កាលពីពេលថ្មីៗនេះ លោក អ៊ឹម ជីវ៉ា បានបញ្ចេញវីដេអូខ្លីៗចំនួន២ ស្នើដល់អភិបាលខេត្តកែប និងក៏ដូចប្រធានមន្ទីរទេសចរណ៍ខេត្តនេះ ជួយចុះត្រួតពិនិត្យមើលបងប្អូនអាជីវករនៅតាមតំបន់កម្សាន្តសំខាន់ៗផង ក្រោយពីបានជួបផ្ទាល់ដោយជួលតូបអង្គុយធម្មតាសោះកាប់ក្នុងតម្លៃរហូតដល់ទៅ ៣៥ ដុល្លារ ហើយបើមិនចង់អស់ថ្លៃជួលតូបទេ គឺត្រូវកុម្ម៉ង់ម្ហូបចាប់៥មុខ ហើយក្នុង១មុខចាប់ពី៦ម៉ឺនរៀលឡើងទៅ។
យ៉ាងណាមិញ ក្រោយពីបានឃើញលោក អ៊ឹម ជីវ៉ា បានចេញវីដេអូនិយាយបែបនេះ ស្រាប់តែមានគណនីហ្វេសប៊ុកមួយឈ្មោះថា Ouk Rithysak បានបង្ហោះសារឆ្លើយតបទៅកាន់លោក អ៊ឹម ជីវ៉ា ដោយធ្វើការចោទទៅវិញយ៉ាងដូច្នេះថា៖ «ម្ចាស់ហាងបានចេញបកស្រាយហើយ។ សូមបងប្អូនជួយវិនិច្ឆ័យទាំងអស់គ្នា។ ហេតុអីចាំblock ម្ចាស់ហាងធ្វើអី មិនព្រមឲ្យគាត់តទល់ក្នុងpageរបស់ខ្លួនទៅ?។ បើចង់តវ៉ា ឬវែកញ៉ែករកខុសត្រូវ សូមខលមក លេខគណៈកម្មការរៀបចំសណ្តាប់ធ្នាប់។ សូមជួយ Comment ផង តើខាងណាខុសខាងណាត្រូវ?»។
ដោយឡែក តាមរយៈទំព័រហ្វេសប៊ុក «អាហារដ្ឋាន សម្រស់កោះទន្សាយ» ក៏បានធ្វើការច្រានចោលចំពោះការលើកឡើងរបស់លោក អ៊ឹម ជីវ៉ា ដោយបានបញ្ជាក់ឲ្យបងប្អូនមហាជនបានជ្រាបថា៖ «អាហារដ្ឋានសម្រស់កោះទន្សាយយើងខ្ញុំ សូមអភ័យទោសចំពោះបងម្ចាស់ account facebook ឈ្មោះ អ៊ឹម ជីវ៉ា ដែលបានមកសម្រាកកម្សាន្តកន្លែងយើងខ្ញុំ បើករណីការបម្រើ ឬផ្តល់សេវាមិនបានពេញលេញសូមបងៗមត្តាអធ្យាស្រ័យ និងសូមជួយ Comment ក្នុងន័យកែលម្អផង ដោយជាក់ស្តែង២ឬ ៣ថ្ងៃកន្លងទៅនេះ អាកាសធាតុមិនអំណោយផលភ្លៀងផងខ្យល់ផង តែកន្លែងខ្ញុំរកតែ ខ្ចុះ ឬតុជូនភ្ញៀងអង្គុយពុំបានផង។ តែខ្ញុំមានការសោកស្តាយជាពន់ពេកដែលបងបាន live Video មូលបង្កាច់ថាយើងខ្ញុំបានយកថ្លៃខ្ចុះបងរហូតដល់ 35$ ហើយមុខម្ហូបចាប់ពី៧ម៉ឺនរៀលឡើង រហូតទៅដល់៥មុខទើបអាចអង្គុយបាន ដោយមានចេតនាបង្ខូចឈ្មោះរបស់ខេត្តកែប និងដាក់បន្ទុកមកថ្នាក់ដឹកនាំ និងមន្ត្រីរាជការក្នុងខេត្តកែប។ យើងខ្ញុំសូមបដិសេធន៍ជាដាច់ខាតនូវបញ្ហាអស់ទាំងនេះ ព្រោះអាហារដ្ឋានយើងខ្ញុំមានស្លាកយីហោ បញ្ជីមុខម្ហូបត្រឹមត្រូវ និងបម្រាមផ្សេងៗទៀត ដើម្បីរក្សាសុវត្ថិភាព និងទំនុកចិត្តជូនភ្ញៀវ។ ហេតុនេះ សូមបងមេត្តាដកពាក្យនេះចេញ ដើម្បីរក្សាបាននូវភាពថ្លៃថ្នូរ និងកិត្តិយសទាំងអស់គ្នា»។
ទោះជាបែបណា ជាដំបូង លោក អ៊ឹម ជីវ៉ា បានធ្វើការឆ្លើយតបទៅកាន់គណនី Ouk Rithysak ក្តៅៗបែបនេះថា៖ «ឲ្យគាត់ហ៊ានស្បថងាប់មួយពូជ ឬងាប់ដោយវេទនាអត់ថាខ្ញុំប្លុកគាត់ ! សំដីសជាតិ មាយាទសពូជ»។
ក្រោយមក លោកក៏បានបង្ហោះសារពាក់ព័ន្ធករណីខាងលើនេះជាបន្តបន្ទាប់ទៀតថា៖ «ស្អែកខ្ញុំនឹងធ្វើសន្និសីទកាសែតស្តីពីមន្ត្រីប៉េអឹមម្នាក់នៅខេត្តកែប ចេញមុខកាងការពារពួកមនុស្សអាក្រក់ដែលលក់កោរកាប់ក្នុងខេត្តកែប នៃរដូវបុណ្យទាន ឲ្យបងប្អូនប្រជាពលរដ្ឋបានដឹង។»
«ប្រជាពលរដ្ឋ គេមិនហ៊ានខលទៅ ដោយសារតែមានមន្ត្រីអាក្រក់ខ្លះ ចេញមុខកាងការពារអ្នកលក់កាប់កោរតាមចិត្តពេលបុណ្យទានម្តងៗ អ៊ឹចឹងតើបានខំប្រឹងចេញមុខការពារណាស់ សង្ស័យបានផលប្រយោជន៍ ឬជាបងប្អូនហើយមើលទៅ សុំទោសជីវ៉ាមិនខ្លាចទេ មើលមនុស្សខុសហើយ»៕ ដោយ៖ លឹម ហុង
