ភ្នំពេញ៖ កម្លាំងនគរបាលនាយកដ្ឋានប្រឆាំងបទល្មើសល្បែងពាណិជ្ជកម្ម បានបើកpប្រតិបត្តិការស្រាវជ្រាវសំណុំរឿងឆបោក និងសម្អាតប្រាក់ នៅរាជធានីភ្នំពេញ រហូតដល់ឈានការចាប់ខ្លួនជនជាតិបរទេស៤នាក់ និងស្ដ្រីខ្មែរម្នាក់ កសាងសំណុំរឿងបញ្ជូនទៅតុលាការ ហើយត្រូវបានតុលាការចេញដីកាឃុំខ្លួនដាក់ពន្ធនាគារ កាលពីល្ងាចថ្ងៃទី១៧ ខែកញ្ញា ឆ្នាំ២០២០។
ប្រតិបត្តិការនេះធ្វើឡើងក្រោមការបញ្ជាផ្ទាល់ពី នាយឧត្តមសេនីយ៍ សន្ដិបណ្ឌិត នេត សាវឿន អគ្គស្នងការនគរបាលជាតិ និងលោកឧត្តមសេនីយ៍ឯក ឌី វិជ្ជា អគ្គស្នងការរង និងជាប្រធាននាយកដ្ឋានកណ្ដាលនគរបាលសន្ដិសុខ និងលោកឧត្តមសេនីយ៍ឯក សៀន សេន ប្រធាននាយកដ្ឋានប្រឆាំងបទល្មើសល្បែងពាណិជ្ជកម្ម។
របាយការណ៍របស់នាយកដ្ឋានប្រឆាំងបទល្មើសល្បែងពាណិជ្ជកម្ម នៅថ្ងៃទី១៦ ខែកញ្ញា ឆ្នាំ២០២០នេះ បានឲ្យដឹងថា នៅថ្ងៃទី១៥ ខែសីហាញា ឆ្នាំ២០២០កន្លងទៅ កម្លាំងជំនាញបានទទួលព័ត៌មានអំពីប្រតិបត្តិការក្លែងបន្លំ (Fraud) និងទទួលការវេរប្រាក់ចូលគណនីខុសប្រក្រតី ដោយមានប្រតិបត្តិការការចេញពីគណនីធនាគារមួយ ដែលមានប្រភពពីសហរដ្ឋអាមេរិក ចូលគណនីធនាគារមួយចំនួន នៅប្រទេសកម្ពុជា។
បន្ទាប់ពីទទួលបានព័ត៌មានខាងលើ សមត្ថកិច្ចពាក់ព័ន្ធបានបន្តស្រាវជ្រាវប្រមូព័ត៌មានរហូតឈានដល់បំបែកសំបុកក្រុមឆបោក និងសម្អាតប្រាក់ ដ៏ធំមួយនៅរាជធានីភ្នំពេញ កាលពីថ្ងៃទី១១-១៣ ខែកញ្ញា ឆ្នាំ២០២០ នឹងបានធ្វើការឃាត់ខ្លួនជនសង្ស័យជាបន្តបន្ទាប់សរុបចំនួន៥នាក់ ក្នុងនោះមានជនជាតិ នីហ្សេរីយ៉ា ចំនួន៤នាក់ និងស្ត្រីជនជាតិខ្មែរម្នាក់ ហើយបានកសាងសំណុំរឿងបញ្ជូនទៅកាន់សាលាដំបូង រាជធានីភ្នំពេញ ដើម្បីចាត់ការតាមនីតិវិធី។ ក្រុមជនសង្ស័យខាងលើ បានប្រើល្បិចកលរូបភាពអូសទាញប្រជាពលរដ្ឋខែ្មរ ឲ្យបើកគណនីធនាគារ ដើម្បីទទួលការវេរប្រាក់ចូលពីក្រៅប្រទេស ហើយផ្តល់កម្រៃជើងសារជូនពួកគាត់។
លោកឧត្តមសេនីយ៍ឯក សៀន សេន ប្រធាននាយកដ្ឋានប្រឆាំងបទល្មើសល្បែងពាណិជ្ជកម្ម បានបញ្ជាក់ថា ហេតុដូចនេះប្រសិនពលរដ្ឋ ត្រូវបានគេទំនាក់ទំនងពឹងពាក់ឲ្យ បើកគណនីធនាគារ ឬក៏ជួយបើកប្រាក់ពីកន្លែងផ្តល់សេវាវេរប្រាក់គ្រប់ប្រភេទនៅប្រទេសកម្ពុជា ដើម្បីឲ្យជៀសផុតពីការចាញ់បោកក្រុមនេះ សូមមានការប្រុងប្រយ័ត្ន កុំជឿការអូសទាញ ឬលួងលោមគ្រប់រូបភាព ហើយរាយការណ៍ជូនសមត្ថកិច្ចដែលជិតបំផុត ដើម្បីមានវិធានការទាន់ពេលវេលា៕ដោយ៖បញ្ញាស័ក្តិ
