បាត់ដំបង៖ យោងតាមសេចក្តីជូនដំណឹងរបស់ក្រសួងធនធានទឹក និងឧតុនិយមស្តីពីស្ថានភាពអាកាសធាតុ ដែលសង្កេតឃើញថា ខ្យល់មូសុងនិរតីបានបង្កើនល្បឿនយ៉ាងលឿនបក់មកលើប្រទេសកម្ពុជា ទទួលឥទ្ធិពលប្រព័ន្ធសម្ពាធទាបនៅលើសមុទ្រប៉ាស៊ីហ្វិកនិងវិវត្តខ្លួនជាបន្តបន្ទាប់ទៅជាវិសម្ពាធទាបរួចក្លាយទៅជាកូនព្យុះមួយ។
រដ្ឋបាលខេត្តបាត់ដំបង នាថ្ងៃទី២០ ខែកញ្ញា ឆ្នាំ២០២០នេះបានជូនដំណឹងដលប្រជាពលរដ្ឋទាំងឡាយ ជាពិសេសអ្នកដែលរស់នៅប៉ែកខាងលើ និងនៅតាមបណ្តោយដងស្ទឹងសង្កែ ត្រូវបង្កើនការប្រុងប្រយ័ត្នខ្ពស់ ចំពោះបញ្ហាទឹកជំនន់តាមដងស្ទឹង និងបញ្ហាជំនន់ទឹកភ្លៀងជាដើម ដើម្បីការពារសុវត្ថិភាពទាំងអស់គ្នាពីបញ្ហានានា ដែលអាចកើតមានដោយសារគ្រោះធម្មជាតិទាំងនេះ។
ដើម្បីធានាបាននូវសន្តិសុខ និងសុវត្ថិភាពដល់ភ្ញៀវទេសចរជាតិ និងអន្តរជាតិ មន្ទីរទេសចរណ៍ខេត្ត បាត់ដំបង សូមធ្វើការណែនាំដល់លោក លោកស្រីម្ចាស់រមណីយដ្ឋានដែលស្ថិតនៅតាមជ្រោះជ្រលងភ្នំ ដងស្ទឹង បឹងបួរ អោយផ្អាកដំណើរការបណ្តោះអាសន្នជាបន្ទាន់ ចាប់ពីថ្ងៃទី២០ ខែកញ្ញា ឆ្នាំ២០២០រហូត ដល់ថ្ងៃជូនដំណឹងសារជាថ្មី ដើម្បីជៀសវាងនូវគ្រោះថ្នាក់ដែលអាចកើតមានជាយថាហេតុ ។
ទទួលបានសេចក្តីជូនដំណឹង លោក លោកស្រីម្ចាស់រមណីយដ្ឋានដែលស្ថិតនៅតាមជ្រោះជ្រលងភ្នំ ដងស្ទឹង បឹងបួរ ត្រូវយកចិត្តទុកដាក់អនុវត្តប្រកបដោយស្មារតីទទួសខុសត្រូវខ្ពស់ ចាប់ពីថ្ងៃជូនដំណឹងនេះតទៅ។
បើលោក លោកស្រីម្ចាស់រមណីយដ្ឋានដែលស្ថិតនៅតាមជ្រោះជ្រលងភ្នំដងស្ទឹង បឹងបួរ ណាដែលមិនអនុត្តតាមសេចក្តីជូនដំណឹងនេះ ត្រូវទទួលខុសត្រូចំពោះមុខច្បាប់។
