ភ្នំពេញ៖អាវុធហត្ថរាជធានីភ្នំពេញ បានឲ្យដឹងថា ចោរលួចឡាននៅខេត្តតាកែវ នៅចំណុចផ្ទះសំណាក់ មហារុងរឿង ត្រូវសមត្ថកិច្ចប៉េអឹមស្ទាក់ចាប់បាននៅកោះពេជ្រ នារសៀលថ្ងៃទី១៩ ខែកញ្ញា ឆ្នាំ២០២០។ សូមចូលរួមត្រេកល្អចំពោះប្អូនស្រី Lyny Queen IIផងដែលរកឡានឃើញវិញ បន្ទាប់ពីចចោរលួចបាត់ ហើយបង្ហោះវីដេអូនិងរូបថតលើបណ្តាញសង្គមហ្វេសប៊ុក។
កងរាជអាវុធហត្ថរាជធានីភ្នំពេញ បានចេញផ្សាយព័ត៌មានបឋមថា នៅទីបំផុត ! ចោរដែលបន្លំខ្លួនជាម្ចាស់ផ្ទះសំណាក់ លួចយករថយន្តភ្ញៀវ ក្នុងផ្ទះសំណាក់ «មហារុងរឿង» នៅខេត្តតាកែវ ត្រូវបានអាវុធហត្ថរាជធានីភ្នំពេញ ក្នុងខណ្ឌដូនពេញ ឃាត់ខ្លួនបានហើយនៅកោះពេជ្រ។ ព័ត៌មានលម្អិតនឹងជម្រាបជូនក្រោយពេលសមត្ថកិច្ចជំនាញស៊ើបសួររួច។
ចំណែកប្អូនស្រីផង Lyny Queen II ក៏បានសរសេរសារនៅផេកហ្វេសប៊ុកផ្លូវការដោយបាន
អរគុណដល់បងប្អូនដែលបានជួយស៊ែរបងប្អូនជាច្រើន ដែលបានតេមកខ្ញុំប្រាប់ឡាននៅម្ដុំណា ឥឡូវខ្ញុំតាមចាប់បានហើយ អរគុណដល់លោកពូប៉ូលិស និងលោកពូប៉េអឹម ចាប់បាននៅកោះពេជ្រវេលាម៉ោង១និង៣០នាទីរសៀល បានពុកម៉ែបងប្អូនទាំងអស់គ្នាជួយស៊ែរ អរគុណជាច្រើន។
គួរជម្រាបថា កាលពីថ្ងៃទី១៧ ខែកញ្ញា ឆ្នាំ២០២០ នៅចំណុចផ្ទះសំណាក់ មហារុងរឿង ស្ថិតនៅភូមិខ្លាគ្រហឹម ឃុំតាភេម ស្រុកត្រាំកក់ មានករណីបន្លំយករថយន្តមួយគ្រឿង ម៉ាកតូយ៉ូតា Rivo ឆ្នាំ២០២០ ពាក់ផ្លាកលេខ ភ្នំពេញ 2BK-4443 របស់ម្ចាស់ឈ្មោះ រិន រ៉ាវី ភេទប្រុស អាយុ៣១ ឆ្នាំ នៅភូមិសុភី ឃុំកំពង់ស្វាយ ស្រុកសេរីសោភ័ណ្ឌ ខេត្តបន្ទាយមានជ័យ ដែលបានមកស្នាក់នៅផ្ទះសំណាក់ខាងលើ។
សមត្ថកិច្ចមូលដ្ឋានបានបញ្ជាក់ថា មុនពេលកើតហេតុ មានជនសង្ស័យម្នាក់ បានបន្លំធ្វើជាម្ចាស់ផ្ទះសំណាក់ហើយបានទៅគោះទ្វារយកសោឡានថា យកមករៀបចំហើយក៏យកទៅបាត់តែម្ដងទៅ លុះដល់វេលាម៉ោង១១៖១០នាទីយប់ ទើបដឹងហើយម្ចាស់រថយន្តបានមកដាក់ពាក្យបណ្ដឹង នៅអធិការដ្ឋាននគរបាលស្រុកត្រាំកក់៕
ដោយ៖កូឡាប