ខេត្តពោធិ៍សាត់ ៖ នាយរងការិយាល័យហ្វឹកហ្វឺនកងពលលេខ១៤ មានឋានៈវរសេនីយ៍ត្រីម្នាក់ ត្រូវបានឃាត់ខ្លួនក្នុងករណីឃាតកម្មបានកើតឡើងក្នុងវង់ផឹកស៊ីជាមួយគ្នាជនបង្កប្រើ កាំភ្លើងខ្លីមួយដើមប្រភេទK54 បាញ់ជនរងគ្រោះ បណ្តាលឲ្យស្លាប់ ។
ហេតុការណ៍ផ្ទុះគ្រាប់បណ្ដាលឱ្យស្លាប់មនុស្សម្នាក់ខាងលើនេះបានកើតឡើងនៅវេលាម៉ោង៥និង១៥នាទីនាល្ងាចថ្ងៃទី១៨ ខែកញ្ញា ឆ្នាំ២០២០ នៅក្នុងវងផឹកស៊ីមួយកន្លែង ត្រង់ចំណុចផ្ទះរបស់ឈ្មោះ ធី ស្ថិតក្នុងភូមិដំបូក១០០ ឃុំ ត្នោតជ្រុំស្រុកក្រគ ខេត្តពោធិ៍សាសាត់ ។
ប្រភពពីសមត្ថកិច្ចដែលចុះដល់កន្លែងកើតហេតុបានឲ្យដឹងថា នៅមុនពេលកើតហេតុជនសង្ស័យដែលជាខ្មាន់កាំភ្លើង បានដេញចាប់ក្មេងលេង ហើយជនរងគ្រោះបានយកដុំថ្មគប់ទៅលើជនសង្ស័យ ពេលនោះគេចផុតជនសង្ស័យក៏បានដកកាំភ្លើងបាញ់គំរាមតែចៃដន្យគ្រាប់ក៏ខ្ទាត ត្រូវជនរងគ្រោះបណ្តាលឲ្យស្លាប់ភ្លាមៗ នៅចំណុចផ្ទះឈ្មោះធីតែម្តង ។
ជនសង្ស័យត្រូវបានគេស្គាល់ថាមានឈ្មោះ ប្រាក់ សុផលភេទប្រុស អាយុ៥៧ឆ្នាំ នាយរងការិយាល័យហ្វឹកហ្វឺនកងពលលេខ១៤ មានឋានៈវរសេនីយ៍ត្រី រស់នៅភូមិឈើទាល ឃុំត្នោតជុំ ស្រុកក្រគរ ខេត្តពោធិ៍សាត់ កាន់កាំភ្លើងខ្លីមួយដើមប្រភេទK54 ។
ដោយឡែកជនរងគ្រោះឈ្មោះងួន ទូច ភេទប្រុស អាយុ៣៥ឆ្នាំ រស់នៅភូមិដំបូក១០០ ឃុំត្នោតជុំ ស្រុក្រគរខេត្តពោធិ៍សាត់ (ស្លាប់) ។
លោកឧត្តមសេនីយ៍ត្រី ម៉ូលីដា ស្នងការរងទទួលបន្ទុកកណ្តាលយុត្តិធម៌បានឲ្យដឹង នៅរសៀលថ្ងៃទី១៨ ខែកញ្ញា ឆ្នាំ២០២០នេះថា ជនសង្ស័យត្រូវបានសមត្ថកិច្ចនគរបាលស្រុកក្រគរធ្វើការបង្ក្រាបនិងចាប់ឃាត់ខ្លួន ដោយបានដកហូតអាវុធខ្លីប្រភេទK54 និងបានយកមកអធិការនគរបាលស្រុកក្រគរ តាមបញ្ជារបស់ឯកឧត្តមព្រះរាជអាជ្ញាអមសាលាដំបូងខេត្តពោធិ៍សាត់ ដើម្បីកសាងសុំណុំរឿងបញ្ជូនបន្តមកស្នងការនគបាលខេត្តពោធិ៍សាត់ ចាត់ការបន្តតាមនីតិវិធី ។
ដោយឡែកជនរងគ្រោះត្រូវបានសមត្ថកិច្ចធ្វើកំណត់ហេតុ និងបានប្រគល់សព ទៅឲ្យក្រុមគ្រួសារសាច់ញាតិ រៀបចំធ្វើបុណ្យតាមប្រពៃណី ៕
ដោយ៖កូឡាប