ឥទ្ធិពលខាងលើនេះ បានធ្វើឱ្យភ្លៀងនៅតែបន្តធ្លាក់ និងធ្វើឱ្យស្ថានភាពទឹកនៅក្នុងស្ទឹងសង្កែ ស្ទឹងមង្គលបុរី និងស្ទឹងដូនទ្រី នៃខេត្តបាត់ដំបង មានការកើនឡើងយ៉ាងគំហុក ដែលអាចបង្កជាទឹកជំនន់នៅតាមបណ្ដោយស្ទឹង។ ម្យ៉ាងវិញទៀត ដោយសារស្ថានភ្លៀងនៅតែបន្តធ្លាក់យ៉ាងដូច្នេះ ក៏អាចកើតមានជំនន់ទឹកភ្លៀងប៉ះពាល់ដល់ភូមិដ្ឋាន និងផ្ទះសម្បែងរបស់ប្រជាពលរដ្ឋផងដែរ។
ជាមួយគ្នានោះ មន្ទីរទេសចរណ៍ខេត្តបាត់ដំបង ក៏បានចេញសេចក្ដីជូនដំណឹងណែនាំឱ្យម្ចាស់រមណីយដ្ឋានដែលស្ថិតតាមជ្រលងភ្នំ ដងស្ទឹង បឹងបួរ ត្រូវផ្អាកដំណើរការបណ្ដោះអាសន្នជាបន្ទាន់ ចាប់ពីថ្ងៃ២០ ខែកញ្ញានេះ រហូតដល់មានការជូនដំណឹងថ្មី ដើម្បីការពារសុវត្ថិភាពជូនភ្ញៀវទេសចរពីបញ្ហានានា។
ចំណែកអាជ្ញាធរខេត្តប៉ៃលិន បានឲ្យដឹងថាក្នុងរយៈពេល២៤ម៉ោង នៅថ្ងៃទី១៩ ខែកញ្ញា ឆ្នាំ២០២០ ខេត្តប៉ៃលិន ទទួលបានទឹកភ្លៀងពីឥទ្ធិពលនៃព្យុះ ឈ្មោះ នូល “NOUL” ក្នុងកម្រិតពី(៧០-១០៥) មិល្លីម៉ែត្រ ។ ហើយនៅវេលាម៉ោង១០និង៣០ នាទីព្រឹកនេះ មានភ្លៀងបានបន្តធ្លាក់សាជាថ្មី ក្នុងកម្រិតពីខ្សោយទៅមធ្យមគ្រប់ដណ្តប់ទូទាំងខេត្តប៉ៃលិន និងតំបន់ជួរភ្នំផងដែរ ។ ចំណែកឯកម្ពស់ទឹកក្នុងដងស្ទឹង និងអូរទូទាំងខេត្ត បានកើនឡើងស្ទើរគ្រប់កន្លែង ។ ដោយឡែកស្ថានភាពទឹកស្ទឹងប៉ៃលិន ក្នុងពេលនេះទឹកបានឡើងប្រៀបមាត់ស្ទឹងជាច្រើនកន្លែង និងបានហូរចូលតំបន់ទំនាបមួយចំនួនហើយ ក្នុងនោះហូរចូលផ្ទះបងប្អូនប្រជាពលរដ្ឋចំនួន ៤គ្រួសារ ស្ថិតក្នុងភូមិទំនប់ ឃុំស្ទឹងត្រង់ ស្រុកសាលាក្រៅ ។ ស្ថានភាពបែបនេះ ទឹកស្ទឹងនិងអាចបន្តកើនឡើង ហូរចូលទៅតំបន់ទំនាបផ្សេងៗទៀត ដែលបង្កើតបានជាជំនន់ទឹកភ្លៀង តាមមាត់ស្ទឹងក្នុងភូមិ-ឃុំ មួយចំនួនជាប់មាត់ស្ទឹង ពិសេសក្នុងភូមិសាស្ត្រស្រុកសាលាក្រៅ ។ អាស្រ័យហេតុនេះសូមបងប្អូនប្រជាពលរដ្ឋដែលរស់នៅតាមដងស្ទឹង តាមតំបន់ខាងលើ ក៏ដូចជាបងប្អូនដែលនិយមលេងកំសាន្តតាមដងស្ទឹង សូមមេត្តាប្រុងប្រយ័ត្នខ្ពស់ ជៀសវាងមានគ្រោះថ្នាក់ជាយថាហេតុណាមួយ ៕ដោយ៖កូឡាប
