភូមិ៤ សង្កាត់ជ័យជំនះ ខណ្ឌដូនពេញ។
ក្រោយពីឃាត់ខ្លួនជនសង្ស័យ មកកាន់ប៉ុស្តិ៍នគរបាលរដ្ឋបាលជ័យជំនះ និងប្រើប្រាស់នូវវិធានការជំនាញ យកចម្លើយពីជនសង្ស័យ បានសារភាពថាខ្លួន ពិតជាបានលួចយកនូវម៉ាស៊ីនថតរូប ចំនួន២គ្រឿង, កុំព្យូទ័រយួរដៃចំនួន២គ្រឿង, លុយដុល្លារចំនួន៧៥ដុល្លារ, ទូរស័ព្ទដៃម៉ាក Iphone 7 ពណ៌ទឹកប្រាក់ ចំនួន១គ្រឿង(ជាប់ ICLOUD), Len Camera សម្រាប់ថតរូបចំនួន១គ្រាប់។
បច្ចុប្បន្នជនសង្ស័យ កំពុងឃាត់ខ្លួននៅអធិការដ្ឋាននគរបាល ខណ្ឌដូនពេញ ដើម្បីកសាងសំណុំរឿង ចាត់ការបន្តតាមនីតិវិធីច្បាប់៕
ដោយ៖កូឡាប
