ភ្នំពេញ៖ថ្ងៃនេះ សូមប្រិយមិត្តងាកមកចាប់អារម្មណ៍តារាប្រុសស្រី៣ដួង ដែលជាអ្នកចម្រៀង តារាសម្តែង និងជាពិធីករដ៏ល្បីឈ្មោះ ពោរពេញទៅដោយសមត្ថភាព និងទេពកោសល្យសិល្បះ និងព្រមទាំងត្រូវបានមហាជនទុកថា សុទ្ធតែជាអ្នកកំពុងជោគជ័យទាំងជីវិតគ្រួសារ និងមុខរបរ ដែលធ្វើឲ្យមនុស្សជាច្រើនកោតសរសើរជាខ្លាំង។
១- តារាសម្តែង និងពិធីការិនី គង់ ច័ន្ទស្រីមុំ
តារាស្រី និងអ្នកជំនួញម្នាក់ដ៏ជោគជ័យ គង់ ច័ន្ទស្រីមុំ នៅតែបន្តរក្សាភាពលេចធ្លោរបស់ខ្លួនជាបន្តបន្ទាប់នៅលើវិស័យសិល្បៈ។ អ្នកនាងក៏ត្រូវបានមហាជនចាត់ចូលជាតារាដែលមានគំនិតច្នៃប្រឌិតខ្ពស់លើការតុបតែងខ្លួន ដោយជារឿយៗ គេតែងសង្កេតឃើញអ្នកនាង និងស្វាមី បង្ហាញពីជីវិតដ៏ហ៊ឺហារ ពោរពេញដោយសុភមង្គលខ្លាំងបំផុត នៅលើបណ្តាញសង្គម ដែលធ្វើឲ្យអ្នកគាំទ្រកោតសរសើរមិនដាច់ពីមាត់នោះទេ។
គង់ ច័ន្ទស្រីមុំ ក៏ទទួលបានកូនស្រីដ៏ស្រស់ស្អាតម្នាក់ឈ្មោះ គឹម សីហ៍មរកត ហៅ ម៉ូម៉ូ ដែលពេលនេះមានអាយុជាង២ឆ្នាំហើយ ដែលជាចំណងដៃអាពាហ៍ពិពាហ៍ដ៏កក់ក្តៅ ជាមួយស្វាមីលោក គឹម សីហា។
២- តារាចម្រៀង ពេជ្រ សូលីកា
ពេជ្រ សូលីកា ជាតារាចម្រៀងមួយដួង ត្រូវបានគេកោតសរសើរថា មានរូបសម្រស់ដ៏ស្រស់ស្អាត និងកាន់តែខ្ចីជាងមុនទៀត បន្ទាប់ពីសម្រាលបានកូនប្រុសម្នាក់គួរឲ្យស្រឡាញ់ កាលពីអំឡុងខែកក្កដា ឆ្នាំ២០២០ កន្លងមកនេះ ដែលជាតំណក់ឈាមទាំងមិនទាន់រៀបការជាមួយស្វាមីលោក គឹម ហាន។
ក្រឡេកមកមើលពីជីវិតគ្រួសារវិញ សូលីកា និងស្វាមី ហាក់កំពុងមានជីវិតគ្រួសារពោរពេញដោយសេចក្តីសុខ និងសុភមង្គលខ្លាំងមែនទែន ដោយជានិច្ចកាល គេតែងឃើញអ្នកទាំងពីរបង្ហាញក្តីស្រឡាញ់ឲ្យគ្នា ជាពិសេសលោក គឹម ហាន តែងផ្តល់កម្លាំងចិត្ត និងការថ្នាក់ថ្នមដល់ សូ លីកា តាំងពីនាងកំពុងពពោះមកម្ល៉េះ ស្របពេលដែល សូលីកា បានជួបនូវរឿងអាក្រក់ក្នុងជីវិត ព្រោះតែម្តាយក្លាយជាឃាតករសម្លាប់មនុស្ស។
៣- ពិធីករ ជា វណ្ណារិទ្ធ
លោក ជា វណ្ណារិទ្ធ ជាពិធីកររូបស្រស់សង្ហាម្នាក់ នៅតែមានប្រជាប្រិយភាពដដែល បើទោះជារូបលោកបានឈានជើងចូលសិល្បៈអស់រយៈពេលច្រើនឆ្នាំមកហើយ។ ក្រៅពីមិនសូវទទួលថតខ្សែភាពយន្តដូចមុន តែក៏ថតស្ពតម្តងម្កាល ដោយចាប់យកតែអាជីពជាពិធីករ ក៏នៅមានទស្សនិកជនស្គាល់ និងចូលចិត្តដល់រូបលោកផងដែរ។
យ៉ាងណាមិញ បើងាកមកមើលពីជីវិតឯកជនរបស់លោកវិញ ឃើញថា លោកកាន់តែមានសុភមង្គលជាមួយគ្រួសារជាប់រហូត ដែលធ្វើឲ្យអ្នកគាំទ្រលួចច្រណែនមិនស្ទើរនោះទេ ក្រោយពីបានឃើញនូវរាល់សកម្មភាពរបស់លោកជាមួយភរិយា និងកូនប្រុសទាំងពីរ បង្ហោះនៅលើបណ្តាញសង្គម៕ ដោយ៖ លឹម ហុង
