ភ្នំពេញ៖ ក្រសួងសេដ្ឋកិច្ចអាមេរិក កាលពីថ្ងៃទី១៥ ខែកញ្ញា ឆ្នាំ២០២០ បានចេញសេចក្តីថ្លែងការណ៍ថា នឹងដាក់ទណ្ឌកម្មទៅលើគម្រោងរបស់ក្រុមហ៊ុន Union Development Group នៅកម្ពុជា ដោយស្របតាមច្បាប់ The Global Magnitsky Human Rights និងបទបញ្ជារដ្ឋបាលពាក់ព័ន្ធរបស់រដ្ឋាភិបាលសហរដ្ឋអាមេរិក។
ពាក់ព័ន្ធនឹងការព្រមានដាក់ទណ្ឌកម្មរបស់ក្រសួងសេដ្ឋកិច្ចអាមេរិកនេះ អ្នកនាំពាក្យស្ថានទូតចិនប្រចាំនៅកម្ពុជា នៅថ្ងៃទី១៦ ខែកញ្ញា ឆ្នាំ២០២០នេះ បានចេញសេចក្តីថ្លែងការណ៍ជំទាស់ និងថ្កោលទោសចំពោះវិធានការរបស់ សហរដ្ឋអាមេរិក ដែលដាក់ទណ្ឌកម្មលើក្រុមហ៊ុន Union Development Group របស់ចិន ដែលកំពុងវិនិយោគនៅក្នុងទឹកដីប្រទេសកម្ពុជា។ ស្ថានទូតចិនបានចាត់ទុកថា ការដាក់ទណ្ឌកម្មនេះ មិនត្រឹមតែធ្វើឱ្យប៉ះពាល់ដល់អត្ថប្រយោជន៍សិទ្ធិស្របច្បាប់របស់សហគ្រាសនោះទេ ហើយរឹតតែជាការរំលោភបំពានទាំងស្រុង លើអធិបតេយ្យភាពរបស់ប្រទេសកម្ពុជាផងដែរ។
អ្នកនាំពាក្យស្ថានទូតចិនប្រចាំកម្ពុជា បង្ហាញមតិស្តីអំពី ការដាក់ទណ្ឌកម្មរបស់សហរដ្ឋអាមេរិកទៅលើក្រុមហ៊ុន Union Development Group ដែលជាសហគ្រាសចិនក្នុងប្រទេសកម្ពុជា។
អ្នកនាំពាក្យស្ថានទូតចិន បានថ្លែងថា កាលពីថ្ងៃទី ១៥ ខែកញ្ញា ក្រសួងសេដ្ឋកិច្ចនៃសហរដ្ឋអាមេរិកបានចេញសេចក្តីថ្លែង ការណ៍មួយដោយបានលើកឡើងថា ខ្លួននឹងដាក់ទណ្ឌកម្មទៅលើគម្រោងរបស់ក្រុមហ៊ុន Union Development Group នៅកម្ពុជា ដោយស្របតាមច្បាប់ The Global Magnitsky Human Rights និង បទបញ្ជារដ្ឋបាលពាក់ព័ន្ធរបស់រដ្ឋាភិបាលសហរដ្ឋអាមេរិក។
ដូចដែលយើងបានដឹងហើយថា តំបន់សាកល្បងការវិនិយោគអភិវឌ្ឍចម្រុះ និង គម្រោងតំបន់ពិសេសទេសចរណ៍លំហែកាយ DARA SAKOR នៅកម្ពុជា ត្រូវបានអនុញ្ញាត ដោយរាជរដ្ឋាភិបាលកម្ពុជា និងជាគម្រោងចម្រុះខ្នាតធំដែលវិនិយោគដោយក្រុមហ៊ុន Union Development Group ដែលជាក្រុមហ៊ុនក្រោមសម្ព័ន្ធ Tianjin Union Group ដែល ជាសហគ្រាសឯកជនរបស់ចិន។ គម្រោងនេះបានអនុលោមតាមច្បាប់ និង បទប្បញ្ញត្តិនានា របស់ប្រទេសកម្ពុជា ហើយបានចូលរួមចំណែកក្នុងការលើកកម្ពស់អភិវឌ្ឍសេដ្ឋកិច្ច និង សង្គមរបស់ប្រទេសកម្ពុជា។
រដ្ឋាភិបាលសហរដ្ឋអាមេរិកបានប្រែក្រឡាស់រឿងពិត ចោទប្រកាន់មិនសមហេតុផល បានប្រើច្បាប់ក្នុងប្រទេសខ្លួនមកដាក់ទណ្ឌកម្មលើគម្រោងរបស់សហគ្រាសចិនក្នុងទឹកដី ប្រទេសកម្ពុជា នេះគឺជាសកម្មភាពដែលប្រើអំណាចកៀបសង្កត់ជាខ្លាំង។ ការកៀបសង្កត់ របស់សហរដ្ឋអាមេរិកទៅលើការវិនិយោគស្របច្បាប់របស់សហគ្រាសចិនក្នុងប្រទេសកម្ពុជា មិនត្រឹមតែធ្វើឱ្យប៉ះពាល់ដល់អត្ថប្រយោជន៍សិទ្ធិស្របច្បាប់របស់សហគ្រាសនោះទេ ហើយ រឹតតែជាការរំលោភបំពានទាំងស្រុងលើអធិបតេយ្យភាពរបស់ប្រទេសកម្ពុជាផងដែរ។
ស្ថានទូតចិនប្រចាំកម្ពុជាធ្វើការជំទាស់ និង ថ្កោលទោសជាដាច់ខាតចំពោះទង្វើមួយនេះ។ យើងទទូចដល់ភាគីសហរដ្ឋអាមេរិក កែប្រែវិធីសាស្ត្រខុសមួយនេះជាបន្ទាន់ និងដកទណ្ឌកម្មសម្រេចទាំងស្រុងរបស់ខ្លួនផងដែរ៕
ដោយ៖កូឡាប