បន្ទាយមានជ័យ ៖ ការប្រកួតកីឡាកុមារជាសិស្សបឋមសិក្សាសាធារណ:និងឯកជនបានបញ្ចប់ហើយនៅព្រឹកថ្ងៃទី៧ មករាឆ្នាំ២០១៨ ជាមួយនឹងភាពសោះកក្រោះ។ ប៉ុន្តែមន្ត្រីនិយាយថា កីឡាសិស្សមធ្យមសិក្សា នៅសប្តាហ៍ក្រោយនឹងគ្រាន់អឹកអធឹកឡើងវិញ។
ការប្រកួតកីឡាកុមារសិស្សបឋមសិក្សា ២ ថ្ងៃ កន្លះមកនេះ បានប្រព្រឹត្តទៅក្នុងទីលានប្រកួត នាវិទ្យាល័យហ៊ុនសែនខ្លាកូន សង្កាត់កំពង់ស្វាយ ក្រុងសិរីសោភ័ណ ក្នុងលក្ខណ:វិលជុំនិងផ្តាច់ព្រ័ត្រ ក្នុងវិញ្ញាសា៣ គឺបាល់ទះ បាល់ទាត់ និងអត្តពលកម្ម។ ប៉ុន្តែអតត្តពលកម្មប្រកួតមិនបានគ្រប់ប្រភេទទេ។
លោក បួយ ម៉េង អនុប្រធានការិយាល័យអប់រំកាយ និងកីឡា នៃមន្ទីរអប់រំយុវជន និងកីឡាខេត្តបន្ទាយមានជ័យ ប្រាប់កាសែតរស្មីកម្ពុជា តាមទូរស័ព្ទថ្ងៃទី៧ ខែកុម្ភ:ថា ៖ ជាលទ្ធផលការប្រកួតនេះ ផ្នែកកីឡាបាល់ទះ កុមារី លេខ១បានទៅស្រុកព្រះនេត្រព្រះ លេខ២ ស្រុកអូរជ្រៅនិងលេខ៣ ស្រុកថ្មពួក។ ឯកីឡាករកុមារា លេខ១ បានទៅក្រុងសិរីសោភ័ណ លេខ២ ស្រុកម៉ាឡៃនិងលេខ៣ ក្រុងប៉ោយប៉ែត។
លោកនិយាយបន្តថា៖ ចំណែក ផ្នែកបាល់ទាត់វិញ កីឡាករកុមារី លេខ១ បានទៅស្រុកថ្មពួក លេខ២ ស្រុកម៉ាឡៃ និងលេខ៣ ក្រុងប៉ោយប៉ែត។ ឯកីឡាករកុមារា លេខ១ បានទៅសាលាពន្លកខ្មែរ ក្រុងប៉ោយប៉ែត លេខ២ ស្រុកម៉ាឡៃនិងលេខ៣ ស្រុកស្វាយចេក ។
សូមរំលឹកថា ការប្រកួតកីឡា សិស្សបឋមសិក្សា មធ្យមសិក្សានិងឧត្តមសិក្សា ក៏ដូចមហាជនតែងធ្វើឡើងរាល់ឆ្នាំនៃទូទាំងប្រទេសដើម្បីលើកកម្ពស់វិសូយកីឡា ពង្រឹងសម្បទា ចំណងសាមគ្គីភាព មិត្តភាព សុខភាពនិងកិច្ចទំនាក់ទំនងកិច្ចសហការ ។
ប៉ុន្តែ សម្រាប់ខេត្តបន្ទាយមានជ័យ ការប្រកួតកីឡាសិស្សបឋមសិក្សានៅឆ្នាំ២០១៨ មានសភាពអត្តចាត់ខ្សត់ខ្សោយនិងសោះកក្រោះដែរ៕ ដោយ ៖ បន្ទាយ
